Ephesians 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Inwe nigo mwarenge mokwete ase ogosaria kwaino, na ebibe biaino.

2Ime ase ebio nigo mwabigenderete kare ase ogotunyana chingencho chi’ense eye, na gotunyana omogambi bw’okobua kwa igoro gati, oyore omoika oria ogokora emeremo ase abanto bataigwereti Nyasae.

3Naboigo naintwe twensi twagendete agwo kare ase okogania gwe chingencho chiaito chimbe, togaikerania okogania kw’emebere yaito, na ebirengererio biaito, tokaba ase chingencho chiaito abanto abaragwe ase endamwamu ya Nyasae buna abwo bande.

4Korende Nyasae, oyore nobonge bw’amabera, ase obwanchani bwaye obonene atwanchete,

5nonya nekero keria twarenge tokwete ase ogosaria gwaito, agatoa obogima amo na Kristo; naki mwatoorigwe ase obuya.

6Naende agatobokia amo nere, agatoikaransia amo nere aase a igoro ase Kristo Yeso,

7erinde ase ebiro birache naorokie obonda bw’obuya bwaye, obo boetete ekerengo, ase obwororo asetore ime ase Kristo Yeso.

8Naki mwatoorigwe ase obuya, ase enchera y’okwegena; ayio tarwete asemore abanyene, korende nekeegwa kia Nyasae;

9gose tari ase ogokora, monto onde tacha gwetogia.

10Naki igo tore emeremo y’amaboko aye, togatongwa ase Kristo Yeso, erinde tokore ogokora okuya oko Nyasae aroisetie ritang’ani, erio totaare ime ase okwo.

11Ase ayio, inyora buna mwarenge kare. Inwe abanto b’Ebisaku ase chingencho chi’omobere mware korokwa abanto batarogeti na baria bakwaroka ase okwaroka kw’omobere kogokorwa namaboko.

12Inyora ng’a engaki eria timwarenge na Kristo, nigo mwatananekanete korwa ase obobiare bw’Abaisraeli, abageni b’okobwatana kw’eira, motarenge na gosemeria konde, na motarenge na Nyasae ase ense.

13Korende bono, ase Kristo Yeso, inwe abamwarenge aare agwo ritang’ani, mwarentirwe ang’e namanyinga a Kristo.

14Naki ere nomorembe oito, otokorete intwe, abatwarenge babere, koba oyomo, agatagora etoto eria yatwatananete, engencho yaye obobisa.

15Ere ase omobere oye agasiria chinguru chi’amachiko na echi’emeroberio y’amachiko, erinde asere omonyene atonge omonto oyomo omoyia korwa ase baria babere, igo agakora omorembe,

16na kobwatania baria babere na Nyasae ase omobere oyomo, ase omosalaba, aase aiterete obobisa boria.

17Agacha korandia omorembe asemore abamwarenge are, na ase abwo barenge ang’e.

18Naki goetera asare intwe twensi twanyorire enchera y’okomoika ang’e Tata, ase Omoika oyomo.

19Gaki korwa bono inwe timori abamenyi gose abaeti, korende mwabeire ababiare amo nabachenu, abanto b’enyomba ya Nyasae,

20mwaagachirwe igoro y’oboroso bw’abatomwa na ababani, na Kristo Yeso omonyene nere rigena rinene ri’ekoona.

21Asare ere oboagacho bwonsi bwabwatanigwe amo, na gokina, bobe Hekalu Enchenu ase Omonene.

22Asere inwe boigo mwaagachirwe amo, mobe obomenyo bwa Nyasae, ase Omoika.

← Chapter 1 Jump to: Chapter 3 →