2 John 1

Hatian Creole (HWP) 2000

Jump to:

1Sista, I da older leada fo da church peopo, an I write you an yoa kids dis letta. I get plenny love an aloha fo you guys fo real kine. God wen pick you guys. Everybody dat know wass true get love an aloha fo you guys, not ony me,

2cuz da trut stay inside all us guys an goin stay wit us foeva.

3I like God da Fadda an his Boy Jesus Christ do plenny good tings fo us guys, an give us chance, an make our hearts rest inside. God tell us wass true an he get love an aloha fo us. Love an Da Trut

4I wen feel real good inside cuz I wen find out dat get some a yoa kids dat stay stick wit da trut, jalike God da Fadda wen tell us fo do.

5So now, I tell you, sista, all us guys gotta get love an aloha fo each odda. Dis not one new ting I stay write you dat you gotta do. Dis da ting God wen tell us guys from da start.

6Dis how we show dat we get love an aloha, we do wat God wen tell us fo do. Dis wat he wen tell us, you guys gotta do all da tings he wen tell us fo do, jalike you guys wen hear from da start.

7You know, get plenny peopo dat go all ova da world dat try fo bulai us guys. Dat kine guys no like tell dat Jesus Christ wen come one real guy jalike us. Dey go agains Jesus, da Spesho Guy God Wen Send.

8Watch out dat you guys no lose da stuff you guys wen work hard fo. Mo betta, make shua you guys goin get all da good stuff God like give you guys.

9Whoeva no stick wit da stuff we teach bout Christ, but go teach odda kine stuff, dey donno God fo real kine. Whoeva stick wit da stuff we teach, dey know da Fadda an da Faddaʼs Boy too.

10If any guy come by you, an he no stay tell da same kine stuff we teach, no tell him fo come yoa house, an no tell him “Aloha.”

11Cuz da guy dat tell him “Aloha,” he stay doing da same kine bad stuff dat da bulaia guy stay doing. Da Last Ting

12I get plenny stuff fo tell you guys, but I no like jus write um down yet. Mo betta, I like come see you guys, an we talk togedda. Den we all goin stay good inside to da max.

13Yoa sista ova hea, da one God wen pick, her kids like tell you guys “Aloha.”

Jump to: