Ephesians 6

Armenian 2019

← Chapter 5 Jump to:

1Զաւակնե՛ր, իբրեւ Տիրոջ հետեւորդներ՝ ձեր պարտականութիւնն է հնազանդիլ ձեր ծնողներուն, որովհետեւ ա՛յդ է շիտակը։

2«Պատուէ՛ քու հայրդ ու մայրդ» պատուիրանը առաջինն է՝ որ իրեն կապուած խոստում մը ունի.

3«որպէսզի միշտ բարիք գտնես եւ երկրի վրայ կեանքդ երկար ըլլայ»։

4Իսկ դուք, հայրե՛ր, մի՛ զայրացնէք ձեր զաւակները, այլ զանոնք մեծցուցէք քրիստոնէական դաստիարակութեամբ եւ կրթութեամբ։

5Ծառանե՛ր, ձեր մարմնաւոր տէրերուն հնազանդեցէք պատկառանքով ու երկիւղածութեամբ եւ անկեղծ սիրտով, ճիշդ ինչպէս Քրիստոսի պիտի հնազանդէիք։

6Ձեր ծառայութիւնը ըրէք՝ ո՛չ միայն երբ հսկող աչք կայ ձեր վրայ, ինչպէս կ՚ընեն անոնք՝ որոնք մարդոց հաճութիւնը կ՚ուզեն շահիլ, այլ՝ իբրեւ Քրիստոսի ծառաներ, որոնք Աստուծոյ կամքը կը կատարեն սրտանց։

7Ծառայեցէք յօժարակամ, ինչպէս պիտի ծառայէիք Տիրոջ, եւ ոչ՝ մարդոց։

8Գիտցէք, որ իւրաքանչիւր մարդ, ծառայ ըլլայ թէ ազատ, իր ըրած բարիքին փոխարէնը Տիրոջմէ պիտի ստանայ։

9Դո՛ւք ալ, տէրե՛ր, նոյն վերաբերումը ունեցէք անոնց նկատմամբ, մէկ կողմ դնելով խստութիւնը։ Յիշեցէք որ ձեր ծառաներն ալ, դուք ալ՝ կը պատկանիք նոյն Տիրոջ, որ երկինքի մէջ է. եւ անիկա խտրութիւն չի դներ մարդոց միջեւ։

10Ի վերջոյ, զօրացէք Տիրոջմով եւ իր ամենակարող զօրութեամբ։

11Ձեր վրայ առէք Աստուծոյ սպառազինութիւնը, որպէսզի կարենաք Սատանային հնարքներուն դէմ դնել։

12Որովհետեւ մեր պատերազմը մարդոց հետ չէ, այլ՝ երկինքի տակ գտնուող չար ոգիներուն, իշխանութիւններուն եւ պետութիւններուն, այս խաւար աշխարհի տիրակալներուն դէմ։

13Ուստի Աստուծոյ սպառազինութիւնը առէք, որպէսզի երբ չար օրը գայ՝ կարենաք ետ մղել Չարին հարուածները, եւ ամէն ինչ ընէք՝ կանգուն մնալու համար։

14Հետեւաբար պատրաստ եղէք. ճշմարտութեամբ ամրապնդեցէք ձեր մէջքը, արդարութիւնը հագէք զրահի պէս,

15եւ խաղաղութեան Աւետարանը քարոզելու պատրաստակամութիւնը հագէք կօշիկի պէս։

16Եւ այս բոլորին վրայ՝ հաւատքի վահանը առէք, որպէսզի կարենաք մարել Չարին արձակած բոլոր մխացող նետերը։

17Առէք նաեւ փրկութեան սաղաւարտը եւ Սուրբ Հոգիին սուրը, այսինքն՝ Աստուծոյ խօսքը։

18Այս բոլորին հետ՝ աղօթեցէ՛ք, աղօթեցէ՛ք եւ խնդրեցէ՛ք տեւաբար, Սուրբ Հոգիին օգնութեամբ։ Ատոր համար ալ՝ արթուն հսկեցէք, կատարեալ յարատեւութեամբ աղօթելով բոլոր հաւատացեալ եղբայրներուն համար։

19Աղօթեցէք նաեւ ինծի համար, որպէսզի Աստուած օգնէ ինծի՝ իր խօսքը տալով, եւ կարենամ համարձակօրէն պարզել Աւետարանին ծածուկ խորհուրդը ։

20Որովհետեւ թէպէտ այժմ բանտի մէջ, բայց Աւետարանին դեսպանը կը մնամ միշտ։ Ուստի աղօթեցէք որ ինծի չպակսի համարձակութիւնը որ պէտք է ունենամ՝ խօսելու համար։

21Որպէսզի դուք ալ գիտնաք թէ ի՛նչ կ՚ընեմ, թող ամէն ինչ ձեզի պատմէ Տիքիկոսը, որ Տիրոջ միացած մեր սիրելի եղբայրն է եւ հաւատարիմ օգնականը։

22Ճիշդ ատոր համար զինք ղրկեցի ձեզի, որպէսզի մեր մասին պէտք եղածը իմացնէ եւ ձեր սիրտերը հանգստացնէ։

23Թող Հայրն Աստուած եւ Տէր Յիսուս Քրիստոս հաւատակից եղբայրներուդ խաղաղութիւն եւ սէր շնորհեն՝ հաւատքով միասին։

24Թող Աստուծոյ շնորհքը ըլլայ բոլոր անոնց հետ, որոնք անմար սիրով կը սիրեն մեր Տէրը՝ Յիսուս Քրիստոսը։

← Chapter 5 Jump to: