Joshua 22

Chhattisgarhi

← Chapter 21 Jump to: Chapter 23 →

1तब यहोसू ह रूबेनी, गादी, अऊ मनस्से के आधा गोत्रमन ला बलाईस

2अऊ ओमन ला कहिस, “जऊन-जऊन हुकूम यहोवा के सेवक मूसा ह तुमन ला देय रिहिस ओ सब के पालन तुमन करे हवव, अऊ तुमन मोर हर हुकूम ला घलो माने हवव।

3बहुंत समय हो गे हे अऊ तब ले लेके आज तक तुमन अपन संगी इसरायलीमन ला नइं छोंड़े हव, पर यहोवा अपन परमेसर के दिये काम ला तुमन करे हवव।

4अऊ अब यहोवा तुम्हर परमेसर अपन वायदा के मुताबिक तुम्हर भाईमन ला बिसराम देय हवय; एकरसेति अब तुमन ओ देस म अपन घर ला लहुंट जावव, जेला यहोवा के सेवक मूसा ह यरदन नदी के ओ पार तुमन ला देय हवय।

5पर यहोवा के सेवक मूसा के दिये हुकूम अऊ कानून ला धियान देके मानव: यहोवा अपन परमेसर ले मया करव, ओकर रसता म चलव, ओकर हुकूममन के पालन करव, ओकर भक्ति म मगन रहव अऊ अपन जम्मो मन अऊ जम्मो परान ले ओकर सेवा करव।”

6तब यहोसू ह ओमन ला आसीरबाद देके बिदा करिस अऊ ओमन अपन-अपन घर चल दीन।

7(मनस्से के आधा गोत्र ला मूसा ह बासान म भुइयां देय रिहिस, अऊ दूसर आधा गोत्र ला यहोसू ह ओमन के संगी इसरायलीमन के संग यरदन नदी के पछिम कोति भुइयां दीस।) ओमन ला जब यहोसू ह बिदा करिस, त ओह ओमन ला ये कहिके आसीरबाद दीस,

8“अपन अपार संपत्ति ला लेके अपन-अपन घर लहुंट जावव—पसुमन के बड़े झुंड, सोन, चांदी, कांसा अऊ लोहा, अऊ बहुंते ओनहा सब ला लेके जावव अऊ अपन बईरीमन ले लूटे गय सामान ला अपन संगी इसरायलीमन संग बांट लेवव।”

9तब रूबेनी, गादी अऊ मनस्से के आधा गोत्र के मनखेमन कनान देस के सीलो नगर मेर इसरायलीमन ला छोंड़के अपन देस, गिलाद ला चल दीन, जेला यहोवा के हुकूम के मुताबिक, मूसा के जरिये ओमन पाय रिहिन।

10जब रूबेनी, गादी, अऊ मनस्से के आधा गोत्र के मनखेमन कनान देस म यरदन नदी के लकठा म गलीलोत के इलाका म हबरिन, त ओमन उहां यरदन नदी के तीर म एक बड़े बेदी बनाईन।

11अऊ जब इसरायलीमन सुनिन कि रूबेनी, गादी, अऊ मनस्से के आधा गोत्र के मनखेमन कनान देस के सीमना म, इसरायलीमन के भाग म, यरदन नदी के लकठा म गलीलोत करा एक बेदी बनाय हवंय,

12त पूरा इसरायल के सभा ह ओमन के बिरूध लड़ई म जाय बर सीलो करा जूर गीस।

13तब इसरायलीमन रूबेनी, गादी अऊ मनस्से के आधा गोत्र के मनखेमन करा गिलाद देस म एलिआजर पुरोहित के बेटा पीनहास ला पठोईन।

14ओकर संग ओमन दस झन मुखियामन ला घलो पठोईन, जेमन इसरायल के हर एक गोत्र म ले एक-एक झन रिहिन अऊ ओमन इसरायली कुलमन के बीच हर एक परिवारिक दल के मुखिया घलो रिहिन।

15जब ओमन गिलाद देस म रूबेनी, गादी अऊ मनस्से के आधा गोत्र के मनखेमन करा गीन, त येमन ओमन ला कहिन:

16“यहोवा के जम्मो सभा ह कहत हे: ‘तुमन इसरायल के परमेसर के संग अइसने बिसवासघात कइसे कर सकत हव? तुमन यहोवा ले मुहूं मोड़के अब ओकर बिरूध बिदरोह म अपन बर एक बेदी कइसे बना ले हव?

17का पेओर के पाप ह हमर बर कुछू कम रिहिस? आज तक हमन अपनआप ला ओ पाप ले सुध नइं करे हन, हालाकि ओकर कारन यहोवा के समाज ऊपर एक महामारी घलो फईलिस!

18अऊ अब का तुमन यहोवा ला तियागके ओकर पाछू चलना छोंड़ देवत हव? “ ‘यदि आज तुमन यहोवा के बिरूध बिदरोह करथव, त कल ओह इसरायल के जम्मो समाज ऊपर गुस्सा होही।

19जऊन देस ऊपर तुम्हर अधिकार हवय, यदि ओ देस ह असुध हो गे हवय, त यहोवा के देस म आवव, जिहां यहोवा के पबितर-तम्बू हवय, अऊ हमर संग देस म बांटा लेके रहव। पर यहोवा हमर परमेसर के बेदी ला छोंड़ अपन बर अऊ कोनो बेदी बनाके यहोवा के बिरूध या हमर बिरूध बिदरोह झन करव।

20जब जेरह के बेटा आकान ह अरपन करे गे चीज के बिसय म बिसवासघात करिस, त का यहोवा के कोप ह इसरायल के जम्मो समाज ऊपर नइं भड़किस? अऊ ओ मनखे के पाप के कारन सिरिप ओह एके झन ही नइं मरिस, पर आने मन घलो मरिन।’ ”

21तब रूबेनी, गादी अऊ मनस्से के आधा गोत्र के मनखेमन इसरायल के कुलमन के मुखियामन ला जबाब दीन:

22“सक्तिमान, परमेसर, यहोवा! सक्तिमान, परमेसर, यहोवा! ओह जानत हे! अऊ इसरायल घलो जानय! यदि ये काम ह यहोवा के बिदरोह म या ओकर हुकूम के बिरूध करे गे हवय, त फेर हमन ला आज जीयत झन छोंड़व।

23यदि हमन यहोवा ले अलग होय बर अपन खुद के बेदी बनाय हन या एकरसेति बनाय हन कि ओमा होम-बलिदान अऊ अन्न-बलिदान, या मेल-बलिदान चघावन, त यहोवा ह खुद हमर ले हिसाब लेवय।

24“पर हमन ये डर म अइसन करे हवन कि कोनो दिन तुम्हर संतानमन हमर संतानमन ला ये कह सकत हें, ‘यहोवा, इसरायल के परमेसर ले तुम्हर का काम?

25यहोवा ह तुम्हर अऊ हमर बीच म यरदन नदी ला एक सीमना ठहिराय हवय—हे रूबेनी अऊ गादीमन! यहोवा म तुम्हर कोनो भाग नइं ए।’ अइसन कहिके तुम्हर संतानमन हमर संतानमन ला यहोवा के भय माने ले रोक सकत हें।

26“एकरसेति हमन कहेंन, ‘आवव, हमन तियार होके एक बेदी बनावन—पर होम-बलिदान या चढ़ावा बर नइं।’

27येकर उल्टा, येह तुम्हर अऊ हमर बीच अऊ अवइया पीढ़ी के मनखेमन बर एक गवाह के रूप म अय, कि हमन होम-बलिदान, चढ़ावा अऊ मेल-बलिदान के संग यहोवा के पबितर-स्थान म ओकर अराधना करबो। तब भविस्य म, तुम्हर संतानमन हमर संतानमन ला ये नइं कह सकहीं, ‘यहोवा म तुम्हर कोनो भाग नइं ए।’

28“अऊ हमन कहेंन, ‘यदि ओमन कभू हमन ले, या हमर संतानमन ले अइसे कहिथें, त हमन ये जबाब देबो: यहोवा के बेदी के नमूना म बने ये बेदी ला देखव, जेला हमर पुरखामन बनाय हवंय; येह होम-बलिदान अऊ चढ़ावा बर नो हय, पर येह तुम्हर अऊ हमर बीच म एक गवाह के रूप म अय।’

29“ये बात ह हमर ले दूरिहा रहय कि हमन यहोवा के बिरूध बिदरोह करन, अऊ यहोवा हमर परमेसर के ओ बेदी ला छोंड़के जऊन ह ओकर पबितर-तम्बू के आघू म हवय, कोनो आने होम-बलिदान के बेदी, अन्न-बलिदान अऊ चढ़ावा चघाय के बेदी बनावन।”

30रूबेनी, गादी, अऊ मनस्से के आधा गोत्र के मनखेमन के ये बात ला जब पीनहास पुरोहित अऊ समाज के अगुवामन—इसरायली कुलमन के मुखियामन सुनिन, त ओमन खुस होईन।

31अऊ एलिआजर पुरोहित के बेटा पीनहास ह रूबेनी, गादी, अऊ मनस्सेयीमन ले कहिस, “आज हमन जान गेंन कि यहोवा हमर संग हवय, काबरकि ये बात म तुमन यहोवा के संग बिसवासघात नइं करे हव। तुमन इसरायलीमन ला यहोवा के हांथ ले बचा ले हव।”

32तब एलिआजर पुरोहित के बेटा पीनहास, अऊ अगुवामन गिलाद म रूबेनी अऊ गादीमन के संग बात करे के बाद कनान देस लहुंट गीन अऊ इसरायलीमन ला जम्मो बात बताईन।

33इसरायलीमन ये बात ला सुनके खुस होईन अऊ परमेसर के महिमा करिन। अऊ ओमन ओ देस, जिहां रूबेनी अऊ गादीमन रहत रिहिन, ओकर बिरूध लड़ई म जाके ओला नास करे के चरचा फेर नइं करिन।

34अऊ रूबेनी अऊ गादीमन ओ बेदी के ये नांव रखिन: हमर बीच म एक गवाह —कि यहोवा ह परमेसर अय।

← Chapter 21 Jump to: Chapter 23 →