Romans 8

hadiyya

← Chapter 7 Jump to: Chapter 9 →

1Yesuus Kiristoosik heechcha uwwoo Keesammi Ayyaan baaxiiliinsii lehiinsii wolabbanonne fissu bikkina Yesuus Kiristoosanne amma'nnu keenonne kaba oogato'i bee'e.

3Mashka'oomim maar hoongaanchi ihu bikkina seer isseena xanubee'i luwwa Waa'i ixxi Beeto baaxii'l bikkina baaxiilaanchi maa'l kobi'llanne asse'aa Yesuus maarinne baaxiilo bi'isaakko.

4Eekka issukkokim Keesammi Ayyaan yukkisiinsi bagaan ni maar iittukkisa inkoombee'i neesenne seer hasoo muccuroom wo'mmoo'isinatte.

5Maar iittukkisa hee'llam keen ixxuwwika sawwitem maar hasoo luwwanne issitamo. Ihukkaarem Keesammi Ayyaan yukkisa hee'llam keen ixxuwwika sawwitem Keesammi Ayyaan hasoo luwwanne issitamo.

6Maa'l sawwite wonshimmik lasaanchi leho. Ihukkaarem Keesammi Ayyaa'n sawwite wonshimmik lasaanchi heechchaa xummaa.

7Maa'l sawwixxisa hee'immi Waa'ina maso'ooma. Mashka'oomim maa'l sawwit Waa'i Seerina ijaajamooyyo; ijaajameenam hore'em xanooyyo.

8Maa'l sawwixxisanne hee'llam keen Waa'a liiransiteena xantamoyyo.

9Hanqinam Waa'ik Keesammi Ayyaan ki'nnuwwanne hee'ulas ki'nnuwwi hee'llakkamok Keesammi Ayyaan hasoo'isa bagaan maar hasoo'isayyo. Kiristoosik Keesammi Ayyaan bee'ek ayyim Kiristoosaneyyo.

10Ihukkaarem Kiristoos ki'nnuwwi woronne hee'ulas ki'nnuwwik maar baaxiilina lehaakkoohane. Ki'nnuwwi ayyaanim muccuroo'm bikkina hee'oohane.

11Yesuusa Lehiinsi ki'isu Waa'ik Keesammi Ayyaan ki'nnuwwi woronne hee'ulas ee Yesuus Kiristoosa lehiinsi ki'isu Keesammi Ayyaa'n kollinne Waa'i ki'nnuwwaannina lehoo maarina heechcha uwwookko. Oo Keesammi Ayyaanim ki'nnuwwi woronne yoohane.

12Ee bikkina iyyabbaayyuwwa, niina giddi yookko. Ihukkaarem oo giddi maar iittukkisa hee'nnoommisinayyo.

13Mashka'oomim maar iittukkisa hee'llakkolas letakkamo. Ihukkaarem Keesammi Ayyaaninne maa'l baxo shitakkolas hee'llakkamo.

14Waa'ik Keesammi Ayyaan awwonsoo'isanne hee'llam keen hundim Waa'ina ooso.

15Neese Waa'ina oos inkaa «Abba, niyyanna!» yinaa weenshoommisina Keesammi Ayyaana aa'nnummo bagaan eraa'llisam baddinoommisina agidda'n ayyaana aa'nnummoyyo.

16Neese Waa'ina oos inkummisa Keesammi Ayyaan ixxi gagim ni ayyaaninne maqirem kuroolla.

17Neese Waa'ina oos inkummaa'lleensi Waa'i uwwoo luwwa lago'o a'llinoommo. Kiristoosinne maqirem lomba siixxineena Kiristoosinne maqire hawwo aa'nnummaa'lleensi ixxenne maqirem lago'o a'llinoommo.

18Kaba neesenne afoo hawwo niina moo'amoo lombinne keenaa moo'oommaare lobakata sholle'aalli issaa xigoommo.

19Qooccanchi hundim Waa'i oosika moo'ancha lobakat qulunxinne egeroolla.

