2 Chronicles 35

hadiyya

← Chapter 34 Jump to: Chapter 36 →

1Iyyoosiyaas Waa'i lombina higimmi uguda Yerusaaleemanne lonsukko. Luxxi agan aagu tommonnee soor ballannee Uguxxi gereechcho dutto'o.

2Qeessuwwi see'llisinne awwaaddamisa issukko; Keesammi Mi'n awwaadom qoxxita'a awwaaddamisa issukko.

3Ee'isam ixxuwwi gaga Waa'ina keessa'a hundem Isra'ee'l minaadabinam losisaan ikko'i Leewi'i oosina «Keesammi Hidi'l Saga'l Saaxina Daawiit beet adil Salamoon baxisu Keesammi Minenne dissehe. Kanniinsi eehid ki'nnuwwina Moollanni ihu Waa'aa ixxi minaadabaa awwaaddehe bagaan Hidi'l Saga'l Saaxina iyyitakka'a beyyiinsi beyyo massimmi hasisooyyo.

4Isra'ee'l adil Daawiitii ixxi beet Salamoonii kitaabbo'i awwonsinne ki'nnuwwi abaroosinne abaroosisinnee baxxanchisinnee guddehe.

5Leewi'i oos ikkobee'i ki'nnuwwi abbaayyuwwi illagenne ixxuwwi abaroosisinne keesammi beyyonne uullehe; abaroos qoodo'isinne annannichchinnem Leewi'i oos hee'llona.

6Ee lasage Shaashshiqqi uguxxi gereechcho dullehe. Ki'nnuwwi gagam keessehe. Waa'im Muse'enne ihaa ijaajukkisanne duttona ki'nnuwwi abbaayyuwwina gudissehe» yukko.

7Iyyoosiyaasim eekke'e hee'u minaadab hundinam Shaashshiqqi uguxxi kitimina ihona 30,000 gereebbaa fella'aa ee'isam 3,000 labeennuwwaa ixxi gaqqi horiinsi uwwukko.

8Gassaanim qeessuwwina, minaadabinaa Leewi'i oosinaa ixxuwwi gaqqi doo'llinne kiti'm diinate hincaa'llo'o. Keesammi Mi'n gassaan hee'llo'i Hilqiy, Zakaaryaasii Yihii'eelii ee uguxxi kitimina ihoo 2,600 gereebbaa fella'aa 300 labeennuwwaa qeessuwwina uwwito'o.

9Leewi'i oosina ijaajaan Konaaniy ixxi abbaayyuwwi ikko'i Shamaa'iyii Naatinaa'eelii ee'isam Hashaabiy, Yi'i'eelii Yoozaabaadii Shaashshiqqi uguxxi kitimina ihoo 5,000 gereebbaa fella'aa 500 labeennuwwaa Leewi'i oosina uwwito'o.

10Shaashshiqqi ugudina hasisoo luwwi hundim gudukko; qeessuwwii Leewi'i oosii adi'l ijaaccisanne ixxuwwina qoodamu beyyonne uullito'o.

11Shaashshiqqi ugudina duramu gereebbaa fellaa'aa Leewi'i oos coo'llo'o; qeessuwwim ee xiiga kiti'm beyyonne wixxo'o.

12Muse'e see'l kitaabanne kitaabamukkisannem Waa'ina kitim issita'a hincaa'llona shokkiisakka'a hincaa'akkam kitimina abaroosinne abaroosinnem annanni issito'o; labeennuwwam ee'isam issito'o.

13Leewi'i oosim see'llisinne uguxxi kitima giiranne satto'o. Keesammi kiti'm maaram qure'enne, fataatannannee disxannee satta'a minaadabina qaqqissa'a baxxansito'o.

14Ee lasage Leewi'i oos ixxuwwi gaginaa qeessuwwinaa gudisso'o. Mashka'oomim Aaroon shumo'i ikko'i qeessuwwi shokkiisakka'a hincaa'akkam kitimaa di'iraa hincaa'llu'uuyyi baqit afeebe'e baxxu'uuyyi affam hee'llo'i bikkinatte. Ee bikkina Leewi'i oos ixxuwwi gaginaa Aaroon shumo'i ikko'i qeessuwwinaa gudisso'o.

