2 John 1

Ilonggo (Maayong Balita nga Biblia (2012))

Jump to:

1Ako, ang Tigulang sang iglesia, nagasulat sa imo talahuron nga Babayi kag sa imo mga anak, nga akon gid ginahigugma. Indi lamang ako, kundi ang tanan nga nakahibalo sang kamatuoran nagahigugma sa imo,

2tungod kay ang kamatuoran yari sa aton kag magapabilin sa aton sa walay katapusan.

3Kabay nga ang Dios nga Amay kag si Jesu-Cristo, ang Anak sang Amay, maghatag sa aton sing pagpakamaayo, kaluoy kag paghidait. Kabay nga mangin-aton ini sa kamatuoran kag gugma.

4Daku gid ang akon kalipay sa paghibalo nga ang pila sang imo mga anak nagakabuhi sa kamatuoran, suno sa ginsugo sa aton sang Amay.

5Gani, nagapangabay ako sa imo, talahuron nga Babayi: maghigugmaanay kita tanan. Indi bag-o nga sugo ang ginasulat ko sa imo, kundi ini nga sugo aton nabaton halin pa sa ginsugoran.

6Ini nga gugma nga ginasiling ko, nagakahulogan nga dapat kita magkabuhi nga nagatuman sang mga sugo sang Dios. Ang sugo nga inyo tanan nabatian halin sa ginsugoran amo ini: dapat kamo magkabuhi sa gugma.

7Madamo na nga mga manugpatalang ang naglapnag sa bug-os nga kalibutan, mga tawo nga wala nagakilala nga si Jesu-Cristo nagpakatawo. Ini nga sahi sang tawo manugpatalang kag Kaaway ni Cristo.

8Gani mag-andam kamo, agod indi ninyo madula ang inyo ginpangabudlayan, kundi magabaton kamo sang bug-os nga padya.

9Ang bisan sin-o nga wala nagasunod sang mga pagtulon-an ni Cristo, kundi nagatudlo sing sobra pa sini, ang Dios wala sa iya. Ang bisan sin-o nga nagasunod sini nga pagtulon-an, yara sa iya ang Amay kag ang Anak.

10Gani, kon may magkadto sa inyo nga wala nagadala sini nga pagtulon-an indi ninyo sia pagbatuna sa inyo balay, kag indi sia pagsapaka.

11Kay ang nagasapak sa iya mangin-umalambit sang mga kalautan nga iya ginahimo.

12Madamo pa kuntani ang akon inugsiling sa inyo, pero indi ko na lang ini pag-isulat, kundi nagalaom ako nga maduaw ko kamo kag makapakigsugilanon sa inyo agod manginbug-os ang aton kalipay.

13Ang mga anak sang imo utod nga Babayi nga pinili sang Dios, nagaabiabi sa imo.

Jump to: