Lamentations 5

Hmong Bible (Vajtswv Txojlus 2000)

← Chapter 4 Jump to:

1Tus TSWV, thov koj nco txog tej xwm uas tau los raug peb ntawd. Thov koj tsa qhovmuag ntsia peb thiab peb tej kev txajmuag.

2Peb tej liaj tej teb poob rau lwm haivneeg tes lawm; cov neeg txawv tebchaws tuaj nyob hauv peb tej vajtse tas lawm.

3Cov uas yog peb txiv raug yeebncuab muab tua tuag tas huv tibsi, thiab nimno tshuav cov uas yog peb niam ua pojntsuam nyob lawm xwb.

4Peb yuav tau them nyiaj rau tej dej uas peb haus; peb yuav tau muab nyiaj muas ntoo los rau peb ua taws rauv.

5Luag raws thiab nplawm peb ib yam li nplawm tej neesluav lossis tej ntxhuav; Peb sab kawg nkaus, tiamsis luag tsis pub peb so li.

6Peb mus thov nram tebchaws Iziv thiab pem tebchaws Axilias, peb thiaj muaj zaub mov txaus noj yug peb txojsia.

7Peb cov yawgkoob yeej ua txhaum tiag, tiamsis lawv twb tuag tas lawm; peb raug kev txomnyem vim peb tau ris lawv tej kev txhaum.

8Peb raug cov neeg uas twb tsimtxiaj tsis npaum li cov qhev tuaj tswjhwm peb, thiab tsis muaj leejtwg pab kom peb dim ntawm lawv txhais tes.

9Cov neeg tua neeg nyob thoob plaws tom tej ntug nroog; Thaum peb mus nrhiav zaub mov noj, peb pheej hmoo tuav siav rawv mus xwb.

10Kev tshaib plab ua rau peb ua npaws ibce kub lug ib yam li lub qhovcub.

11Peb cov pojniam puavleej raug luag mos saum Roob Xi-oos; peb cov ntxhais los raug luag yuam hauv cov Yudas tej zos.

12Peb cov thawjcoj raug luag ntes coj mus dai cajdab tuag tas; tsis muaj leejtwg hwm peb cov neeg laus hlo li lawm.

13Peb cov tub hluas raug luag yuam mus zom nplej ib yam li tej qhev; cov menyuam tub raug luag yuam mus kwv ntoo hnyav heev ntog pujpoog.

14Tsis muaj cov laus tuaj zaum ntawm tej roojvag nroog, thiab tsis muaj cov hluas tuaj ntaus suab nkauj li lawm.

15Txojkev zoo siab khiav tawm ntawm peb lub neej mus lawm; Txojkev quaj ntsuag los hloov peb tej kev seevcev zoo siab chaw.

16Txhua yam uas peb khav yeej tsis muaj dabtsi li lawm. Peb ua txhaum, nimno peb thiaj raug kev puastsuaj.

17Vim li ntawd peb lub siab thiaj mob lwj ntsuav thiab peb pom kev tsis tseeb vim peb tej kua muag los tas,

18Lub Roob Xi-oos nyob kho siab khuav thiab ua suabpuam tas, thiab hma los khawb los ntaug ua rau puastsuaj tas.

19Tiamsis tus TSWV, koj yog tus vajntxwv uas nyob mus ibtxhis thiab yuav tswj teb kav chaw mus txog thaum lub sijhawm kawg.

20Vim li cas koj thiaj tso peb tseg ntev ua luaj li? Koj puas tseem nco txog peb ntxiv lawm thiab?

21Tus TSWV, thov coj peb rov qab los cuag koj! Thov coj peb rov qab! Thov rov qab txhim kho kom peb muaj koob meej li thaum ub.

22Lossis koj yeej muab peb tso tseg mus ibtxhis li lawm? Puas yog koj txojkev chim yeej tsis muaj hnub kawg li?

← Chapter 4 Jump to: