1 Corinthians 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Gani, ang tinguhaon ninyo sa pag-angkon amo ang gugma. Kag sa nasiling ko na handuma ninyo ang espirituhanon nga mga hiyas, labi na gid ang hiyas sa pagwali sang pulong sang Dios.

2Ang nagahambal sa iban nga mga hambal wala nagahambal sa mga tawo, kundi sa Dios, tungod kay wala sing makaintiendi sa iya. Sa gahom sang Espiritu nagahambal sia sang tinago nga mga kamatuoran.

3Pero ang nagawali sang pulong sang Dios nagahambal sa mga tawo sa pagbulig sa ila, sa pagpabakod kag sa paglipay sa ila.

4Ang tawo nga nagahambal sa iban nga mga hambal nagapalig-on sang iya lamang kaugalingon, pero ang nagawali sang pulong sang Dios nagapalig-on sang bug-os nga iglesia.

5Kuntani, luyag ko nga tanan kamo makahambal sa iban nga mga hambal, pero luyag ko pa gid nga tanan kamo may hiyas sa pagwali sang pulong sang Dios. Kay ang tawo nga nagawali sang pulong sang Dios mas labi pa sang sa tawo nga nagahambal sa iban nga mga hambal, luas lang kon may yara nga makasaysay sang iya ginahambal, agod mapalig-on ang bug-os nga iglesia.

6Karon, mga utod, kon magkadto ako dira sa inyo kag maghambal ako sa iban nga mga hambal, ano ang pulos ko sa inyo? Wala gid bisan diutay, luas lang kon nagadala ako sa inyo sing mensahe halin sa Dios, ukon ihibalo, ukon pagwali sang pulong sang Dios, ukon pagtudlo.

7Bisan ang mga instrumento sa musika nga wala sing kabuhi, subong sang plawta ukon arpa, kon indi maathag ang pagtukar sang ila mga nota, ano ang pagkahibalo sang isa ka tawo sang tuno nga ginatukar?

8Kag kon ang panukar sang manugtrumpeta indi maathag, sin-o ang magaaman para sa inaway?

9Sa amo man nga bagay, ano ang pagkahangop sang isa ka tawo sang imo ginahambal kon nagahambal ka sa iban nga mga hambal? Pareho lang nga naghambal ka sa hangin!

10May madamo kag nagkalainlain nga mga linggwahe sa kalibutan kag ini sila tanan may kahulogan gid.

11Pero kon indi ako makaintiendi sang linggwahe nga ginahambal, para sa akon, ang tawo nga nagahambal sini dumoluong, kag para sa iya ako dumoluong man.

12Tungod kay nagahandom kamo sa pag-angkon sang mga hiyas sang Espiritu, labaw sa tanan tinguhaa ninyo ang paggamit sang mga hiyas nga nagapalig-on sang iglesia.

13Gani, ang tawo nga nagahambal sa iban nga mga hambal, dapat magpangamuyo nga hatagan sia sing hiyas sa pagsaysay kon ano ang kahulogan sini.

14Kay kon nagapangamuyo ako sa iban nga mga hambal, ang akon espiritu nagapangamuyo matuod, pero ang akon hunahuna wala sing bahin sini.

15Ano karon ang himuon ko? Magapangamuyo ako sa akon espiritu, pero magapangamuyo man ako sa akon hunahuna. Magakanta ako sa akon espiritu, pero magakanta man ako sa akon hunahuna.

16Kon ang imo espiritu lang ang nagapasalamat sa Dios, ano ang pagsiling “Kabay pa” sang ordinaryo nga tawo nga nagatambong sa imo pangamuyo sang pagpasalamat, kay ang imo ginasiling wala niya maintiendihi?

17Bisan pa maayo gid ang imo pangamuyo sa pagpasalamat sa Dios, pero ang iban nga tawo indi mabuligan.

18Nagapasalamat ako sa Dios nga makahambal ako sing sobra pa sa inyo sa iban nga mga hambal.

19Pero sa pagtilipon sang mga tumoluo sa pagsimba mas maayo pa nga maghambal ako sing lima lang ka tinaga nga maintiendihan, agod matudloan ko ang iban, sang sa linibo ka mga tinaga sa iban nga mga hambal.

