Habakkuk 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang mensahe nga ginpahayag sang Ginoo kay Habakuk nga propeta.

2O Ginoo, daw ano pa kadugay ang akon pagpanawag sa pagpangayo sing bulig kag mamati ka, kag magluwas sa amon gikan sa kapintas sang amon kaaway?

3Ngaa ginapakita mo sa akon ini nga inhustisya kag kalautan? Ang kalaglagan kag pagpamintas yara sa palibot ko, kag may inaway kag binaisay bisan diin.

4Ang kasugoan maluya kag wala pulos, kag ang matarong nga paghukom wala ginahimo. Ang mga malaut nagalikop sa mga matarong, kag ang katarungan ginapatiko.

5Dayon ang Ginoo nagsiling sa iya mga tawo, “Padayuna ang pagbantay sang mga pungsod sa palibot ninyo, kag matingala kamo sang inyo makita. May himuon ako nga indi kamo magpati kon makabati kamo nahanungod sini.

6Himuon ko nga maggamhanan ang mga taga-Babilonia, inang mapintas kag wala nagapahimuyong nga mga tawo. Magakadto ang ila mga soldado sa iban nga bahin sang kalibutan sa pag-agaw sang iban nga mga duta.

7Nagdala sila sing kahadlok kag kakugmat kag sa ila bugal sila nagahunahuna nga ang ila tanan ginahimo matarong.

8“Ang ila mga kabayo mas madasig pa sang sa mga leopardo, mas mapintas pa sang sa gutom nga mga lobo. Ang ila mga soldado nga nagasakay sa kabayo nagaabot halin sa malayo nga mga kadutaan, ang ila mga kabayo daw wala nagadapat sa duta. Daw mga agila sila nga nagasulip sa pagdagit sang ila kalan-on.

9“Ang ila mga soldado nagaabanse sa pagpang-agaw sa pakusog nga paagi, kag ang tagsatagsa ginakugmat samtang nagapadulong sila. Ang ila nadakpan pareho kadamo sang balas.

10Ginayaguta nila ang mga hari kag ginakadlawan ang mataas nga mga opisyales. Wala sing pamakod nga makasagang sa ila. Nagatumpok sila sing duta sa pamakod kag ginaagaw nila ini.

11Dayon nagasalakay sila kaangay sang hangin kag nangindulaan, ining mga tawo nga ang ila gahom amo ang ila dios.”

12O Ginoo, sa gihapon ikaw Dios. Ikaw akon Dios, balaan kag walay katubtoban. Ginoo, Dios nga mangangapin nakon, ginpili mo ang mga taga-Babilonia kag ginpabakod mo sila agod masilutan nila kami.

13Pero makabatas ka man sa pagtan-aw sining indi masaligan kag malaut nga mga tawo? Ang imo mga mata balaan nga indi makatulok sa malaut, kag indi ikaw makaagwanta sa pagtan-aw sang mga tawo nga nagahimo sing sayop. Gani, ngaa nagahipos ka samtang ginalaglag nila ang mga tawo nga mas matarong pa sang sa ila?

14Makabatas ka man bala magkabig sa mga tawo kaangay sang isda ukon kaangay sang mga sapatsapat nga wala sing may nagadumala sa ila?

15Ang mga taga-Babilonia nagadakop sang mga tawo paagi sa mga taga nga daw mga isda lang sila. Ginapukot nila sila kag nagasinggit sila sa kalipay tungod sang ila nadakpan!

16Ginasimba nila kag ginadulotan sing mga halad ang ila mga pukot nga daw kasubong bala nga mga dios ini, tungod kay ang ila mga pukot nagahatag sa ila sang labing maayo nga mga butang.

17Gamiton bala nila ang ila mga espada sa walay katubtoban, kag magpadayon sa pagpanglaglag sang mga pungsod sa wala sing kaluoy?

Jump to: Chapter 2 →