Obadiah 1

Ilonggo (Ang Biblia (1982))

Jump to:

1Ang palanan-awon ni Abdias. Amo ini ang ginasiling sang Ginoong Dios nahanungud sa Edom: Nakabati kami sing mga balita gikan sa Ginoo, kag isa ka manugbalita ginapadala sa mga pungsud: “Tindug kamo! magtindug kita batok sa iya sa inaway!”

2Yari karon, padiotayon ko ikaw sa tunga sang mga pungsud, tamayon ka sing daku.

3Ang bugal sang imo tagiposoon naglimbong sa imo, ikaw nga nagapuyo sa mga litik sang igang, nga mataas ang iya puluy-an, nga nagasiling sa iya tagiposoon, “Sin-o bala ang magaholog sa akon sa duta.”

4Bisan nagatimbuuk ka subong sang aguila, bisan ang imo pugad nahamtang sa kabitoonan, iholog ko ikaw sa idalum gikan didto, nagasiling ang Ginoo.

5Kon ang mga makawat mag-abut sa imo, kon ang mga buyong sa kagab-ihon— daw ano ang pagkalaglag mo!— indi bala sila magpangawat sang tuman sa ila? Kon mag-abut sa imo ang mga manugpamopo sang uvas, indi bala sila magbilin sing salaghawon nga mga uvas?

6Daw ano ang pag-ati kay Esau, ang pagpangita sang iya mga bahandi!

7Ang tanan nga kadampig mo naglimbong sa imo, sila nagtabog sa imo sa dulunan; ang mga tawo nga may paghidait sa imo naglandas sa imo; ang mga abyan mong nasaligan nagabutang sing siod sa idalum nimo— walay paghangup sini.

8Indi ko bala sa sadtong adlaw, nagasiling ang Ginoo, paglaglagon ang mga mangin-alamon sa Edom, kag ang paghangup sa Bukid ni Esau?

9Kag ang imo gamhanan nga mga tawo, O Teman, mahangawa, agud nga ang tagsatagsa mapapas sa Bukid ni Esau sa pagpatay.

10Tungud sa panglugus nga nahimo sa imo utud nga si Jacob, magatabon sa imo ang kahuya, kag papason ka sing dayon.

11Sang adlaw nga nagtindug ka sa pihak, sang adlaw nga ang mga dumoloong nagdala sang iya pagkabutang, kag ang mga tumandok nagsulud sa iya mga gawang kag nagpapalad tungud sa Jerusalem, ikaw gid subong sang isa sa ila.

12Apang dili ka maglantaw sa adlaw sang imo utud sa adlaw sang iya kalalat-an; dili ka magkalipay sa katawohan sang Juda sa adlaw sang ila kalaglagan; dili ka magpamolong sing binugalon sa adlaw sang kasisit-an.

13Dili ka magsulud sa gawang sang akon katawohan sa adlaw sang ila kalalat-an; dili ka man magtan-aw sa ila kapipit-an sa adlaw sang ila kalalat-an; dili ka magtandog sa ila pagkabutang sa adlaw sang ila kalalat-an.

14Dili ka magtindug sa mga ginsang-an sa pagpapas sang mga gikan sa iya nga nagapalagyo; dili pag-itugyan ang mga gikan sa iya nga nabilin sa adlaw sang kasisit-an.

15Kay ang adlaw sang Ginoo malapit na sa tanan nga pungsud. Sono sa imo ginhimo, himoon sa imo, ang imo paghisayo ibalik sa imo kaugalingon nga olo.

16Kay subong nga nag-inum kamo sa akon bukid nga balaan, sa amo magainum ang tanan nga pungsud sing dalayon; magainum sila, kag magalab-ok, kag sila manginsubong sang wala sila.

17Apang sa Bukid nga Sion may didto sang mga nakapalagyo, kag manginbalaan ini; kag ang panimalay ni Jacob magatag-iya sang ila mga kaugalingon.

18Ang panimalay ni Jacob Manginkalayo, kag ang panimalay ni Jose mangindabdab, kag ang panimalay ni Esau manginginalaban; magasonog sila sa ila kag magalamon sa ila, kag wala gid sing mabilin sa panimalay ni Esau; kay ang Ginoo nagpamolong sini.

19Ang mga sa Bagatnan magatag-iya sang Bukid ni Esau, kag ang mga SA kapatagan sang mga Filistinhon; magatag-iya sila sang latagon ni Efraim kag sang latagon sang Samaria kag si Benjamin magatag-iya sang Galaad.

20Ang mga bihag sining kasoldadosan sang katawohan sang Israel nga yara sa mga Canaanhon magatag-iya tubtub sa Sarepta; kag ang mga bihag sang Jerusalem nga yara sa Sefarad magatag-iya sang kabanwaanan sang Bagatnan.

21Ang mga manluluwas magataklad sa Bukid nga Sion sa paghukom sang Bukid ni Esau; kag ang ginharian mangin-iya sang Ginoo.

Jump to: