Malachi 2

Ilonggo (Ang Biblia (1982))

← Chapter 1 Jump to: Chapter 3 →

1“Kag karon, O kamo nga mga sacerdote, ining sogo tungud sa inyo.

2Kon indi kamo magpamati, kon indi ninyo paghuptan ini sa tagiposoon sa paghatag sing himaya sa akon ngalan, nagasiling ang Ginoo sang mga kasoldadosan, niyan magapadala ako sang pagpakamalaut sa inyo kag pakamalauton ko ang inyo mga pagpakamaayo; hoo ginpakamalaut ko na sila, bangud nga wala ninyo paghupti ini sa tagiposoon.

3Yari karon, sabdongon ko ang inyo kaliwat, kag hamlasan sing ipot ang inyo mga nawung, ang ipot sang inyo mga piesta, kag pahalinon kamo upud sini.

4Gani mahibaloan ninyo nga ako magpadala sining sogo sa inyo, agud nga ang akon katipan mangin-upud sa Levi, nagasiling ang Ginoo sang mga kasoldadosan.

5Ang akon katipan sa kabuhi kag sa paghidait upud sa iya, kag ginhatag ko sila sa iya agud nga mahadluk sia; kag nahadluk sia sa akon, nagtindug sia nga may pagtahud sa akon ngalan.

6Ang kasogoan sang kamatooran yara sa iya baba, kag ang pagkadimatarung wala makita sa iya mga bibig. Naglakat sia upud sa akon sa paghidait kag sa pagkatadlong, kag ginpaliso ang madamu gikan sa kalautan.

7Kay ang mga bibig sang sacerdote maghuput sing ihibalo, kag pangitaon nila ang kasogoan sa iya baba, kay sia manugbalita sang Ginoo sang mga kasoldadosan.

8Apang kamo nagalipas sa dalanon; ginpasandad ninyo ang madamu sa kasogoan; gindunut ninyo ang katipan sang Levi, nagasiling ang Ginoo sang mga kasoldadosan,

9busa ginhimo ko kamo nga talamayon kag kubus sa atubangan sang bug-os nga katawohan, sono sa wala kamo pagbanatay sang akon mga dalanon kondi may pinasulabi sang mga tawo sa kasogoan.”

10Indi bala kita tanan isa lamang sing amay? Wala bala kita pagtugaha sang isa gid ka Dios? Ngaa bala nagaluibay ang tagsatagsa ka tawo sa iya utud, nga nagapasipala sang katipan sang aton mga ginikanan?

11Ang Juda nagluib, kag ang kangil-aran nahimo sa Israel kag sa Jerusalem; kay ang Juda nagpasipala sang pagkabalaan sang Ginoo, nga iya ginahigugma, kag nagpangasawa sang anak sang dios nga dumuloong.

12Papason sang Ginoo ang tawo nga nagahimo sini, ang nagapulaw kag ang nagasabat, gikan sa tunga sang mga layanglayang ni Jacob, kag ang nagadolot sing halad sa Ginoo sang mga kasoldadosan!

13Kag ini ginahimo ninyo liwat. Ginatabonan ninyo ang halaran sang Ginoo sing mga luha, sing paghibi kag pagbakho bangud nga wala sia magsapak sang dolot ukon nagabaton sini sa maayong kabubut-on sa inyo kamut.

14Apang nagasiling kamo, “Ngaa bala?” Bangud nga ang Ginoo nanginsaksi sa tunga nimo kag sang asawa sang imo pagkapamatan-on, nga batok sa iya nagluib ka, bisan sia ang imo kaupud kag asawa sa imo katipan.

15Wala bala sia maghimo sing isa, bisan nga may nabilin sia sang Espiritu? Kag ngaa bala isa? Nagpangita sia sing kaliwat nga diosnon. Busa andami ang inyo espiritu, kag wala sing magluib sa asawa sang iya pagkapamatan-on.

16“Kay ginadumtan ko ang pagsikway, nagasiling ang Ginoo ang Dios sang Israel, kag ang nagatabon sang iya panapton sing panlugus, nagasiling ang Ginoo sang mga kasoldadosan. Busa andami ang inyo espiritu nga indi kamo magluibay.”

17Ginpalapyo ninyo ang Ginoo sang inyo mga polong. Apang nagasiling kamo, “Sa diin bala namon ginpalapyo sia?” Sa ginasiling ninyo, “Ang tagsatagsa nga nagahimo sang malaut maayo sa itololok sang Ginoo, kag nagakalipay sia sa ila.” Ukon “Diin bala ang Dios sang katarungan?”

← Chapter 1 Jump to: Chapter 3 →