Philemon 1

Ilonggo (Ang Biblia (1982))

Jump to:

1Si Pablo, nga binilanggo tungud kay Cristo Jesus, kag si Timoteo nga aton utud, Kay Filemon nga amon hinigugma nga masigkamanugpangabudlay

2kag kay Apia nga amon babaying utud kag kay Arquipo nga amon masigkasoldado, kag sa iglesia sa imo balay:

3Ang bugay sa inyo kag ang paghidait gikan sa Dios nga aton Amay kag kay Ginoong Jesu-Cristo.

4Nagapasalamat ako sa akon Dios sa gihapon sang ginadumdum ko ikaw sa akon mga pangamuyo,

5bangud nga nakabati ako sang imo gugma kag sang imo pagtoo ayon kay Ginoong Jesus kag sa tanan nga balaan,

6kag ginapangamuyo ko nga ang paghiambit nila sang imo pagtoo magpasanyog sang pagkilala sang tanan nga maayong butang nga aton kay Cristo.

7Kay may daku ako nga kalipay kag kabakud gikan sa imo gugma, utud ko, bangud nga ang mga tagiposoon sang mga balaan naumpawan paagi sa imo.

8Gani, bisan ako may tuman nga kasidla kay Cristo sa pagsogo sa imo sa paghimo sang kinahanglanon,

9walay sapayan tungud sa gugma ginapasulabi ko nga magpakilooy sa inyo—ako, si Pablo, nga embajadore kag karon binilanggo man tungud kay Cristo Jesus—

10ginapakilooy ko sa imo tungud sa akon anak, si Onesimo, nga nangin-anak ko sa pagbilanggo sa akon.

11(Sia anay walay pulus sa imo, apang karon mapuslanon gid sa imo kag sa akon.)

12Ginapabalik ko sia sa imo, nga ginapadala ko ang akon gid tagiposoon.

13Malipay kuntani ako sa paghawid sa iya kaupud nakon, agud nga tungud sa imo mag-alagad sia sa akon sa pagbilanggo sa akon tungud sang maayong balita;

14apang sa wala ang pahanugut mo ginpasulabi ko nga indi maghimo sing bisan ano agud nga ang imo pagkaayo indi sa pilit kondi kinabubut-on mo.

15Kay ayhan bangud sini ginpahilayo sia sa imo sing diotay nga tion, agud nga magbalik sia sa imo sing dayon,

16indi na subong nga ulipon kondi labaw pa sa ulipon, subong nga utud nga hinigugma, labi na sa akon apang daw ano pa gid sa imo, sa unud kag sa Ginoo.

17Gani kon ginabilang mo ako nga kaupud, batona sia subong sang pagbaton mo sa akon.

18Kon nakasayup man sia sa imo, ukon may utang sa imo, isipa ina nga utang ko.

19Ako, si Pablo, nagasulat sini sa akon kaugalingon nga kamut, ako magabayad sini—wala ako nagasiling sa imo nga nautang mo sa akon bisan ang imo kaugalingon.

20Hoo, utud, paaguma ako sing kapuslanan gikan sa imo sa Ginoo. Paumpawi ang akon tagiposoon kay Cristo.

21Sa may pagsalig sa imo pagkamatinumanon, nagasulat ako sa imo, nga nakahibalo nga himoon mo bisan ang labi pa sa ginasiling ko.

22Lakip sini, amani man ako sing dalayonan, kay nagalaum ako nga paagi sa inyo mga pangamuyo itugut ako sa inyo.

23Nagaabiabi sa imo si Epafras, nga akon masigkabinilanggo kay Cristo Jesus,

24kag si Marcos, si Aristarco, si Demas, si Lucas, nga akon mga masigkamanugpangabudlay.

25Ang bugay sang aton Ginoong Jesu-Cristo manginkaupud sang inyo espiritu.

Jump to: