Malachi 2

Gussi (EBIBILIA ENCHENU) 2020

← Chapter 1 Jump to: Chapter 3 →

1“Bono inwe abakuani, amang’ana aya nigo achikirwe asemore.

2Omonene bw’Emeganda nigo agoteba iga: Onye timogotegerera amang’ana ayio na koyabeka ase chinkoro chiaino ime, erinde mosike erieta riane, rirorio nindete okoragererigwa asemore, ndagererie ogosesenigwa kwaino. Ee, naikire koragereria ogosesenigwa okwo, ekiagera timori kobeka amang’ana ayio ase chinkoro chiaino.

3Nintogonyere ororeria rwaino, nintube amaiso aino nesike ye ching’iti echio mokorua chibe ebing’wanso. Abanto mbabarente bababeke ase esike eyio.

4Erio nario moramanye ng’a inche nabachikerete amang’ana ayio, erinde okobwatana kwane kw’ogotianania nakorete na Lawi kogenderere kobao botambe. Nabo Omonene bw’Emeganda agoteba.

5“Okobwatana kw’ogotianania nakorete nere nokw’obogima na omorembe. Okwo nigo namoete, erinde anyiroke. Ere akanyiroka, akaba okoiguswa ase engencho y’erieta riane.

6Amorokererio amaronge nigo arenge ase omonwa oye, na obobe tibwanyorekanete ase ebikoba biaye. Nigo abete ogotaara nainche ase omorembe na oboronge, na akaonchora abanto abange korwa ase ebibe.

7Ebikoba bi’omokuani goika birende chisemi, na abanto barigie okworokererigwa korwa ase omonwa oye, ekiagera nigo are omotomwa one inche Omonene bw’Emeganda.

8“Korende inwe mwagobeire korwa ase enchera, mwagerire abanto abange bagochirwe ase engencho y’amorokererio aino; ase igo mwasaririe okobwatana kw’ogotianania okwo nakorete na Lawi. Nabo Omonene bw’Emeganda agoteba.

9Inwe mwangire kobwatia chinchera chiane; nigo mogwanchereria abanto ekero mokworokereria amachiko. Ase ayio nimbatige mochaywe na gokeeigwa ase amasio ’abanto bonsi.”

10Inee! Intwe twensi titobwati Tata oyomo? Tari ere Nyasae oyomo ototongete? Nase ki rende totari abegenwa intwe ase intwe? Nase ki togosaria okobwatana kw’ogotianania okwo Nyasae akorete ne chisokoro chiaito?

11Abayuda bakorire aya atari ay’obwegenwa, na ay’okogechia akorirwe ase egati y’Abaisraeli, na ase Yerusalemu, ekiagera Abayuda bakorire Obomenyo Obochenu obwo Omonene anchete bwabeire obotachenegeti, banyuomire abaiseke b’abanto bagosasima enyasae engeni.

12Omonene nasirie korwa ase chinyomba chia Yakobo onde bwensi ogokora amang’ana ayio karabe omworokia gose omworokigwa, nonya noyokorenta ekeng’wanso ase Omonene bw’Emeganda.

13Amang’ana ande mogokora naya: Nigo mogotuba egesasimero ki’Omonene namariga aino, mwaba mokorera na kweumia, na ase ayio Omonene tagwanchera ebing’wanso biaino nonya ng’ake, gose takogokigwa nabirobio korwa ase amaboko aino.

14Inwe nigo mokoboria: “Nase ki atari kobianchera?” Nekiagera Omonene arenge kirori ase egati yao na omokungu bw’oboke bwao, oyio aye otari omwegenwa asare, nonya ore omokiare oo, na omokungu oo ase okobwatana kw’ogotianania.

15Omonto oyomo takorete bo, oria omoika ogendererete gotigara ime yaye. Ninki oria oyomo aganetie? Nigo aganetie ororeria rwatananwe robe orwa Nyasae. Ase engencho eyio, mwerende mono, erinde onde tabaisa koba oyo otari omwegenwa ase omokungu bw’oboke bwaye.

16Omonene, Nyasae bw’Abaisraeli, nigo agoteba iga: “Inche nigo ngechete ogotigana, naende nigo ngechete ng’a omonto nigo agwetuba obotindi buna agwetuba eanga.” Nabo Omonene bw’Emeganda agoteba. Ase engencho eyio mwerende timobasia koba abatari abegenwa.

17Inwe mwarosirie Omonene namang’ana aino. Nigo mokoboria: “Naki twamorosirie?” Nekiagera mogoteba ng’a kera omonto ogokora ebibe nigo are omuya ase obosio bw’Omonene, naende ng’a Omonene nigo akogokigwa noyio. Naende mwaboria; “Ng’ai Nyasae oyo okonacha ebina are?”

← Chapter 1 Jump to: Chapter 3 →