Hosea 3

Ilonggo APD 2022 (Ang Pulong Sang Dios)

← Chapter 2 Jump to: Chapter 4 →

1Nagsiling ang Ginoo sa akon, “Ipakita liwat ang imo gugma sa imo asawa bisan pa nga nagapanginlalaki siya. Higugmaa siya pareho sang paghigugma ko sa katawhan sang Israel bisan pa nga nagasimba sila sa iban nga mga dios paagi sa paghalad sang mga tinapay nga may mga pasas.”

2Gani ginbakal ko siya sa kantidad nga 15 ka bilog nga pilak kag apat ka sako nga barley.

3Kag ginsilingan ko siya, “Magpuyo ka upod sa akon sa malawig nga tion. Indi ka gid maghulid sa iban nga lalaki. Bisan ako indi anay maghulid sa imo.”

4Kay nagakahulugan ini nga sa malawig nga tion magakabuhi ang katawhan sang Israel nga wala sing hari, opisyal, halad, handumanan nga bato, espesyal nga panapton nga ginagamit sa pagpamakot, kag mga dios-dios.

5Pero sa ulihi magadangop sila liwat sa Ginoo nga ila Dios kag sa ila hari nga kaliwat ni David. Magapalapit sila sa Ginoo nga may pagtahod tungod sa iya kaayo.

← Chapter 2 Jump to: Chapter 4 →