1 Thessalonians 1

Ilonggo (Maayong Balita nga Biblia (2012))

Jump to: Chapter 2 →

1Ako si Pablo, kaupod ni Silas, kag ni Timoteo, nagasulat sa inyo nga mga katapo sang iglesia sa Tesalonica, nga iya sang Dios nga Amay kag ni Ginoong Jesu-Cristo. Kabay nga ang pagpakamaayo kag paghidait manginyara sa inyo.

2Nagapasalamat kami sa gihapon sa Dios tungod sa inyo tanan, kag ginasambit namon kamo sa gihapon sa amon mga pangamuyo.

3Kay ginadumdom namon sa atubang sang aton Dios kag Amay kon daw ano ang pagbutang ninyo sa buhat sang inyo pagtuo, kon daw ano ang pagpangabudlay ninyo sing tudotudo tungod sang inyo paghigugma kay Cristo kag kon daw ano kalig-on sang inyo paglaom sa aton Ginoong Jesu-Cristo.

4Nakahibalo kami, mga kautoran, nga ang Dios nagahigugma sa inyo kag nagpili sa inyo nga mangin-iya.

5Kay gindala namon ang Maayong Balita sa inyo, indi lamang sa mga pulong, kundi sa gahom man kag sa Espiritu Santo, kag sa bug-os nga pagsalig sa kamatuoran sini. Nakahibalo kamo sang amon pagginawi sang kaupod pa kami ninyo, kay yadto para sa inyo kaayuhan.

6Gin-ilog ninyo kami kag ang Ginoo, kag bisan pa nga nag-antos gid kamo, ginbaton ninyo ang pulong sang Dios sa daku nga kalipay nga nagagikan sa Espiritu Santo.

7Gani nanginsulondan kamo sa tanan nga mga tumoluo sa Macedonia kag sa Acaya.

8Kay ang mensahe nahanungod sa Ginoo naglapnag halin sa inyo indi lamang sa Macedonia kag sa Acaya, kundi ang balita nahanungod sang inyo pagtuo sa Dios naglapnag sa bisan diin ngalugar. Gani wala na sing kinahanglan nga maghambal pa kami kay ang mga tawo nakabati na.

9Tanan yadto nga mga tawo nagasugid kon daw ano ang pagbaton ninyo sa amon, sang pagduaw namon dira sa inyo, kag kon daw ano ang pagbiya ninyo sa mga diosdios. Karon nagaalagad kamo sa matuod kag buhi nga Dios,

10kag nagahulat sa iya Anak nga magaabot halin sa langit, ang iya Anak nga si Jesus nga iya ginbanhaw sa mga minatay, kag magaluwas sa aton sa magaabot nga kaakig sang Dios.

Jump to: Chapter 2 →