Exodus 35

Gussi (EBIBILIA ENCHENU) 2020

← Chapter 34 Jump to: Chapter 36 →

1Musa akarangeria omoganda bwonsi bw’Abaisraeli amo, akabatebia, “Aya naro Omonene achikire morakore:

2Mokore emeremo ase amatuko atano na rimo, korende rituko ria gatano na kabere nigo rirabe richenu asemore, rituko ri’Esabato, riatananwe ase Omonene. Onde bwensi aise gokora emeremo ase rituko erio goika aitwe akwe.

3Timobaisa gouta omorero ase rituko ri’Esabato, aande onsi ase momenyete.”

4Musa agatebia omoganda bwonsi bw’Abaisraeli, “Aya naro Omonene achikire:

5Moruere Omonene ebiegwa. Kera omonto oyore nomoyo bw’ogwancha aruere Omonene ebinto ebi: Etahabu, na efeta, na etaai;

6chiusi chi’amarionya chire buru, ne chimonyinga, ne chimbariri; egatani engiya na amanya e chimbori;

7amasankwa e chimingichi aakire etaago, na amasankwa amaterere e ching’iti chia rooche, ne chibao chi’emekonge;

8amaguta e chitaya, na ebinto bi’okoroisia amaguta akweakwa, na ebi’okoroisia ubani;

9amagena e rigori rinene buna oiniki na ayande akobekwa ase egesibao na egesembe ki’obokuani.”

10“Abaroisia bonsi abang’aini abare ase egati yaino, tiga bache baroisie ebinto bionsi Omonene achikire,

11nabio ebi: Obomenyo na eema yaye, na egietubo kiaye, ebigobanio ne chibao chiaye, na emeriibo, ne chisiiro amo ne chinterekerero chiabo;

12Esanduku na emiaro yaye, na Oboikaranso bw’Amabera, na etoto eria erabekwe ebokenge;

13emesa na emiaro yaye, na ebikorero biaye bionsi, na emegati eria eraruegwe ase Nyasae;

14ekebekerero gie chitaya na ebikorero biaye, ne chitaya chiaye amo namaguta e chitaya,

15na egesasimero ase ubani egosamberwa amo nemiaro yaye, na amaguta akweakwa, na amanukato are ne rimisu rigiya, na ebitambaa bigosungwa ase egesoero ki’Obomenyo obwo;

16na egesasimero aase ebing’wanso bigosamberwa amo negechungi kiaye gi’etaai, na emiaro yaye, na ebikorero biaye bionsi, na egetuba amo nenterekerero yaye;

17ebitambaa ebirakenge eraaro, ne chisiiro amo ne chinterekerero chiaye, na egetambaa ki’egesoero ki’eraaro,

18na ebirochi bi’Obomenyo na ebi’eraaro amo ne chingori chiabo,

19ne chianga chiria chinseera chigokorerwa ime y’Aase Aachenu, engencho yaye chianga chia Haroni omokuani, amo nechi’abamura baye, barabe bakobeka ekero bagokora emeremo yabo y’obokuani.”

20Erio omoganda bwonsi bw’Abaisraeli okaruao agwo ase obosio bwa Musa.

21Naende bakairana kera oyomo buna enkoro yaye yamosugetie, na buna anchete ere omonyene, bakarentera Omonene ebiegwa biabo ase okoroisia Eema y’Omosangererekano na ebinto bionsi ebiaganeirie, ase emeremo eria na ase chianga chiria chinchenu.

22Barabwo bagacha, abasacha na abakungu, na ase ogwancha kwabo bakarenta amameka, na ebigera bi’amato abo, ne chibonyi chi’ebiara, ne chisonoi, na ebinto ao ao bie chitahabu bi’ogwechabera. Kera omonto akarenta ebinto bie chitahabu, ebi aatananete ase ogokorera Omonene.

23Naende kera omonto oyo obwate chiusi chi’amarionya chire buru, ne chimonyinga, ne chimbariri, na egatani engiya, na amanya e chimbori, na amasankwa e chimingichi aakire etaago, na amasankwa e ching’iti chia rooche, akabirenta.

24Bonsi abaare konyara korua chifeta ne chitaai bakabirenta bibe ebiegwa ase Omonene, na bonsi abarenge nemekonge eyere emiya ase emeremo ende yonsi, bakayerenta.

25Na abakungu abaroisia abang’aini bagasisa namaboko abo chiusi chi’amarionya chire buru, ne chimonyinga, ne chimbariri, na echi’egatani engiya, bagachirenta.

26Na abakungu bonsi, abasugetigwe ase emioyo yabo, naende bamanyete emeremo eye, bagasisa amanya e chimbori abe chiusi.

27Abatang’ani babo bakarenta amagena e rigori rinene buna oiniki na ayande arabekwe ase egesibao na egesembe ki’obokuani,

28naende ebinto bie rimisu rigiya amo namaguta e chitaya, na amaguta akweakwa, na ubani ere ne rimisu rigiya.

29Abaisraeli bonsi, abasacha na abakungu, abarenge nogwancha korenta ebinto bi’emeremo eye Omonene achigete goetera ase Musa, bakarenta ebiegwa biabo ase Omonene.

30Musa agatebia Abaisraeli, “Rora, Omonene ochorire Besaleli, oyore mosinto o Uri, mochokoro o Huri bw’egesaku kia Yuda.

31Omoichoirie omoika o Nyasae, omoeire obong’aini ne chisemi anyare gokora emeremo ende yonsi y’oboroisia,

32abe oyomanyete koroberia na koroisia ebinto bie chitahabu, ne chifeta, ne chitaai,

33abe okobaacha amagena e rigori rinene na koyabeka ase ebikonde, na kobaacha emete, na gokora emeremo ende yonsi y’oboroisia.

34Omonene omoeire ere amo na Oholiabu, mosinto bw’Ahisamaki bw’egesaku kia Dani, obong’aini bw’okworokereria abande oboroisia bwabo.

35Obaichoirie obong’aini ase chinkoro chiabo, erinde banyare gokora emeremo ende yonsi buna okomang’a, na okoroberia, na koroisia ebitambaa bie chiusi chi’amarionya chire buru, ne chimonyinga, ne chimbariri, na echi’egatani engiya, na koroisia ebitambaa binde bionsi. Banyare gokora emeremo ende yonsi na bamanye koroberia oboroisia bonde bwonsi.”

← Chapter 34 Jump to: Chapter 36 →