Colossians 1

Ilonggo (Ang Biblia (1982))

Jump to: Chapter 2 →

1Si Pablo, pinadala ni Cristo Jesus sa kabubut-on sang Dios, kag si Timoteo nga aton utud,

2Sa mga balaan kag mga kauturan nga matutum kay Cristo sa Colosas: Ang bugay sa inyo kag paghidait nga gikan sa Dios nga aton Amay.

3Nagapasalamat kami sa gihapon sa Dios, nga Amay sang aton Ginoong Jesu-Cristo, sa nagapangamuyo kami tungud sa inyo,

4bangud nga nakabati kami sang inyo pagtoo kay Cristo Jesus kag sang inyo gugma tungud sa tanan nga balaan,

5bangud sang paglaum nga natigana sa inyo sa langit. Nahanungud sini nabatian ninyo anay sa polong sang kamatooran, ang maayong balita

6nga nag-abut sa inyo, subong nga sa pagkamatuud sa bug-os nga kalibutan ini nagapamunga kag nagatubo—amo sa inyo man, kutub sa adlaw sang pagkabati ninyo kag paghangup sang bugay sang Dios sa kamatooran,

7subong nga inyo naton-an ini kay Epafras nga amon hinigugma nga masigkaulipon. Sia matutum nga manug-alagad ni Cristo tungud sa amon

8kag nag-asoy man sa amon sang inyo gugma sa Espiritu.

9Kag gani, kutub sa adlaw sang amon pagkabati sini, wala kami mag-untat sa pagpangamuyo tungud sa inyo, nga nagapangayo nga mapun-an kamo sang ihibalo sang iya kabubut-on sa bug-os nga espirituhanon nga kaalam kag paghangup,

10sa paggawi sing takus sa Ginoo, sa bug-os nga pagpahamuut sa iya, nga nagapamunga sa tagsa ka maayong buhat kag nagatubo sa pagkilala sa Dios.

11Kabay nga mapabakud kamo sa bug-os nga gahum, sono sa mahimayaon nga kagamhanan niya, tungud sa bug-os nga pagpailub kag pagbatas nga may kalipay,

12nga nagapasalamat sa Amay, nga nagpakatakus sa aton sa pag-ambit sang panublion sang mga balaan sa kapawa.

13Sia nagluwas sa aton gikan sa gahum sang kadudulman kag nagpaliton sa aton sa ginharian sang iya hinigugma nga Anak,

14nga sa iya gintubus kita paagi sa kapatawaran sang aton mga sala.

15Sia amo ang larawan sang dimakita nga Dios, ang panganay sang tanan nga tinuga;

16kay sa iya gintuga ang tanan nga butang, sa langit kag sa duta, ang makita kag ang dimakita, bisan mga trono ukon mga kaginoohan ukon mga punoan ukon mga pagbulut-an—ang tanan nga butang natuga paagi sa iya kag tungud sa iya.

17Sia una sa tanan nga butang, kag sa iya ang tanan nga butang nagatingub.

18Sia amo ang olo sang lawas, nga amo ang iglesia sia amo ang ginsuguran, ang panganay gikan sa mga patay, agud nga sa tanan nga butang mangin-nahauna sia.

19Kay sa iya ang tanan nga kabug-osan sang Dios nahamuut sa pagpuyo,

20kag paagi sa iya sa pagpasag-uli sang tanan nga butang sa iya kaugalingon, bisan sa langit ukon sa duta, nga nagapakighidait paagi sa dugo sang iya cruz.

21Kag kamo, nga sang tion nga nagligad nahamulag kag kaaway sa inyo panghunahuna, nga nagabuhat sing malaut,

22karon ginpasag-uli kamo niya sa lawas sang iya unud paagi sa iya kamatayon, sa pagpaatubang sa inyo nga balaan kag walay kasawayan kag disalabdongon sa iya atubangan,

23kon nagapadayon kamo sa pagtoo, nga napasad kag malig-on, kag indi magihit sa paglaum sa maayong balita nga inyo nabatian, nga ginwali sa bug-os nga tinuga sa idalum sang langit, kag sa sini ako, si Pablo, nangin-alagad.

24Karon nagakalipay ako sa akon mga pag-antus tungud sa inyo, kag ginahimun-an ko sa akon unud ang nakulang sa mga kapipit-an ni Cristo tungud sang iya lawas, nga amo, ang iglesia,

25nga sa sini ako nangin-alagad sono sa palangakoan nga ginhatag sa akon tungud sa inyo, sa pagpakilala sing bug-os sang polong sang Dios,

26ang tinago nga nalipdan sa mga katuigan kag mga kaliwatan apang karon napahayag sa iya mga balaan.

27Sa ila ginbuut sang Dios ang pagpakilala kon ano ang kamanggaran sang himaya sining tinago sa tunga sang mga Gentil, nga amo si Cristo sa inyo, ang paglaum sang himaya.

28Sia ginabantala namon, nga nagapaandam sa tagsa ka tawo kag nagapanudlo sa tagsa ka tawo sa bug-os nga kaalam, agud nga amon mapaatubang nga hamtong ang tagsa ka tawo kay Cristo.

29Tungud sini nagapangabudlay ako, nga nagapanikasug sa tanan nga kusug nga ginapanghikut niya sing gamhanan sa akon.

Jump to: Chapter 2 →