1 Peter 3

Ilonggo (Ang Biblia (1982))

← Chapter 2 Jump to: Chapter 4 →

1Subong man kamo nga mga asawa, magpasakup sa inyo mga bana, agud nga, bisan ang wala nagatuman sang polong, madaug sila sa walay polong bangud sang paggawi sang ila mga asawa,

2kon sila nagatan-aw sang inyo matinahoron kag putli nga paggawi.

3Ang inyo pagpamuni dili manginsa gowa sa pagpanalapid sang bohok, sa puni nga bulawan, kag sa mga panapton,

4kondi manginsa tinago nga tawo sang tagiposoon, nga may dimadinulunton nga huluyason sang mapainubuson kag mahim-ong nga espiritu, nga bilidhon gid sa itololok sang Dios.

5Sa amo sang una ang balaan nga mga babayi nga naglaum sa Dios nagpamuni sang ila kaugalingon kag nagpasakup sa ila mga bana,

6subong nga si Sara nagtuman kay Abraham, nga nagatawag sa iya nga ginoo. Kag mga anak niya kamo karon kon nagahimo kamo sing matarung kag walay bisan ano nga nagapakugmat sa inyo.

7Subong man kamo nga mga bana, magkabuhi nga may patugsiling kaupud sang inyo mga asawa, nga nagahatag sing dungug sa babayi subong nga maluya, sanglit nga masigkamanunubli kamo sang bugay sang kabuhi, sa katuyoan nga indi masablagan ang inyo mga pangamuyo.

8Sa katapusan, kamo tanan, mag-isa sing espiritu, maloloy-on, mahigugmaon sa kauturan, malolo sa tagiposoon kag mapainubuson sing hunahuna.

9Dili magbalus sing malaut sa malaut ukon pasipala sa pasipala; kondi sa baylo magpakamaayo, kay sa sini gintawag kamo, agud nga makaagum kamo sing pagpakamaayo.

10Kay “Ang buut maghigugma sang kabuhi kag magtan-aw sing mga adlaw nga maayo, punggan niya ang iya dila gikan sa kalautan kag ang iya mga bibig nga indi maghambal sing limbong;

11maglikaw sia sa kalautan kag maghimo sing matarung; magpangita sia sang paghidait kag magsonod sini.

12Kay ang mga mata sang Ginoo nagatamud sa mga matarung, kag ang iya mga dulunggan nabuksan sa ila mga pangamuyo. Apang ang nawung sang Ginoo batok sa nagahimo sing malaut.”

13Karon sin-o bala ang magahalit sa inyo kon magmakugihon kamo tungud sa matarung?

14Apang bisan kon mag-antus kamo tungud sa pagkamatarung, manginbulahan kamo. Dili kamo mahadluk sa ila, ukon malisang,

15kondi pakabalaana sa inyo mga tagiposoon si Cristo subong nga Ginoo. Maghanda gihapon sa pag-apin sang paglaum nga yara sa inyo sa kay bisan sin-o nga magpamangkut sa inyo, apang himoa ini nga may pagpaubus kag pagtahud;

16kag tipigi nga matinlo ang inyo kaisipan, agud nga, kon pasipalahan kamo, mahuy-an ang mga nagapakamalaut sang inyo maayong paggawi kay Cristo.

17Kay maayo pa nga mag-antus kamo tungud sa paghimo sing matarung, kon ina amo ang kabubut-on sang Dios, sang sa paghimo sing sala.

18Kay si Cristo man napatay tungud sa mga sala sing makaisa gid lang, ang matarung tungud sa mga dimatarung, agud nga madala niya kita sa Dios, nga ginpatay sa unud apang ginbuhi sa espiritu;

19nga sa amo nagkadto sia kag nagwali sa mga espiritu sa bilanggoan,

20nga sang una wala magtuman, sang naghulat ang pagpailub sang Dios sa mga adlaw ni Noe, sang ginaaman ang arca, diin pila lamang ka tawo, kon sayoron, walo ang naluwas sa tubig.

21Ang bautismo nga kaangay sini, karon nagaluwas sa inyo, indi subong nga pagkuha sang higko gikan sa lawas kondi subong nga pakilooy sa Dios tungud sa matinlo nga kaisipan, paagi sa pagkabanhaw ni Jesu-Cristo,

22nga nagkadto sa langit kag yara sa too sang Dios, nga ang mga manugtunda, mga pagbulut-an, kag mga kagamhanan napasakup sa iya.

← Chapter 2 Jump to: Chapter 4 →