20Mga utod, indi kamo magbinatabata sa inyo nga panghunahuna. Magpakabata kamo kon nahanungod sa mga kalautan, pero magpakahamtong kamo sa inyo panghunahuna.

21Nasulat sa mga Kasulatan: “Paagi sa mga tawo nga nagahambal sang iban nga mga hambal, paagi sa mga bibig sang mga dumoluong magahambal ako sa akon katawhan, pero, wala sapayan sini, indi sila magpamati sa akon, siling sang Ginoo.”

22Gani, ang hiyas sa paghambal sa iban nga mga hambal tanda para sa mga di-tumoluo kag indi sa mga tumoluo, pero ang hiyas sa pagwali sang pulong sang Dios tanda para sa mga tumoluo, kag indi sa mga di-tumoluo.

23Gani, kon magtipon ang tanan nga tumoluo kag ang tagsatagsa maghambal sa iban nga mga hambal, kag kon may magsulod nga iban nga tawo ukon di-tumoluo, indi bala sila magasiling nga mga buang kamo tanan?

24Pero kon ang tanan nagawali sang pulong sang Dios, kag kon may magsulod nga di-tumoluo ukon iban nga tawo, magakilala sia sang iya sala tungod sang iya nabatian. Ang tanan nga butang nga iya nabatian magahukom sa iya,

25ang iya tinago nga mga panghunahuna mapahayag, kag magaluhod sia sa pagsimba sa Dios nga nagasiling, “Matuod gid nga ang Dios yari diri kaupod ninyo!”

26Mga utod, ano bala ang buot ko silingon? Sa inyo pagtipon sa pagsimba, ang isa handa sa pagkanta, ang isa sa pagpanudlo, ang isa sa pagpahayag sang kamatuoran halin sa Dios, ang isa sa paghambal sang pulong sang Dios sa iban nga mga hambal, kag ang isa pa gid sa pagsaysay kon ano ang kahulogan sang amo nga mga hambal. Ang tanan dapat himuon ninyo sa pagpalig-on sang iglesia.

27Kon may yara nga luyag maghambal sa iban nga mga hambal, duha ukon tatlo lang ang dapat maghambal sing bulosbulos, kag ang isa dapat magsaysay sang ginhambal.

28Pero kon wala sing isa nga makasaysay, ti, maghipos ang tagsatagsa kag maghambal kamo sa inyo kaugalingon lamang kag sa Dios.

29Ang duha ukon tatlo nga ginhatagan sang Dios sang inughambal dapat maghambal, samtang ang iban magbinagbinag sang ginhambal.

30Pero sa inyo pagtipon kon may isa sa inyo nga ginhatagan sang Dios sang mensahe, ang nagahambal dapat mag-untat.

31Tanan kamo sarang makawali sang pulong sang Dios, sing tag-isaisa, agod nga ang tanan makatuon kag mapalig-on.

32Yara sa mga manugwali ang gahom sa paggamit sing nagakaigo sang hiyas sa pagwali sang pulong sang Dios.

33Kay ang Dios indi Dios sang kagamo, kundi sang kahusayan. Subong sang sa tanan nga iglesia sang mga tumoluo,

34ang mga babayi dapat maghipos sa mga pagtilipon sang iglesia. Indi tugot sa ila ang paghambal, kundi dapat magmasinulondon sila subong sang ginasiling sang Kasugoan.

35Kon may inugpamangkot sila, dapat sa balay lang nila sila magpamangkot sa ila mga bana. Makahuloya para sa isa ka babayi ang paghambal sa pagtilipon sang iglesia.

36Ano, sa inyo bala naghalin ang pulong sang Dios? Ukon sa inyo lang bala ini nag-abot?

37Kon may yara nga nagahunahuna nga sia mensahero sang Dios ukon sia may espirituhanon nga hiyas, dapat sia magkilala nga ang ginasulat ko sa inyo sugo sang Ginoo.

38Pero kon wala sia nagasapak sini, indi ninyo sia pagsapaka.

39Gani, mga utod ko, handuma ninyo ang pagwali sang pulong sang Dios, pero indi ninyo pagdumilii ang paghambal sa iban nga mga hambal.

40Dapat himuon ninyo ang tanan nga butang sa nagakaigo kag mahusay nga paagi.

← Chapter 13 Jump to: Chapter 15 →