James 1

Ilonggo (Maayong Balita nga Biblia (2012))

Jump to: Chapter 2 →

1Ako si Santiago, isa ka alagad sang Dios kag ni Ginoong Jesu-Cristo, nagaabiabi sa tanan nga mga katawhan sang Dios nga nag-alaplaag sa bug-os nga kalibutan.

2Mga utod ko, kabiga ninyo nga mapalaron gid kamo kon ang tanan nga sahi sang mga pagtilaw mag-abot sa inyo,

3kay nakahibalo kamo nga kon ang inyo pagtuo magdaog sa pag-atubang sina nga mga pagtilaw, ang resulta sina amo nga manginmalig-on kamo.

4Pat-ura ninyo nga ini nga kalig-on magpadayon, nga wala sing pag-untat, agod nga manginhimpit kamo kag manginbug-os nga wala sing kakulangan.

5Pero kon may yara sa inyo nga kulang sa kaalam, dapat sia magpangamuyo sa Dios, kag ang Dios magahatag sini sa iya, tungod kay ang Dios maalwan kag nagahatag sing bugana sa tanan.

6Pero kon kamo nagapangamuyo, dapat kamo magtuo kag indi gid kamo magpangduhaduha. Kay ang bisan sin-o nga nagapangduhaduha kasubong sang balod sa dagat nga ginapalid kag ginahuyop sang hangin.

7Ina nga sahi sang tawo wala sang tinindugan kag indi pat-ud ang iya ginahimo, gani indi sia dapat maghunahuna nga sia may pagabatunon nga bisan ano halin sa Ginoo.

9Ang imol nga utod dapat magkalipay kon ang Dios magbayaw sa iya,

10kag ang manggaranon nga utod dapat man magkalipay kon ang Dios magpaubos sa iya. Kay ang manggaranon magataliwan kaangay sang bulak sa latagon.

11Ang adlaw nagataas nga may masingkal nga kainit, kag nagalaya sang tanom; ang iya bulak nagakahulog kag ang iya katahom madula. Subong man, ang manggaranon nga tawo malaglag samtang masako sia sa iya mga hilikuton.

12Malipayon ang tawo nga matutom sa gihapon bisan ginatilawan, kay sa tapos sia matilawan, ihatag sa iya ang kabuhi nga wala sang katapusan, ang balos nga gintigana sang Dios sa mga nagahigugma sa iya.

13Kon ang isa ka tawo ginasulay, indi sia dapat magsiling, “Ini nga pagsulay nagahalin sa Dios.” Kay ang Dios indi masulay sa paghimo sing malain, kag sia mismo wala nagasulay sa kay bisan sin-o.

14Pero ang tawo ginasulay kon ginaguyod sia kag ginasiod sang iya malaut nga handom.

15Dayon ang iya malaut nga handom nagapanamkon kag nagaanak sang sala. Kag kon ang sala hamtong na, nagadala ini sang kamatayon.

16Hinigugma ko nga mga utod, indi kamo magpabuang sa iban!

17Ang tagsa ka maayo nga dulot kag ang tagsa ka himpit nga bugay nagagikan sa langit; nagahalin ini sa Dios, nga Manunuga sang langitnon nga mga kapawa. Wala sia nagabaylo kag wala sia nagatalikod ukon nagabiya sa aton sa kadudulman.

18Sa iya kaugalingon nga kabubot-on, ginhimo niya kita nga iya mga anak paagi sa pulong sang kamatuoran, agod nga manginnahauna kita sa tanan niya nga mga tinuga.

19Dumdoma ninyo ini, hinigugma ko nga mga utod! Magmaabtik kamo sa pagpamati, pero indi kamo magdasudaso sa paghambal kag indi magmadali sa pagpangakig.

20Kay ang kaakig sang tawo indi makatuman sang matarong nga tinutuyo sang Dios.

21Gani, bayai ninyo ang inyo mahigko nga pamatasan kag ang inyo tanan nga malaut nga pagginawi. Itugyan ang inyo kaugalingon sa Dios kag batuna ninyo ang pulong nga iya ginatanom sa inyo mga tagipusoon, nga sarang makaluwas sa inyo.

22Indi pagbuanga ang inyo kaugalingon paagi sa pagpamati lamang sang iya mga pulong, kundi ibutang ninyo ini sa buhat.

23Kay ang bisan sin-o nga nagapamati sa pulong kag wala niya ini ginabutang sa buhat kaangay sa isa ka tawo nga nagapang-espeho kag makita niya ang iya kaugalingon nga kahimtangan.

24Ginatan-aw niya ang iya kaugalingon kag dayon nagalakat, kag sa gilayon malipatan niya kon daw ano ang iya hitsura.

25Pero ang bisan sin-o nga nagausisa sing maid-id sa himpit nga kasugoan nga nagahilway sa mga tawo, kag nagapadayon sa pagbantay sini, kag indi lamang nagapamati kag nagakalipat sini, kundi iya ini ginabutang sa buhat, ina nga tawo pagabendisyunan sang Dios sa iya mga ginahimo.

26Kon ang isa ka tawo nagahunahuna nga sia diosnon, pero wala nagapugong sang iya dila, ang pagtoluohan sini nga tawo wala sing pulos kag ginadayaan lang niya ang iya kaugalingon.

27Ang putli kag wala sing dagta nga pagtoluohan nga ginakabig sang Dios nga Amay amo ini: ang pagsapupo sa mga ilo kag sa mga balo sa ila pag-antos, kag sa pagtipig sang iya kaugalingon sa mga kagarukan sang kalibutan.

Jump to: Chapter 2 →