Numbers 34

Guarani MBYA (Nhanderuete ayvu iky'a e'ỹ va'e)

← Chapter 33 Jump to: Chapter 35 →

1Ha'e gui Senhor aipoe'ive ju Moisés pe:

2— Ndeayvu ke Israel kuery pe. Ha'e vy aipo're: Canaã yvy re pevaẽmba ma rire itui 'rã penderekoarã, Canaã yvy ae, ijapya'i nhavõ peve.

3— Yvy kuaray puku-a katy itui va'e re pendekuai 'rã Zim regua tekoa e'ỹa regua guive Edom yvy apy'i peve. Kuaray puku-a katy pendeyvy oo 'rã ye'ẽ apy guive kuaray oua katy.

4Ha'e va'e apy ma ojeapa 'rã ovy kuaray puku-a katy rupi, Acrabim yvy'ã katy, ha'e gui ma oaxa ju 'rã Zim peve. Ha'e gui ma oo 'rã Cades-Barnéia kuaray puku-a katy rupi. Ha'e vy Hazar-Adar katy oẽ vy Azmom peve 'rã oaxa.

5Ha'e va'e apy ma Azmom gui ojeapave 'rã ovy Egito katy'i yakã'i oĩ va'e rembe peve. Ha'e gui oove 'rã ye'ẽ rembe'i peve ae.

6— Ha'e gui kuaray oikea katy rupi pendeyvy apyrã ma ye'ẽ tuvixave va'e rembe 'rã opyta. Ha'e va'e ae 'rã opyta pendeyvy apy kuaray oikea katy rupi.

7— Pova'e ma ijapy kuaray ijapu'a'ia katy rupi: ye'ẽ tuvixave va'e guive oaxa 'rã Hor yvyty peve.

8Ha'e gui Hor yvyty guive ma oo 'rã Hamate py nhavaẽa'i peve. Ha'e va'e apy ma Zedade peve 'rã oo.

9Ha'e va'e gui ma oo 'rã Zifrom peve, ha'e gui opaa ma Hazar-Enã py 'rã opyta. Ha'e va'e ae ma ijapy kuaray ijapu'a'ia katy rupi oo va'e.

10— Ha'e gui kuaray oua katy rupi ijapy oo 'rã Hazar-Enã guive Sefã peve.

11Ha'e gui Sefã guive oguejy 'rã Ribla peve, Aim kuaray oua katy rupi ae. Ha'e gui ma oguejyve vy oo 'rã Quinerete ye'ẽ rembe rupi kuaray oua katy rupi.

12Ha'e gui oguejyve 'rã ovy Jordão yakã rembe ha'e javi rupi, ha'e gui ye'ẽ rembe py ju 'rã opa. Ha'e va'e ae 'rã pendeyvyrã itui, ijapya'i ha'e javi peve — he'i.

13Ha'e gui Moisés ijayvu Israel kuery pe. Ha'e vy aipoe'i: — Kova'e yvy ma pendeyvyrã xortea pexaa rami pejopy va'erã, nove regua pe ha'e peteĩ regua mbytekue ikuai va'e pe ju Senhor ome'ẽ uka va'ekue.

14Mba'eta Rúben ha'e Gade ramymino kuery ma oyvyrã ojopy ae ma okuapy guamoĩ ro pygua kuery mbovy pa ikuaia rami vy. Ha'e gui Manassés kuery regua mbytekue voi ojopy ma avi oyvyrã.

15Ha'e va'e mokoĩ regua ha'e peteĩ regua mbytekue ikuai va'e ju ojopy ae ma okuapy oyvyrã Jordão yakã kyvõ rami, Jericó tetã rexei, kuaray oua katy ae.

16Ha'e gui Senhor aipoe'ive ju Moisés pe:

17— Pova'e avakue ae ma yvy mboja'oarã ikuai. Hery ma sacerdote Eleazar ha'e Num ra'y Josué.

18Peteĩ-teĩ regua gui peiporavo avi 'rã peteĩ huvixa, yvy mboja'oarã.

19Ha'e va'e avakue rery ma po rami: Judá kuery va'e regua ma Jefoné ra'y Calebe,

20Simeão ramymino kuery va'e regua ma Amiúde ra'y Samuel,

21Benjamim kuery va'e regua ma Quislom ra'y Elidade,

22Dã ramymino kuery va'e regua ma Jogli ra'y huvixa Buqui,

23José ra'y Manassés ramymino kuery va'e regua ma Éfode ra'y huvixa Haniel,

24Efraim ramymino kuery va'e regua ma Siftã ra'y huvixa Quemuel,

25Zebulom ramymino kuery va'e regua ma Parnaque ra'y huvixa Elizafã,

26Issacar ramymino kuery va'e regua ma Azã ra'y huvixa Paltiel,

27Aser ramymino kuery va'e regua ma Selomi ra'y huvixa Aiúde,

28Naftali ramymino kuery va'e regua ma Amiúde ra'y huvixa Pedael — he'i.

29Ha'e va'e kuery pe ae Senhor omboja'o uka Canaã yvy Israel kuery rekoarã.

← Chapter 33 Jump to: Chapter 35 →