Micah 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Obobe nobwabo abwo bagokora emeroberio y’ogokora amabe na bayebeka ang’e kobare ase amarere abo; mambia kobwakire baba bakoyaikerania, ekiagera nigo ere ase okobua kw’amaboko abo.

2Abwo nigo bakoba ne ribero ri’okonyora emegondo, bayaire ne chinguru, bagania ne chinyomba bachiira. Nigo bakoura omonto enyomba yaye, ee, bamoura na omwando oyo.

3Ase ayio, aya naro Omonene agoteba: Rora, nkoroberia inde amabe igoro yaino inwe ab’egesaku eke, na timokonyara korusia amagoti aino korwa ase amabe ayio, gose timokonyara gotaara moeneno, ekiagera nigo erabe engaki embe.

4Ase rituko erio abanto mbatonge omorabaaro igoro yaino, babe bakobabokeria amagombo ’omoichano bagotera: “Twasirigwe kegima, Omonene oeire abanto abaao egetari ki’abanto baane, ee, ekeene okerusirie korwa asende, ogabeire abasaria emegondo yaito.”

5Ase engencho eyio onde tari orarambore engori y’okorengera egetari ase omosangererekano bw’Omonene.

6Abanto abwo nigo bakobana iga: “Timobaisa kobana! Onde tagwenereti kobana igoro y’amang’ana buna ayio; ogochaywa tikogotonyora.

7Inwe abanto b’ororeria rwa Yakobo, Inee, amang’ana aya nagwenerete gokwanwa: Omoika bw’Omonene nigo ore omwango kogechigwa? Oko nakwo ogokora kwaye? Inee! Amang’ana aane tari korenta amaya ase omonto ore nenkoro endonge?

8“Korende ase amatuko aya mwaimokeire abanto baane buna ababisa. Nigo mokwaboria ebiambaro bi’abwo bagotaara bare nomorembe bataganeti esegi.

9Nigo mogoseria abakungu b’abanto baane korwa ase chinka chiabo echio bagokerete, mwaura abana babo obonene bokorwa asende tibabonyora nonya ng’ake.

10Inwe imoka morue aa, ekiagera aase aino mogotimokera tari aa. Ase engencho y’ogotacheneka kwaino aase aa nasarigwe nogosaria okonene.

11“Omonto omonyaborimo aise gokwana amang’ana a bosa na ay’obong’ainereria, atebe: Inche nigo nkobabanera igoro y’edivai na ebinyugwa binde bigotindia, omobani oyio nere abanto aba baranche.

12“Inwe ab’ororeria rwa Yakobo, nimbasangererie inwe mwensi, ee ekeene, ninsangererie abatigari b’Abaisraeli buna ching’ondi chigosangererigwa chiabekwa ase obweri obomo, na buna riicho rie ching’ondi rikorisia aase aamo, mbabe bakwoga, ekiagera bare abange.

13“Oyo okobaatera enchera nabatang’ane; barabwo mbagareyie, baetere ase egeita, basoke isiko. Omoruoti obo nabaraae, ee, Omonene nabatang’ane bosio bwabo.”

← Chapter 1 Jump to: Chapter 3 →

Recommended Reading

Commentary Micah Commentaries → Devotional Micah Devotional Guide → Get This Bible Gussi (EBIBILIA ENCHENU) Study Bible →