3 John 1

Ilonggo (Ang Biblia (1982))

Jump to:

1Ang tigulang tuhoy kay Gayo nga hinigugma, nga ginahigugma ko sa kamatooran.

2Hinigugma, ginapangamuyo ko nga magbugana ka sa tanan nga butang kag manginsa maayong panglawas; nahibaloan ko nga maayo nagabugana ang imo kalag.

3Kay nalipay ako sing daku sang pag-abut sang iban nga mga kauturan kag nagsaksi sila sa kamatooran sang imo kabuhi, subong nga nagagawi ka gid sa kamatooran.

4Wala na ako sing kalipay nga labi pa sini, sa pagpamati nga ang akon mga anak nagagawi sa kamatooran.

5Hinigugma, nagahimo ka sing matutum nga butang kon maghatag ka sing bisan ano nga pag-alagad sa mga kauturan, labi na gid sa mga dumoloong,

6nga nagsaksi sa imo gugma sa atubangan sang iglesia. Magahimo ka sing maayo sa pagpatigayon sa ila panlakatan subong nga nagakaigo sa pag-alagdan sang Dios.

7Kay sila nagpanlakatan tungud sa iya kag wala nagabaton sing bisan ano gikan sa mga Gentil.

8Gani dapat ta sakdagon ang amo nga mga tawo, agud nga manginmasigkamanugpangabudlay kita sa kamatooran.

9May ginsulat ako sa iglesia; apang si Diotrefes, nga naluyag magpangolo sa ila, wala magkilala sang akon pagbulut-an.

10Gani, kon magkara ako, dumdumon ko ang ginahimo niya, nga nagawakal sing malain nga mga polong batok sa akon. Kag sa wala pa maayawi sina, wala man niya pagbatona ang mga kauturan, kag sila nga buut ginadumilian niya kag ginasobol gikan sa iglesia.

11Hinigugma, indi mo pag-ilogon ang malaut kondi ang maayo. Ang nagahimo sing maayo iya sang Dios; ang nagahimo sing malaut wala makakita sa Dios.

12Si Demetrio nasaksihan sang tanan, kag sang kamatooran gid; ako man nagasaksi nahanungud sa iya, kag kamo nakahibalo nga ang akon panaksi matuud.

13May madamu ako nga inugsulat sa imo, apang indi ko buut isulat sa imo sa pluma kag tinta;

14nagalaum ako sa pagpakigkita sa imo sa madali, kag magahambalanay kita sa nawung kag nawung.

15Ang paghidait sa imo. Ang mga abyan nagaabiabi sa imo. Abiabiha ang mga abyan, ang tagsatagsa sa ila.

Jump to: