Philippians 4

Gussi (EBIBILIA ENCHENU) 2020

← Chapter 3 Jump to:

1Gaki baminto, inwe abanyanchete, abwo amaiga andiereire, omogoko one na egutwa yane, tenena bokong’u ase Omonene, abanchi baane.

2Namosoroire Ewodia, namosoroire na Sintike babe nomoyo oyomo ase Omonene.

3Ee, naye bo, omosaiga bw’ekeene, nakoboririe okonye abakungu abwo bakorete emeremo y’enchili amo nainche, na Klementi nere, na baria bande bakorete emeremo amo nainche, abwo amarieta abo are ime ase ebuku y’obogima.

4Goka ase Omonene amatuko onsi; naende natebire: Goka!

5Obwororo bwaino bomanyekane ase abanto bonsi. Omonene ng’ang’e are.

6Timwechandera ing’ana rinde rionsi; korende ase kera ring’ana ase ogosaba na ogosorora amo nokoiraneria ng’a mbuya mono, okorigia kwaino komanyekane ase Nyasae.

7Na omorembe o Nyasae, oyobuete okomanya gwonsi, norende chinkoro chiaino na ebirengererio biaino ase Kristo Yeso.

8Omoerio baminto, onsi ayare ay’ekeene, onsi ayare ay’ogosika, onsi ayare ay’oboronge, onsi ayare ay’oborabu, onsi ayagwenerete gwanchwa, onsi ayagokwanwa buya; koborabeo obuya bonde bwonsi, gose ogotogigwa, aya onsi yarengererie.

9Amang’ana aya mweorokereretie na koyanyora, na koyaigwa, na koyarora korwa asende, moyakore, na Nyasae bw’omorembe nabe amo nainwe.

10Nagokire mono ase Omonene, ekiagera bono ase omoerio mwairanire ase ebirengererio biaino igoro y’okoremerwa kwane; nabo mwarenge kondengereria ritang’ani, korende timwanyora ribaga.

11Tari ng’a ngokwana aya ekiagera inde nokoremerwa, naki neorokereirie goisaneka ase engencho ende yonsi inde nero.

12Namanyire ogokeeigwa, naende namanyire okomenteka; ase engencho yonsi, na ase amang’ana onsi neorokereirie, okoigota na koigwa enchara, okomenteka na okoremerwa.

13Ninyare gokora amang’ana onsi asere oyokombeka chinguru.

14Korende mwakorete buya mokabwatana nainche ase emechando yane.

15Na inwe Abafilipi abanyene mwamanyire ng’a ase omochakano bw’enchili, ekero naruete Makedonia, ekanisa ende tiyarenge yabwatanete nainche ase amang’ana ’okorua na okonyora, otatiga inwe mweka.

16Naki nonya nase Tesaloniki mwandeterete ogokonywa ase okoremerwa kwane ara kabere, tari rimo rioka.

17Tari ng’a nindigetie ekeegwa keria, korende nigo ndigetie okwama koria gokomenteka koba okonge asemore.

18Korende ninde nebinto bionsi, na kobua; naende naichoirwe, ekiagera nanyorire ase okoboko kwa Epafrodito ebiegwa biaruete asemore, bire ogotioka okuya, ekeng’wanso giancheirwe, kegwenerete Nyasae.

19Na Nyasae one nabaichorerie kera ekimoganetie ase ekerengo ki’obonda bwaye ase obonene ase Kristo Yeso.

20Bono Nyasae, Tata oito, abakwe kare na kare. Amina.

21Monkwanerie kera omochenu ase Kristo Yeso. Abaminto abare amo nainche babakwanirie.

22Abachenu bonsi babakwanirie, mono kobua abwo bare b’enyomba y’omoruoti omonene.

23Obuya bw’Omonene Yesu Kristo bobe amo nemioyo yaino.

← Chapter 3 Jump to: