Obadiah 1

Gussi (EBIBILIA ENCHENU) 2020

Jump to:

1Oko nokorora kw’Obadia. Aya naro Omonene Nyasae agoteba igoro y’egesaku kia Edomu, ee, twaigure amang’ana korwa ase Omonene, na omotomwa otomirwe gochia ase abanto b’ebisaku, ogoteba: “Imoka, togende korwania Abaedomu esegi!”

2“Rora, ningokore obe omoke ase egati y’abanto b’ebisaku, obe kogochaywa mono.

3Oboenenu bw’enkoro yao bwakong’ainire, aye omenyete ime y’emienya y’ebitare; agwo ase omenyete aimokererete igoro. Nigo ogokwana ase enkoro yao ime, gweteba: Ning’o orang’iyerie gochia inse?”

4Omonene nigo agoteba iga: “Noisa koagacha egeswa kiao aaria igoro buna ekeongo, ee, nokebeke ase egati‐gati ye ching’enang’eni, inche ninkoiyerie korwa aroro.”

5“Abaibi gose abasakori baise kogochera botuko, aye nosirigwe kegima. Ekeene, nigo baraibe binde bionsi baganetie. Inee! Abasangereria b’amasabibu baare kogochera, tibarenge kogotigera nonya naria agotigara?

6Naki abanto b’ororeria rwa Esau bakoriga‐rigigwa ne chinibo chiabo chibisire chiaorokigwe maiso marore!

7Abanto baria bonsi kwabwatanete nabarabwo bagoseririe gochia ase orobebe, abanto baria gwakorete omorembe nabarabwo bakong’ainire na gokobua. Abasani bao mokoria komo bagotegeire oboreba, bagoteba: Ng’ai obong’aini bwao bore?”

8Omonene nigo agoteba iga: “Ase rituko erio ninsirie abanto abang’aini ba Edomu, naende ninsirie okomanya gwonsi korwa ase Egetunwa gia Esau.

9Inwe Abatemani, abarwani baino b’esegi bare chituoni mbaondoke, na kera oyomo ore ase Egetunwa gia Esau naitwe asirigwe kegima.”

10“Ekiagera mwaureretie na goita abanto bamino b’ororeria rwa Yakobo, namosookigwe na gosirigwa goika kare na kare.

11Inwe nigo mwatenenete ensemo ase rituko riria, ekero abanto b’ense engeni bairete chinibo chiabo, bagasoa ebiita bia Yerusalemu, bakayoakera obomera. Naboigo nainwe mwarenge buna barabwo.

12Timobaisa kogoka ase rituko riria amabe arache ase abanto bamino. Gose timobaisa gochenga ase rituko ri’ogosirigwa kw’Abayuda, gose timobaisa gokwana noboenenu ase rituko ri’emechando yabo.

13Inwe timosoa ase egeita ki’abanto baane ase rituko ri’amaakwa abo; gose timogokera emechando yabo ase rituko ri’amaakwa abo, gose timorambora amaboko aino koira chinibo chiabo ase rituko ri’amaakwa abo.

14Inwe timobaisa gotenena ase amatabekania e chinchera goita abanto ba Edomu kobagotama, gose timobeka abatooregete babo bache gosirigwa ase rituko riria ri’emechando yabo.”

15“Rituko ri’Omonene ng’ang’e rire gochera abanto b’ebisaku bionsi. Buna mwabeire mogokora, naboigo nainwe morakorerwe. Ogokora kwaino nkobairanere inwe abanyene.

16Buna mwabeire mokonywera igoro ase egetunwa kiane egechenu, naboigo nabanto b’ebisaku bionsi baragenderere konywa botambe, ee, mbanywe bakoore nonya neturubo yonsi, na babe buna tibarengeo.”

17“Korende ase egetunwa gia Sayoni mbabe aroro abaratooreke na aase agwo nabe aachenu. Abanto b’enyomba ya Yakobo nabairanerigwe ense yabo.

18Abanto b’enyomba ya Yakobo mbabe omorero, na ab’enyomba ya Yusufu mbabe buna ekebemberi ki’omorero, na ab’enyomba ya Esau mbabe buna amasakwe amomo. Abanto ba Yakobo na aba Yusufu mbasambe abanto ba Esau babasirie. Onde tari oratigare ase enyomba yaye, ekiagera n’Omonene okwanire ayio.

19Abanto b’ense ya Negebu mbaire Egetunwa gia Esau, na ab’ense omweya mbaire ense y’Abafilisti. Mbaire na ense y’Abaefraimu na ey’Abasamaria chibe echiabo; na abanto ba Benjamin mbaire Gileadi ebe eyabo.

20Abarwani esegi b’Abaisraeli abwo bairetwe ase obosomba mbairane bamenye ase ense ya Kanani gochia ase omochie o Sarefata. Abanto ba Yerusalemu bairetwe ase obosomba, abwo bamenyete Sefaradi, mbaire emechie ya Negebu ebe eyabo.

21Erio abatooria mbariine ase Egetunwa gia Sayoni, bagambere Egetunwa gia Esau. Omonene omonyene nere orabe omoruoti.”

Jump to: