2 John 1

Ilonggo (Ang Biblia (1982))

Jump to:

1Ang tigulang tuhoy sa pinili nga talahuron nga babayi kag sa iya mga anak, nga ginahigugma ko sa kamatooran, kag indi ako lamang kondi sila tanan man nga nakakilala sang kamatooran,

2bangud sa kamatooran nga nagapabilin sa aton kag manginkaupud naton sa gihapon:

3Manginkaupud naton ang bugay, ang kalooy, kag ang paghidait nga gikan sa Dios nga Amay kag kay Jesu-Cristo nga Anak sang Amay, sa kamatooran kag gugma.

4Nagakalipay ako sing daku nga nasapwan ko ang pila sang imo mga anak nga nagagawi sa kamatooran, sono sa nabaton naton nga sogo gikan sa Amay.

5Kag karon ginapakilooy ko sa imo, talahuron nga babayi, indi subong nga daw nagsulat ako sa imo sing bag-ong sogo, kondi ang aton nabaton kutub sa ginsuguran, nga maghigugmaanay kita.

6Kag ini amo ang gugma, nga maggawi kita sono sa iya mga sogo; ini amo ang sogo, subong sang nabatian ninyo kutub sa ginsuguran, nga maggawi kamo sa gugma.

7Kay madamu nga madaya ang naglapnag sa kalibutan, mga tawo nga wala nagakilala nga si Jesu-Cristo naga-abut sa unud; amo ini ang madaya kag ang anticristo.

8Andami ninyo, nga indi ninyo madula ang aton ginpangabudlayan, kondi nga makadaug sing bug-os nga balus.

9Ang bisan sin-o nga nagalapas kag wala nagapabilin sa pagtolon-an ni Cristo wala sang Dios; ang nagapabilin sa pagtolon-an ni Cristo ang amo may iya sang Amay kag sang Anak.

10Kon may tawo nga nagaabut sa inyo kag wala nagadala sining pagtolon-an dili pagbatona sia sa inyo balay kag dili pag-abiabiha sia;

11kay ang nagaabiabi sa iya nagaambit sa iya mga buhat nga malaut.

12Bisan madamu ang inugsulat ko sa inyo, indi ako buut magsulat sini sa papel kag sa tinta, kondi nagalaum ako sa pagkara sa inyo kag pagpakighambal sa nawung kag nawung, agud nga ang aton kalipay mahimun-an.

13Ang mga anak sang imo utud nga babaying pinili nagaabiabi sa imo.

Jump to: