Ezekiel 10

Gujarati BSI (GUOV) (પવિત્ર બાઇબલ OV Reference Bible (BSI))

← Chapter 9 Jump to: Chapter 11 →

1ત્યાર પછી મેં જોયું, તો જુઓ, કરુબોના માથા પર જે ઘૂમટ હતો તેમાં તેમના પર ઊંચે નીલમણિ જેવું કંઈ દેખાયું, ને તેનો આકાર રાજ્યાસન જેવો દેખાતો હતો.

2તેણે શણના વસ્ત્ર પહેરેલા માણસને કહ્યું, “ફર્યા કરતાં પૈડાની વચમાં, એટલે કરુબ નીચે, પેસ, ને કરુબોની વચ્ચેથી ખોબો ભરીને અગ્નિના અંગારા લે, ને તેને નગર પર નાખ.” અને મારા દેખતાં તે અંદર પ્રવેશ્યો.

3હવે એ માણસ અંદર પ્રવેશ્યો ત્યારે કરુબો મંદિરની જમણી બાજુએ ઊભેલા હતા અને અંદરનો ચોક વાદળાથી ભરાઈ ગયો.

4પછી યહોવાનું ગૌરવ કરુબ ઉપરથી ઉપડીને મંદિરના ઊમરા ઉપર થંભ્યું; અને મંદિર વાદળાથી ભરાઈ ગયું, ને ચોક પ્રભુના ગૌરવના પ્રકાશથી ભરપૂર હતો.

5કરુબોની પાંખોનો અવાજ બહારના આંગળા સુધી સર્વશક્તિમાન ઈશ્વરના બોલવાના અવાજ જેવો સંભળાતો હતો.

6જ્યારે તેણે શણનાં વસ્ત્ર પહેરેલા માણસને આજ્ઞા કરી, “ફર્યા કરતાં પૈડાં વચ્ચેથી, એટલે કરુબો વચ્ચેથી અગ્નિ લે.” ત્યારે તે અંદર જઈને એક પૈડા પાસે ઊભો રહ્યો.

7અને કરુબોની વચ્ચેથી એક કરુબે પોતાનો હાથ કરુબોની વચમાંના અગ્નિ તરફ લંબાવીને તેમાંથી કેટલોક અગ્નિ લઈને શણનાં વસ્ત્ર પહેરેલા માણસના ખોબામાં મૂક્યો, ને એ તે લઈને બહાર નીકળ્યો.

8કરુબોમાં તેઓની પાંખો નીચે મનુષ્યના જેવો હાથ દેખાયો.

9પછી મેં જોયું, તો એક કરુબને પડખે પૈડું ને બીજા કરુબને પડખે બીજું પૈડું, એમ કરુબોને પડખે ચાર પૈડાં દેખાયાં; અને પૈડાંનો દેખાવ પોખરાજના તેજ જેવો હતો.

10દેખાવમાં તે ચારેનો ઘાટ એક સરખો હતો.જાણે કે એક પૈડું બીજાની મધ્યે હોય તેમ.

11તેઓ ચાલતાં ત્યારે તેઓની ચારે બાજુઓ ફરતી. ચાલતાં ચાલતાં તેઓ આડાંઅવળાં વળતાં નહિ, પણ જે જગા તરફ તેનું માથું હોય તે તરફ તેઓ તેની પાછળ પાછળ જતાં ચાલતાં ચાલતાં તેઓ આડાંઅવળાં વળતાં નહિ.

12તેઓનું આખું અંગ, તેઓની પીઠો, તેઓના હાથ, તેઓની પાંખો તથા પૈડાં, એટલે એ ચારેનાં પૈડાં ચારે તરફ આંખોથી ભરપૂર હતાં.

13પૈડાંને તો મારા સાંભળતાં “ફરતાં પૈડાં” એવું નામ આપવામાં આવ્યું.

14તે દરેકને ચાર મુખ હતાં:પહેલું મુખ કરુબનું હતું, ને બીજું મુખ મનુષ્યનું હતું, ને ત્રીજું સિંહનું હતું, ને ચોથું ગરૂડનું હતું.

15કરુબો ઊડીને ઊંચે ચઢ્યા. જે પ્રાણી મેં કબાર નદીની પાસે જોયું હતું તે એ જ.

16કરુબો ચાલતા, ત્યારે પૈડાં તેમની બાજુએ ચાલતાં; અને કરુબો પૃથ્વી પરથી ઊડી જવાને પોતાની પાંખો ઊંચી કરતાં ત્યારે પૈડાં પણ તેમને પડખેથી ખસી જતાં નહિ.

17તેઓ ઊભા રહેતા ત્યારે એ પણ ઊભાં રહેતાં; અને તેઓ ઊંચે ચઢતા, ત્યારે તેઓ પણ તેમની સાથે ઊંચે ચઢતાં, કેમ કે તેઓમાં પ્રાણીનો આત્મા હતો.

18પછી યહોવાનું ગૌરવ મંદિરના ઊમરા પરથી જઈને કરુબો પર થંભ્યું.

19કરુબોએ પોતાની પાંખો ફેલાવી, ને તેઓ તથા તેમની બાજુ પરનાં પૈડાં મારાં દેખતાં પૃથ્વી પરથી ઊંચા ચઢીને બહાર આવ્યાં; અને તેઓ યહોવાના મંદિરના પૂર્વ તરફના દરવાજાના બારણા આગળ ઊભાં રહ્યાં. તેઓના ઉપર ઊંચે ઇઝરાયલના ઈશ્વરનું ગૌરવ હતું.

20એ પ્રાણી મેં ઇઝરાયલના ઈશ્વરની નીચે કબાર નદીની પાસે જોયું હતું તે જ એ છે; અને મેં જાણ્યું કે તેઓ કરુબો હતા.

21દરેકને ચચ્ચાર મુખ, ને દરેકને ચાર પાંખો હતી. અને તેમની પાંખો નીચે મનુષ્યના જેવા હાથ હતા.

22તેઓના મુખોનો ઘાટ તો દેખાવમાં ને સ્વરૂપમાં કબાર નદીની પાસે જે મુખો મેં જોયાં હતાં તેના જેવો હતો. તે દરેકને સીધું આગળ ચાલતું હતું.

← Chapter 9 Jump to: Chapter 11 →