Titus 2

hadiyya

← Chapter 1 Jump to: Chapter 3 →

1Ihukkaarem at hanqo'i losaninne iittamoo losishsha losise.

2Goo'n lommanni gaga ege'llitamisa, sholle'llambee'isa, gaga ijaajaan ikkamisaa amma'nnatonne, iittonnee iyyaqqimmannee qoxxitamisaa losise.

3Ee'isam meenti lommannim ixxuwwi gaga Waa'ina annanni issito'oo keeno, hamtambee'i keeno, dimbisoo aggina biteesantobee'i keenoo er luwwa losissam keenoo ikkona losise.

4Oohim harde'i meenti ixxuwwi goonaa oosoo iittitam keeno,

5gaga ijaajjam keeno, muccur keeno, ixxuwwi mi'n abaroosina baxxam keeno, biijaalluwwaa ixxuwwi goonina ijaajantam keenoo ikkona losissona. Oohim Waa'i sagar gadamoobee'isinatte.

6Ee'isam harde'i goonim ixxuwwi gaga ijaajjamisa qoxxissaa soge.

7Luwwi hundannem eroka issimminne ki gaga kobi'llishshi issitaa moo'ise. Neese sabbam manni ni bikkina woccam jor woshshina maham mashka'a hoogga'a tuuttamisina ki losishshannem hanqo'an ikkittisa, hanqa woccoohan ikkittisa, lombi yoohan ihukkisaa at woccitti hanqo'i woshshi gadamoobee'an ihukkisaa moo'ise.

9Agid ixxuwwi moollanno'ina ijaajanchinne luwwi hundannem liiransitamisina, ixxuwwinne daba'llanta'a woccambee'isinaa

10game'llambee'isinaa losise. Ihukkaarem ixxuwwi er keenoo guullita'a amma'nnanto'oo keenoo ikkona. Ee'isinne Gatisaanchi Waa'ik losan luwwi hundannem lomba siixxoo'isa issitamo.

11Waa'i ixxeka eroomma moo'isukkok manni hundam gatiseenatte.

12Oo eroommim baaxiiloo ka uulli jor mixanoo langaa gaga ijaajimminnee xabbeenoominnee Waa'ina gallaa ka uullanne hee'nnoommisinatte.

13Lombinne waaroo lob ni Waa'a, oohim neese Gatisaanchi Yesuus Kiristoosika waaro egelloommuulla. Oohim neese egelloommi maasse'amaakkoo neeyyato.

14Boqqoom hundiinsim neese gatisaa ixxi gagina muccur manni issaa er luwwa issineena minxoommisina ixxi gaga niina higisaa uwwukko.

15Ee keeno losise. Kiina uwwamu malaayyi hundinnem manna qoxxisee axeeree. Eehannonne ayyim keese gadoone.

← Chapter 1 Jump to: Chapter 3 →