Obadiah 1

Ilonggo (Maayong Balita nga Biblia (2012))

Jump to:

1Amo ini ang mensahe ni Abdias, ang ginsiling sang Ginoo nga Gamhanan nahanungod sa pungsod sang Edom. Ginpadala sang Ginoo ang iya manugbalita sa mga kapungsoran, kag nabatian namon ang iya ginsiling: “Maghanda kamo! Malakat kita sa pag-away sang Edom!”

2Nagasiling ang Ginoo sa pungsod sang Edom, “Pahuyangon ko ikaw, kag ang tanan magatamay sa imo.

3Ang imo bugal nagdaya sa imo. Ang imo ginaestaran napamakuran sang bato, ang imo balay yara sa putokputokan sang mga kabukiran, gani nagasiling ka sa imo kaugalingon, ‘Sin-o gid bala ang makapukan sa akon?’

4Pero bisan ipahamtang mo ang imo balay subong kataas sang pugad sang agila, nga daw didto na sa mga kabituonan, pero akon ikaw sa gihapon butongon paidalom,” Amo ini ang ginsiling sang Ginoo.

5“Kon mag-abot ang mga makawat sa kagab-ihon, ila lamang ginakuha ang ila naluyagan. Kon ang mga tawo magpamupo sing ubas, may ginabilin gid sila nga salaghawan. Pero laglagon ikaw sing bug-os sang imo mga kaaway.

6Mga tawo sang Edom nga mga kaliwat ni Esau, ang inyo mga manggad, ginpanguha nila tanan.

7Gindayaan ka sang mga nagadampig sa imo, gintabog nila ikaw gikan sa imo pungsod. Ang mga tawo nga anay nagpakighidait sa imo karon naglutos sa imo. Yadtong mga abyan nga nagkaon upod sa imo, nagbutang sing siod sa pagdakop sa imo, kag naghambal nahanungod sa imo, ‘Diin na bala ang kaabtik niya sang una?’”

8Ang Ginoo nagasiling, “Sa adlaw nga silutan ko ang Edom, laglagon ko ang ila maabtik nga mga lalaki kag dulaon ko ang kaalam gikan sa Kabukiran ni Esau.

9Ang mga hangaway sang Teman magakurog sa kahadlok, kag ang tagsa ka soldado sa Bukid ni Esau pagapatyon.”

10“Tungod kay imo ginkawatan kag ginpamatay ang mga kaliwat ni Jacob nga imo mga pariente, laglagon ikaw kag pakahuy-an sa walay katapusan.

11Yara ikaw nga nagatan-aw sadto nga adlaw sang ginguba sang dumoluong nga mga kaaway ang ila mga pwerta. Subong ikaw kalain sadtong mga dumoluong nga naghakot sang manggad sang Jerusalem kag nagpartida sini sa ila kaugalingon.

12Indi ka kuntani magkalipay sa malain nga dinangatan sang imo mga pariente sa Juda. Wala ka kuntani magkasadya sa adlaw sang paglaglag sa ila. Wala ka kuntani magkadlaw sa mga kalisdanan nila.

13Wala ka kuntani magsulod sa siudad sang akon mga tawo sa pagkasadya sa ila pag-antos kag sa pag-agaw sang ila mga manggad sa adlaw sang paglaglag sa ila.

14Wala ka kuntani magtindog sa ginsang-an sang mga dalan sa pagdakop sang mga nagtinguha sa pagpalagyo. Wala mo kuntani sila pag-itugyan sa kaaway sa adlaw sang ila kalisdanan.

15“Madali na lang ang adlaw sa diin ako, ang Ginoo, magahukom sang tanan nga mga kapungsoran. O Edom, kon ano ang ginhimo mo pagahimuon man sa imo. Kon ano ang ginhatag mo, amo man ang pagabatunon mo.

16Ang akon mga tawo nakainom sa kupa sang mapait nga silot sa akon balaan nga bukid. Pero ang tanan nga mga kapungsoran sa palibot magainom sa kupa sang labi pa kalain nga silot, magainom sila sing madamo gid kag mawala.

17“Pero sa Bukid sang Sion, may mga tawo nga makapalagyo, kag ini nga lugar manginbalaan. Ang mga tawo ni Jacob magapanag-iya sang duta nga ila gid man palanublion.

18Ang mga tawo ni Jacob kag ni Jose manginkaangay sang kalayo, pagalaglagon nila ang mga tawo ni Esau, subong sang pag-upos sang kalayo sang dagami. Wala sing may mabilin sang kaliwat ni Esau. Ako, ang Ginoo, nagsiling sini.

19“Ang mga tawo gikan sa nabagatnan nga bahin sang Juda magapanag-iya sang Edom, ang yara sa nakatundan nga kunsaran sang mga bukid sa Juda magaagaw sang duta sang mga Filistinhon. Ang mga Israelinhon magapanag-iya sang kadutaan ni Efraim kag sang Samaria, kag ang mga tawo ni Benjamin magaagaw sang Galaad.

20Ang mga hangaway nga binihag gikan sa naaminhan nga bahin sang Israel magabalik kag magaagaw sang kadutaan sang Fenicia tubtob sa Sarepta sa aminhan. Ang mga bihag halin sa Jerusalem nga yara sa Separad magaagaw sang mga kabanwahanan sa nabagatnan nga bahin sang Juda.

21Ang madinalag-on nga mga lalaki sang Jerusalem magasalakay sa Edom kag magagahom sini. Kag ang Ginoo mismo manginhari.”

Jump to: