Titus 2

Ilonggo (Ang Biblia (1982))

← Chapter 1 Jump to: Chapter 3 →

1Apang nahanungud sa imo, itudlo ang nagakaigo sa putling pagtolon-an.

2Laygayi ang mga magulang pa nga lalaki nga maghaganhagan, talahoron, but-anan, kag putli sa pagtoo, sa gugma, kag sa pagkalig-on.

3Laygayi ang magulang pa nga mga babayi man nga magmatinahoron sa paggawi, indi mapatopatoon ukon naulipon sa alak; magtudlo sila sang maayo,

4kag sa amo hanason ang pamatan-on nga mga babayi sa paghigugma sang ila mga bana kag mga anak

5nga magbut-anan, putli, matinatapon sa balay, malolo, kag mapinasakupon sa ila mga bana, agud nga indi mapasipalahan ang polong sang Dios.

6Subong man laygayi ang mga pamatan-on nga lalaki nga magpugong sang ila kaugalingon.

7Sa tanan nga bagay magpakita ka imo nga huwaran sang maayong mga buhat, kag sa imo pagtolon-an ipakita ang pagkabunayag, pagkahalangdon,

8kag putling halambalanon nga indi mabadlong, agud nga ang kasumpung mahuy-an, nga walay malain nga ikasiling nahanungud sa aton.

9Laygayi ang mga ulipon nga magpasakup sa ila kaugalingon nga mga agalon kag magpahamuut sa tanan nga bagay; dili sila magmabinatoon,

10ukon magpangawatkawat, kondi magpakita sing bug-os kag matuud nga pagkatutum, agud nga mapunihan nila ang pagtolon-an sang Dios nga aton Manluluwas sa tanan nga butang.

11Kay ang bugay sang Dios nagpahayag nga sa kaluwasan sang tanan nga tawo,

12nga nagatudlo sa aton nga magsikway sang pagkadidiosnon kag kalibutanon nga mga kailigbon, kag magkabuhi sang but-anan, matarung, kag diosnon nga mga kabuhi sa sining kalibutan,

13nga nagahulat sang bulahan naton nga paglaum, ang pagpahayag sang himaya ni Jesu-Cristo nga aton daku nga Dios kag Manluluwas,

14nga naghatag sang iya kaugalingon tungud sa aton sa pagtubus sa aton gikan sa tanan nga kalautan kag sa pagtinlo nga sa iya kaugalingon sang katawohan nga iya nga makugi sa maayong mga buhat.

15Ining mga butang ibantala mo; maglaygay kag magsabdong sa bug-os nga pagbulut-an. Walay sin-o nga magtamay sa imo.

← Chapter 1 Jump to: Chapter 3 →