Genesis 37

Ilonggo (Maayong Balita nga Biblia (2012))

← Chapter 36 Jump to: Chapter 38 →

1Si Jacob nagpadayon sa pag-estar sa duta sang Canaan, sa diin ang iya amay nag-estar anay subong dumoluong.

2Amo ini ang maragtas sang panimalay ni Jacob. Si Jose nga nagaedad sing desi-siete ka tuig nagbantay sang mga karnero kag mga kanding upod sa iya mga utod nga lalaki nga mga anak ni Bilha kag Zilpa nga mga babayi sang iya amay. Ginsugiran niya ang iya amay sang malain nga mga butang nga ginahimo sang iya mga utod.

3Si Jacob nagpalangga kay Jose labaw sang sa tanan niya nga mga kabataan nga lalaki, tungod kay si Jose natawo sang tigulang na sia. Ginhimuan niya sia sing malaba nga bayu nga may malaba nga mga pako.

4Sang makita sang iya mga utod nga ang ila amay nagpalangga kay Jose sing labi pa sang sa ila, naakig gid sila sa ila utod kag indi maayo ang pagtamod nila sa iya.

5Isa ka adlaw si Jose nagdamgo, kag sang ginsugid niya ini sa iya mga utod naakig pa gid sila tapat sa iya.

6Nagsiling sia sa ila, “Pamatii ninyo ang damgo ko.

7Sa akon damgo, didto kita tanan sa uma nga nagapangbugkos sing mga uhay sang trigo. Sa hinali ang akon binugkos nagbangon kag nagtindog sing tadlong. Ang inyo mga binugkos naglibot kag nagsaludo sa akon binugkos.”

8Ang iya mga utod nagsiling, “Nagahunahuna ka bala nga magahari ka kag magagahom sa amon?” Gani, naakig pa gid sila sa iya tungod sang ginsugid niya nahanungod sang iya mga damgo.

9Dayon si Jose nagdamgo naman kag ginsugiran niya ang iya mga utod nga lalaki. Nagsiling sia, “May isa naman ako ka damgo, kag sa sini nga damgo nakita ko ang adlaw, ang bulan kag ang onse ka mga bituon nga nagasaludo sa akon.”

10Ginsugid man niya ini nga damgo sa iya amay, kag ang iya amay nagsaway sa iya nga nagasiling: “Ano man ina nga damgo? Nagahunahuna ka bala nga ang imo iloy, ang imo mga utod nga lalaki, kag ako magasaludo sa imo?”

11Ang mga utod nga lalaki ni Jose nahisa gid sa iya, pero ang iya amay nagpanghunahuna sing madalom nahanungod sini nga butang.

12Isa ka adlaw sang pagkadto sang mga utod nga lalaki ni Jose sa Siquem sa pag-atipan sang mga hayop sang ila amay,

13si Jacob nagsiling kay Jose, “Ang imo mga utod nagaatipan sang mga hayop sa Siquem. Maghimos ka, kay paapason ko ikaw sa ila.” Si Jose nagsabat, “Sigi tay.”

14Ang iya amay nagsiling sa iya, “Lakat ka kag tan-awa kon maayo man ang imo mga utod kag ang mga hayop. Dayon balik ka diri kag sugiri ako.” Gani ginpadala sia sang iya amay halin sa Kapatagan sang Hebron. Sang pag-abot ni Jose sa Siquem,

15may isa ka tawo nga nakakita sa iya nga nagadalangdalang sa latagon. Ginpamangkot sia sang tawo, “Ano bala ang ginapangita mo?”

16Nagsabat sia, “Nagapangita ako sang akon mga utod nga lalaki nga nagapahalab sang ila mga panong. Mahimo bala masugiran mo ako kon diin sila?”

17Ang tawo nagsabat, “Nakahalin na sila. Nabatian ko sila nga nagsiling nga makadto sila sa Dotan.” Gani, si Jose nag-apas sa iya mga utod nga lalaki kag nakita niya sila sa Dotan.

18Sang malayo pa sia, nakita na nila sia, kag sang wala pa sia makaabot, nagplano sila sa pagpatay sa iya.

19Nagsiling sila sa isa kag isa, “Yara nagapadulong ang paladamgo.

20Dali kamo, patyon ta sia kag ihulog ang iya bangkay sa isa sining mamala nga mga bubon kag masiling lang kita nga may talunon nga sapat nga nagpatay sa iya. Dayon tan-awon ta kon ano ang maabutan sang iya mga damgo.”

21Pagkabati ni Ruben, gintinguhaan niya ang pagluwas kay Jose sa ila. Nagsiling sia, “Indi naton sia pagpatyon.

22Sa baylo nga patyon ninyo sia, ihulog lang ninyo sia sa sini nga bubon sa desierto, pero indi ninyo sia pagsakita.” Ginsiling niya ini kay nagaplano sia sa pagluwas kay Jose agod makabalik sia sa iya amay.

23Sang makaabot si Jose sa iya mga utod, gin-uba nila ang iya malaba nga bayu nga may malaba sing mga pako.

24Gindakop nila sia kag ginhulog sa bubon nga wala sing tubig.

25Sang nagakaon sila, sa hinali nakita nila ang grupo sang Ismaelinhon nga nagapanglakaton halin sa Galaad pakadto sa Ehipto. Ang ila mga kamelyo kargado sing mga pahumot, ihalaplas, kag mira.

26Si Juda nagsiling sa iya mga utod, “Ano ang aton mapulos kon patyon naton ang aton utod kag tagutaguon ta ang iya kamatayon?

27Ibaligya lang naton sia sa sining mga Ismaelinhon. Kon amo ini ang himuon ta, indi pa naton sia masakit, kon sa bagay, aton man sia utod, aton unod kag dugo.” Ang iya mga utod nagsugot man,

28kag sang pag-agi sang mga negosyante nga Midianhon, ginbatak si Jose sang iya mga utod halin sa bubon, kag ginbaligya sia sing baynte ka bilog nga mga pilak sa mga Ismaelinhon kag gindala sia sa Ehipto.

29Sang pagbalik ni Ruben sa bubon, kag nasapwan niya nga wala na didto si Jose, gingisi niya ang iya bayu sa kasubo.

30Nagbalik sia sa iya mga utod kag nagsiling, “Ang bata wala na didto! Ano na karon ang himuon ko?”

31Dayon nagpatay sila sing kanding, kag gintum-oy nila sa dugo ang malaba nga bayu ni Jose.

32Gindala nila ang bayu sa ila amay kag nagsiling, “Nakita namon ini! Tan-awa kon iya ini sang imo anak.”

33Nakilala niya ini kag nagsiling, “Huo, bayu ini sang akon anak. Ginpatay sia sang talunon nga sapat. Ang akon anak nga si Jose ginkusnit sang sapat!”

34Gingisi ni Jacob ang iya bayu kag nagbayo sing sako sa pagpakita sang iya kasubo. Naglalaw sia sa iya anak sa malawig nga mga inadlaw.

35Ang tanan niya nga mga anak nga lalaki kag babayi naglipay sa iya, pero indi sia luyag nga lipayon, kundi nagsiling sia, “Magalalaw ako sa akon anak tubtob manginkaupod ako niya sa kalibutan sang mga patay.” Gani, nagpadayon sia sa paglalaw sa iya anak nga si Jose.

36Sa pihak nga bahin, didto sa Ehipto ginbaligya sang mga Midianhon si Jose kay Potifar, ang kapitan sang mga gwardya sa palasyo nga isa sang mga opisyales sang hari.

← Chapter 36 Jump to: Chapter 38 →