Jude 1

Ilonggo (Ang Biblia (1982))

Jump to:

1Si Judas, ulipon ni Jesu-Cristo kag utud ni Santiago, Sa mga tinawag, nga hinigugma sa Dios nga Amay kag nga tinipigan tungud kay Jesu-Cristo:

2Ang kalooy, paghidait, kag gugma pagpaukaron sa inyo.

3Mga hinigugma, sa nagahimulat gid ako sa pagsulat sa inyo nahanungud sang aton kalabilogan nga kaluwasan, nanginkinahanglan sa akon ang pagsulat nga nagalaygay sa inyo sa pagpakigsuay tungud sang pagtoo nga natugyan sing makaisa gid lang sa mga balaan.

4Kay may pila ka tawo nga nagsulud sing tago nga gintandaan nga daan sa sining katagudilian, didiosnon nga mga tawo nga nagabaylo sang bugay sang aton Dios sa kaulag kag nagapanghiwala sang aton isa lamang ka Agalon kag Ginoo, si Jesu-Cristo.

5Karon buut ako magpahanumdum sa inyo, bisan napahibalo kamo sing bug-os sing makaisa gid lang nga ang Ginoo sang naluwas niya ang isa ka katawohan pagowa sa duta sang Egipto, sang olihi ginlaglag niya ang mga wala magtoo.

6Kag ang mga manugtunda nga wala magtipig sang ila kaugalingon nga kahimtangan kondi nagbiya sang ila nagakaigo nga puluy-an iya gintigana sa mga gapus nga dayon sa mangitongito nga kadudulman tubtub sa paghukom sang daku nga adlaw;

7subong nga ang Sodoma kag Gomorra kag ang mga banwa sa palibut, nga sa kaangay nila nagmakihilawason kag nagpatuyang sa dinagakaigo nga kailigbon, ginbutang sila subong nga huwaran paagi sa silot sang kalayong dayon.

8Walay sapayan sa amo nga bagay ini sila sa ila mga damgo nagadagta sang unud, nagapakawalay pulus sang pagbulut-an, kag nagapasipala sa mga halangdon.

9Apang si Miguel nga puno sang mga manugtunda, sang nagapakigsuay sa yawa, nagpakigbais sia nahanungud sang lawas ni Moises, wala magpangahas sa paggamit sing mapasipalahon nga paghukom batok sa iya, kondi nagsiling, “Ang Ginoo magsabdong sa imo.”

10Apang ini sila nagapasipala sa bisan ano nga wala nila mahibaloi, kag ang nahangpan nila sa kinaugali kaangay sang mga sapat nga walay kaisipan, sa sini nga mga butang nagakalaglag sila.

11Kailo sila! Kay nagalakat sila sa dalan ni Cain, kag nagdinagoso sa sayup ni Balaam tungud sa sohol, kag nawala sa ribok ni Core.

12Ini sila mga dagta sa inyo mga sinalosalo sang paghigugma, sang nagakalipay sila sing tingub nga nagaginansal nga walay kahadluk, nga nagatatap sang ila kaugalingon; mga panganud nga walay tubig, nga ginapalis sang mga hangin; mga kahoy sa tigbulunga nga walay bunga, nga nagkalamatay sing makaduha, nga nagabut sa mga gamut;

13masangsang nga kabaluran sang dagat, nga nagabula sang ila kaugalingon nga kahuluy-an; talang nga mga bitoon nga sa ila natigana sa gihapon ang kangitongito sang kadudulman.

14Nahanungud sini sa ila man si Enoc sa ikapito nga kaliwatan kutub kay Adam nagtagna, nga nagasiling, “Yari karon, nag-abut ang Ginoo upud ang linaksa sang iya mga balaan,

15sa paghukom sa tanan, kag sa pagsilot sang tanan nga didiosnon nahanungud sang tanan nila nga binuhatan sang pagkadidiosnon nga ginhimo nila sing didiosnon, kag sang tanan nga butang nga matig-a nga ginhambal batok sa iya sang mga makasasala nga didiosnon.”

16Ini sila mga palakumud, mga mabinasulon, nga nagagawi sono sa ila mga kailigbon, mga tikalon nga bugalon, nga nagainto sang mga tawo agud nga makapulus.

17Apang kamo, mga hinigugma, panumdumon ninyo ang mga panagna sang mga pinadala sang aton Ginoong Jesu-Cristo;

18nagsiling sila sa inyo, “Sa katapusan nga tion may mga mayubiton, nga nagagawi sono sa ila kaugalingon nga mga kailigbon nga didiosnon.”

19Ini sila amo ang nagahimo sang mga pagbinahinbahin, dutan-on nga mga tawo, nga wala sang Espiritu.

20Apang kamo, mga hinigugma, patuboa ang inyo kaugalingon sa inyo labing balaan nga pagtoo; magpangamuyo sa Espiritu Santo;

21tipigi ang inyo kaugalingon sa gugma sang Dios; maghulat sang kalooy sang aton Ginoong Jesu-Cristo nga sa kabuhi nga walay katapusan.

22Kag magpatalupangud sa iban, nga yara sa pangduhaduha;

23magluwas sang iban, sa pag-agaw sa ila sa kalayo; sa iban magkalooy nga may kahadluk, nga nagadumut bisan sang panapton nga nadagtaan sang unud.

24Karon sa iya nga sarang makabantay sa inyo gikan sa pagkapukan kag makapaatubang sa inyo sa iya himaya sa walay dagta nga may kalipay,

25sa isa lamang ka Dios, nga aton Manluluwas paagi kay Jesu-Cristo nga aton Ginoo, ang himaya, pagkahari, kagamhanan, kag pagbulut-an, sa wala pa ang tanan nga tion kag karon kag tubtub sa gihapon. Kabay pa.

Jump to: