Philippians 1

Hatian Creole (HWP) 2000

Jump to: Chapter 2 →

1Dis letta from Paul an Timoty. Us guys work fo da Spesho Guy God Wen Send, Jesus Christ. We writing to all you peopo Philippi side dat stay all out fo God cuz you guys stay tight wit Jesus Christ. Dis letta fo everybody, da leada guys an da helpa guys, an all da odda bruddas an sistas.

2God, he our Fadda, an Jesus Christ, he da Good Boss Up Dea Inside Da Sky. We like dem do plenny good kine stuff fo you guys, an make yoa hearts rest inside. Paul Pray Fo Da Philippi Peopo

3Everytime I tink bout you guys, I tell my God, “Mahalo plenny! fo da Philippi peopo.”

4An everytime I pray fo all you guys, I stay good inside.

5Cuz from da first time you guys stay work togedda wit us guys fo tell peopo all da Good Kine Stuff From God, an you guys still yet stay doing um.

6Dis fo shua: God, he wen start fo do someting real good inside you guys, an garans he goin finish everyting he wen start fo do, an he no goin stop doing um till Jesus Christ come back.

7Eh, I stay shua lidat bout all you guys. An dass right, you know, cuz I tink plenny bout you guys everytime. All you guys stay tight wit me, no matta I one prisona. An even wen I try fo tell peopo how come I trus da Good Stuff From God, an wen I tell um how dey can know dat all da kine Good Stuff From God stay fo real, you guys stick wit me too. An everytime God do good kine stuff fo me, he do da same kine good stuff fo you guys too.

8God know how plenny love an aloha I get fo you guys. I feel lidat cuz Jesus Christ feel lidat.

9So den, dis how I pray: “God, help da Philippi peopo fo get mo an mo love an aloha. Den dey goin undastan plenny, an figga wass good an wass bad.

10Den dey can pick da bestes kine stuff, an no take da junk kine stuff! Dey do dat, everybody can see dat dey fo real. Den nobody can poin finga dem, from now till wen Christ come back!

11Den dey goin everytime do da right kine stuff, cuz Jesus Christ help um. Wen dat happen, everybody goin know how awesome you stay, an dey goin all out fo tell all da good kine tings bout you!” Dass how I pray to God. Plenny Good Stuff Stay Come Cuz I Stay In Jail

12Eh, bruddas an sistas! I like tell you guys someting. Everyting dat wen happen to me ova hea come okay, so mo plenny peopo can hear da Good Kine Stuff From God.

13All da police guys hea inside da main headquarters, an all da odda peopo ova hea, dey know how come I stay in jail, cuz I stay tight wit Christ, az why.

14An cuz I stay in jail, mos a da odda bruddas an sistas dat stay tight wit da Boss, dey coming mo an mo shua bout wat dey doing. Now dey get da guts fo tell peopo wat God say, an no need be scared.

15Fo shua, yeah? get guys dat tell peopo bout Christ. But dey do dat cuz dey no can handle if da odda guy numba one, plus, dey like make argue an win everytime. But den, get odda guys dat tell peopo bout Christ cuz dey get good heart.

16Dey do um wit love an aloha, an dey know dat I stay hea so I can tell peopo how come I know dat da Good Stuff From God stay fo real.

17Now, da odda buggas! You know, dey ony like teach peopo bout Christ fo show dey mo betta den me! Dass not right, you know, da way dey tink. Dey figga prison awready bummas fo me. But still yet, dey like make me suffa even moa.

18So, wat den? Get guys dat tell bout Christ fo make everybody tink dey hot stuff. Odda guys, dey do um fo real kine. But no matta dey fake o dey fo real, get guys telling peopo bout Christ, an dat make me stay good inside! An you know, I jus goin stay good inside lidat,

19cuz I know dis: bumbye God goin get me outa all dis stuff. An how he goin do dat? Cuz you guys pray, dass why, an cuz wateva I need, Jesus Christʼs Spirit goin help me plenny.

20I waiting real hard fo dat fo happen. I stay shua dat notting goin make me come shame. I goin be strong, an I no goin be scared. Everytime peopo see wat happen to me, jalike befo time, I like dem see how awesome Christ stay, jalike befo time, no matta I stay alive o I mahke.

21Da way I see um, if I stay alive I stay tight wit Christ, an if I gotta mahke I stay live wit him, an dass even mo betta.

22So den, if I stay alive hea in da world, I can do mo plenny still yet. Az why I not shua wat I like pick.

23I get presha dis way an dat way! Me, I like bag an go stay wit Christ awready! Dass mo betta, yeah?

24But if I stay hea inside da world, dat goin be mo betta fo you guys.

25Dass it! I know wat I goin do. I goin stay alive. I goin stay wit you guys. Dat goin make um mo betta fo you guys, so you guys can trus God mo plenny, an stay mo good inside.

26Bumbye, I goin go back by you guys one mo time. Den wen you guys see me, you guys goin feel good even mo bout Jesus Christ!

27Main ting, do everyting da right way, jalike da Good Kine Stuff Bout Christ say you suppose to. Den no matta I go see you guys, o I stay far away an ony goin hear wat you guys doing, I goin know dis: you guys stay solid, cuz you stay tight wit da one Spirit. You guys all get da same heart fo go all out an work togedda, so da odda peopo goin trus da Good Kine Stuff Bout Christ too.

28No scared da peopo dat hate you. Wen dey see dat you guys no scared, dat goin show dem dat dey da guys dat goin wipe out, not you guys. An dey goin know dat God da One who goin get you outa dat.

29God let you guys not ony trus Christ, but suffa fo him too.

30Yeah, you guys awready struggling. You guys wen see me struggling lidat, an you guys hear dat I struggling still yet.

Jump to: Chapter 2 →