20Mashka'oomim qooccanchi hundim awwaad bee'i luwwina ijaajamaakko. Ijaajamukkokim iittaatette ihoo'n neeyyatinne egerukkuuyyi ijaajamoo'isa Waa'i issu bikkinatte.

21Ihukkaarem qooccanchi hundim bichchi agiddaniinsi firaa Waa'i oosika lombi yoo wolabbano siixxoo neeyyat yookko.

22Qooccanchi hundim mat ihaa kabad afeebe'em xuuchchinne qitinukkuuyyi yoo'isa lanqoommo.

23Xale'i qooccanchi ihoo'n Keesammi Ayyaana neeyyatina amaxxi issaa Waa'i uwwukkaare aa'nnummi keen neesem Waa'ina oos ihimmaa ni orachchika gatimmaa ege'llinummuuyyi ni woronne qitinoommuulla.

24Neese gantummok ee neeyyatinnette. Kaba moo'amoo luwwi neeyyatayyo. Moo'amoo luwwa ayyi neeyyato issookko?

25Neese moo'nnumbee'i luwwa neeyyato issinummaa'lleensi eekka iyyaqqimminne egelloommo.

26Oo Keesammi Ayyaanim neese hoongoommaare hara'mmookko. Keesammi Ayyaan ixxi gagim suuminne kurakkeena xanakkambee'isinne ni bikkina qoxxisaa Waa'a uunxookko bagaan Waa'a uunxakkamisa neese lanqoommoyyo.

27Waa'i doo'llu minaadabina Keesammi Ayyaan Waa'a uunxookkok Waa'i sawwixxis ihu bikkina manni woda'nneka saarayyaa la'oo Waa'i Keesammi Ayyaa'nnekam sawwite la'ookko.

28Waa'a iittitam keeninaa ixxi sawwixxisanne weeshanto'i keeninaa Waa'i hundi luwwam eroommina issoo'isa lanqoommo.

29Waa'i gaassaatim doo'llu keeno ixxi Beet hagaranne daba'llitamisa issukko. Ee'isa issukkokim lobakat abbaayyuwwi lambe'enne Yesuus won ihoo'isinatte.

30Ixxi Beet hagaranne daba'llitamisa issu keenom weeshukko; weeshu keenom muccussukko; muccussu keenom lonsukko.

31Eehannata'i ka woshshi bikkina mayyinoommo? Waa'i niinninne maqir ihukkaa'lleensi niinninne uullixxameena ayyi xanookko?

32Ixxi Beetina qishixxoo'n niina hundinam higisaa uwwu Waa'i ixxi Beetinne maqire hundi luchchom uwwooyyonnihe?

33Waa'i doo'llu keeno kasasookkok ayyette? Waa'i muccussu keenonne

34oogatookkok ayyette? Ayyim oogatooyyo. Ni bikkina lehukkok, lehiinsim ki'ukkok, Waa'aannonnem makki kollonne afuurukkokii ni bikkinam Waa'a uunxookkokii Yesuus Kiristoosatte.

35Kiristoos iittiinsi neese annanni issookkok ayyette? Hawwonnihe? Te'im kichchechchannihe? Te'im yaayyanchannihe? Te'im sibaaronnihe? Te'im umba'adoomannihe? Te'im malaayyaam hawwonnihe? Te'im bisa'annihe?

36Keesammi Kitaabanne «Ki bikkina balli hundam lenoommo; durakkam gereebbisa inkaa xigammummo» yamamaa kitaabamukkane.

37Neese iittu Yesuus Kiristoosinne ee luwwi hundam kaa'nnoommo.

38Lehom ihuta'n te'im heechcham ihuta'n te'im Waa'i asse'amaanom ihuta'n te'im gassaanoom ihuta'n te'im kaba yoo luwwam ihuta'n te'im hanenne waaroo luwwam ihuta'n te'im malaayyaammuwwam ihuta'n

39te'im duunam ihuta'n te'im cebbam ihuta'n te'im qooccamu luwwi hundam ihuta'n mahim ni Moollanni Yesuus Kiristoosinne Waa'i neese iittu iittiinsi annanni isseena xanoobee'isa an la'aammo.

← Chapter 7 Jump to: Chapter 9 →