15Asaaf shumo'i ikko'i zammaaraan adil Daawiit, Asaaf, Heemaanii adilina hiraagaanchi hee'u Yiduutaanii ijaajjo'i ijaaccisanne ixxuwwina qoodamu beyyonne hee'llo'o. Leewi'i oosim shaashshiqqi uguxxi kitima ixxuwwina gudissam hee'llo'i bikkina Keesammi Mi'n gooccuwwa egettam hee'llo'i waardiyyuwwi egechchi beyyiinsi mattam hee'llo'oyyo.

16Ee'isinne shaashshiqqi uguda lonsimmii shokkiisakka'a hincaa'akkam kitima Waa'i kiti'm beyyonne hincaa'immii Waa'ik awwaad hundim adil Iyyoosiyaas ijaajukkisinne ee ballam gudukko.

17Eekke'enne hee'llo'i Isra'ee'l minaadab hundim shaashshiqqi uguda lonsito'o. Ee'isam lamar ballina Qorosho'i uguda lonsito'o.

18Hiraagaanchi Saamu'eel doolliinsi kid hooraa Isra'eelanne Shaashshiqqi uguda eehido'isa lonsakko'i amman bee'e. Iyyoosyaas qeessuwwinne, Leewi'i oosinne, Yihuxxi minaadabinne, Isra'ee'llaanninnee eekke'e hee'llo'i Yerusaalee'm minaadabinnee hundinnem Shaashshiqqi uguda lonsukkisa Isra'ee'l adilluwwik lonsukkok ayyim bee'e.

19Oo shaashshiqqi ugud lonsamukkok Iyyoosiyaas adil ihu tommonnee sadeenti hiinchonnettee hee'ukko.

20Adil Iyyoosiyaase ee hundam guullaa Keesammi minina baxaa lasage Gibxi uulli adil Niikaa'i Efiraaxiis daajji gadanonne hee'oo Karkaamiishanne orameena ixxi gogota amadaa firukko. Adil Iyyoosiyaasim ixxenne orameena ki'ukko.

21Ihukkaarem Niikaa'i Iyyoosiyaasina «Yihuxxi adil, eesee keesee wocansoo luwwi mahim bee'e. An waarummok i diina'inne orameenatte bagaan kiinninne orameenayyo. I diina'am qaqqisaa qasona Waa'i eese ijaajaakko. Waa'i iininne maqire ihu bikkina at iinninne uullixxantibeeta'n kiina eranne. Ihukkaarem Sabbittaa'lleensi Waa'i keese bi'isookko» yoo asso asse'ukko.

22Ihukkaarem Iyyoosiyaas ixxenne orameena murte'aa ki'ukko. Waa'i adil Niikaa'innette ihaa wocu woshsha macceeseena hasukkoyyo. Ixxim adilla'n eddechcha dabassaa mulli manna labaa Magiido'i biir beyyonne orameena marukko.

23Gibxi uulli gaadaanim adil Iyyoosiyaasa xiyyinne qasso'o. Ixxim ixxi awwaadaanina «Jorisa aphphixxaammoo bikkina ka lambe'iinsi eese fissehe» yaa ijaajukko.

24Ixxuwwim ixxi saa'llaa hee'u faraxxi gaarre'iinsi mulli ixxi gaqqi gaarre'enne saa'llissa'a Yerusaaleema massito'o. Ixxim eekke'enne lehukko. Adilluwwi waammi beyyonnem waammamukko. Yihuxxekii Yerusaalee'm minaadabii hundim wi'llito'o.

25Hiraagaanchi Ermiyaasim adil Iyyoosiyaasina wi'l gixo'o fissukko. Kaballi afeebe'em goonii meentii ee gixo'inne Iyyosiyaasa tiittamo. Oohim Isra'ee'l uullanne losamaakkoohan ihaa wi'l gixo'i kitaabanne kitaabamaakko.

26Iyyoosiyaas baxu mulli baxii Waa'ina hee'u ixxi lob iittii Waa'i seerina ijaajamam hee'ukkisii hundim

27luxxaanniinsi ki'isaa lasaanchi afeebe'e yoo ixxi aganni hundim Isra'ee'llaannonnee Yihuxxi adilluwwi aganni kitaabbuwwannee kitaabamaakko.

← Chapter 34 Jump to: Chapter 36 →