2 Corinthians 13

Hebrew Bible (DHNT) 1885 - Delitzsch's Hebrew New Testament

← Chapter 12 Jump to:

1זאת הפעם השלישית אשר אבוא אליכם על־פי שנים עדים או שלשה עדים יקום כל־דבר׃

2מקדם אמרתי בהיותי אצלכם בפעם השנית ומקדם אני אמר וכתב עתה ברחקי מכם לאשר חטאו לפני מזה ולכל הנשארים כי־בשובי לבוא לא אחוס׃

3יען בקשכם לבחן את־המשיח המדבר בי אשר איננו חלש לכם כי אם־גבור הוא בתוככם׃

4כי אם־גם־נצלב בחלשה אכן חי הוא בגבורת אלהים ואם גם־חלשים בו אנחנו אכן נחיה עמו בגבורת אלהים לנגדכם׃

5נסו־נא אתכם אם־באמונה אתם בחנו אתכם או האינכם ידעים את־נפשכם כי ישוע המשיח בכם אם־לא כי־נמאסים אתם׃

6אבל אקוה כי תדעו אשר אנחנו איננו נמאסים׃

7ואני מתחנן אל־האלהים אשר לא־תעשו כל־רע לא למען נראה אנחנו נאמנים כי אם־למען תעשו אתם את־הטוב ואנחנו נהיה כנמאסים׃

8כי אין אנחנו יכולים לעשות מאומה נגד האמת כי אם־בעד האמת׃

9כי נשמח אם־חלשים אנחנו ואתם גבורים ועל־זאת גם־נתפלל על־אשר תכוננו׃

10ובעבור זאת כתבתי את־אלה בהיותי ברחוק למען אשר־לא אצטרך בקרבי אליכם לדבר אתכם משפטים לפי הרשות אשר נתנה לי האדון לבנות ולא להרוס׃

11ובכן אחי שמחו והתכוננו התנחמו ויהי לכם לב אחד אהבו השלום ואלהי האהבה והשלום יהי עמכם׃

12שאלו לשלום איש את־רעהו בנשיקה הקדושה הקדושים כלם שאלים לשלומכם׃

13חסד האדון ישוע המשיח ואהבת האלהים והתחברות רוח הקדש עם־כלכם אמן׃

← Chapter 12 Jump to: