Nahum 1

Hebrew Bible (MHB) 2010

Jump to: Chapter 2 →

1מַשָּׂא נִינְוֵה; סֵפֶר חֲזוֹן נַחוּם הָאֶלְקֹשִׁי׃

2אֵל קַנּוֹא וְנֹקֵם יְהוָה, נֹקֵם יְהוָה וּבַעַל חֵמָה; נֹקֵם יְהוָה לְצָרָיו, וְנוֹטֵר הוּא לְאֹיְבָיו׃

3יְהוָֹה, אֶרֶךְ אַפַּיִם וּגְדוֹל־ (וּגְדָל־) כֹּחַ, וְנַקֵּה לֹא יְנַקֶּה; יְהוָה, בְּסוּפָה וּבִשְׂעָרָה דַּרְכּוֹ, וְעָנָן אֲבַק רַגְלָיו׃

4גּוֹעֵר בַּיָּם וַיַּבְּשֵׁהוּ, וְכָל־הַנְּהָרוֹת הֶחֱרִיב; אֻמְלַל בָּשָׁן וְכַרְמֶל, וּפֶרַח לְבָנוֹן אֻמְלָל׃

5הָרִים רָעֲשׁוּ מִמֶּנּוּ, וְהַגְּבָעוֹת הִתְמֹגָגוּ; וַתִּשָּׂא הָאָרֶץ מִפָּנָיו, וְתֵבֵל וְכָל־יֹשְׁבֵי בָהּ׃

6לִפְנֵי זַעְמוֹ מִי יַעֲמוֹד, וּמִי יָקוּם בַּחֲרוֹן אַפּוֹ; חֲמָתוֹ נִתְּכָה כָאֵשׁ, וְהַצֻּרִים נִתְּצוּ מִמֶּנּוּ׃

7טוֹב יְהוָה, לְמָעוֹז בְּיוֹם צָרָה; וְיֹדֵעַ חֹסֵי בוֹ׃

8וּבְשֶׁטֶף עֹבֵר, כָּלָה יַעֲשֶׂה מְקוֹמָהּ; וְאֹיְבָיו יְרַדֶּף־חֹשֶׁךְ׃

9מַה־תְּחַשְּׁבוּן אֶל־יְהוָה, כָּלָה הוּא עֹשֶׂה; לֹא־תָקוּם פַּעֲמַיִם צָרָה׃

10כִּי עַד־סִירִים סְבֻכִים, וּכְסָבְאָם סְבוּאִים; אֻכְּלוּ, כְּקַשׁ יָבֵשׁ מָלֵא׃

11מִמֵּךְ יָצָא, חֹשֵׁב עַל־יְהוָה רָעָה; יֹעֵץ בְּלִיָּעַל׃ ס

12כֹּה אָמַר יְהוָה, אִם־שְׁלֵמִים וְכֵן רַבִּים, וְכֵן נָגֹזּוּ וְעָבָר; וְעִנִּתִךְ, לֹא אֲעַנֵּךְ עוֹד׃

13וְעַתָּה אֶשְׁבֹּר מֹטֵהוּ מֵעָלָיִךְ; וּמוֹסְרֹתַיִךְ אֲנַתֵּק׃

14וְצִוָּה עָלֶיךָ יְהוָה, לֹא־יִזָּרַע מִשִּׁמְךָ עוֹד; מִבֵּית אֱלֹהֶיךָ אַכְרִית פֶּסֶל וּמַסֵּכָה אָשִׂים קִבְרֶךָ כִּי קַלּוֹתָ׃ פ

Jump to: Chapter 2 →