1 Peter 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sa amo man nga bagay, kamo nga mga asawa dapat magpasakop sa inyo mga bana, agod nga kon ang iban sa ila wala nagatuo sa pulong sang Dios, madala ninyo sila sa pagtuo paagi sa inyo pagginawi. Wala na kinahanglan nga maghambal pa kamo,

2tungod kay makita nila kon daw ano kaputli kag katalahuron ang inyo pagginawi.

3Indi kamo maggamit sing mga pagpatahom nga sa gwa lamang, subong abi sang sobra nga pagpahinar sang inyo buhok, ukon paggamit sing mga alahas ukon sa inyo pagbayu.

4Sa baylo, ang inyo katahom dapat makit-an sa inyo kinaugali, ang wala nagabalhin nga katahom sang malulo kag mahipos nga panimuot, nga amo ang labing malahalon sa panulok sang Dios.

5Kay ang mainampuon nga mga babayi sang una nga panag-on nga nagsalig sa Dios, nagpatahom sang ila kaugalingon paagi sa pagpasakop sa ila mga bana.

6Kaangay sini si Sara. Gintuman niya si Abraham kag gintawag niya sia nga iya agalon. Karon mga anak niya kamo kon nagahimo kamo sing maayo kag wala nagakahadlok sang bisan ano.

7Subong man kamo nga mga bana, sa inyo pagkabuhi upod sa inyo mga asawa, dapat ninyo kilalahon nga sila mga maluya. Tahura ninyo sila, tungod kay magabaton man sila upod sa inyo sang dulot sang kabuhi halin sa Dios. Himua ninyo ini, agod nga wala sing may magsablag sa inyo mga pangamuyo.

8Sa katapusan: tanan kamo dapat mag-isa sa inyo mga panghunahuna kag balatyagon. Maghigugmaanay kamo subong mga mag-utod, magmalulo kag magmapainuboson sa isa kag isa.

9Indi ninyo pagbalusi ang malaut sing malaut, ukon ang pagpasipala sing pagpasipala. Sa baylo balusi ninyo sing pagpakamaayo, tungod kay magabaton kamo sing kaayuhan nga ginsaad sang Dios sang pagtawag niya sa inyo.

10Ang kasulatan nagasiling: “Ang bisan sin-o nga luyag magkabuhi sing malipayon kag makakita sang masadya nga mga inadlaw, indi dapat maghambal sing malain kag indi na magbinutig.

11Dapat niya bayaan ang malaut, kag maghimo sing maayo, dapat niya pangitaon ang paghidait kag tinguhaon nga matigayon ini.

12Kay ang Dios nagabantay sang matarong kag nagapamati sang ila mga pangamuyo, pero batok sia sa nagahimo sing malaut.”

13Sin-o bala ang magahalit sa inyo, kon nagatinguha kamo sa paghimo sing maayo?

14Pero bisan nga dapat pa kamo mag-antos tungod kay nagahimo kamo sing maayo, daw ano kamalipayon sa inyo! Indi kamo magkahadlok sa bisan kay sin-o, kag indi kamo magpalibog.

15Pero pasidunggi ninyo si Cristo sa inyo mga tagipusoon subong inyo Ginoo. Maghanda kamo sa tanan nga tion sa pagsabat sa bisan kay sin-o nga nagapangayo sa inyo sing paathag nahanungod sang paglaom nga yara sa inyo.

16Pero himua ninyo ini nga may kalulo kag pagtahod. Tipigi ang inyo mga konsensya nga magmatinlo, agod nga kon insultohan kamo, ang nagapakamalaut sang inyo maayo nga pagginawi subong mga sumolunod ni Cristo, magabatyag sing kahuya sa ila ginasiling.

17Kay mas maayo pa nga mag-antos kamo tungod sang inyo paghimo sing maayo, kon amo gid man ini ang kabubot-on sang Dios, sang sa maghimo kamo sing malain.

18Kay si Cristo mismo napatay sing makaisa gid lang tungod sang mga sala, isa ka matarong nga tawo para sa mga di-matarong, agod nga madala niya kamo sa Dios. Ginpatay sia sa lawas, pero ginbuhi sa espiritu,

19kag sa iya espiritu nagkadto sia kag nagwali sa binilanggo nga mga espiritu.

20Ini sila amo ang mga espiritu sang mga wala magtuman sa Dios, sang paghulat sang Dios sing mapainulobon sa sadtong mga adlaw sang si Noe nagahimo sang iya arka. Pila gid lang ang naluwas sa anaw, ang walo nga didto sa arka.

21Ini nga tubig amo ang simbulo sang pagbautiso, nga karon nagaluwas sa inyo, indi sa paghugas sang mga higko sa lawas, kundi paagi sa saad nga ginhimo sa Dios halin sa matinlo nga konsensya. Ang pagbautiso nagaluwas sa inyo paagi sa pagkabanhaw ni Jesu-Cristo,

22nga nagpalangit kag nagapungko sa tuo sang Dios, nga nagagahom sang tanan nga mga anghel kag sang langitnon nga mga awtoridad kag mga gahom.

← Chapter 2 Jump to: Chapter 4 →