Jude 1

Armenian 2019

Jump to:

1Ես՝ Յուդա, Յիսուս Քրիստոսի ծառան եւ Յակոբոսի եղբայրը, կը գրեմ ձեզի՝ բոլոր ազգերուդ, որ Հայրն Աստուած սիրեց եւ ընտրեց, եւ Յիսուս Քրիստոս պահպանեց։

2Թող Աստուած իր ողորմութիւնը, խաղաղութիւնն ու սէրը առատացնէ ձեր վրայ։

3Սիրելինե՛ր, միշտ ալ կը փափաքէի ձեզի գրել մեր հասարակաց փրկութեան մասին։ Բայց հիմա անհրաժեշտ նկատեցի գրել եւ խնդրել ձեզմէ՝ որ պայքարիք հաւատքին համար, որ ձեզի՝ Աստուծոյ ընտրեալներուդ աւանդուեցաւ միանգամընդմիշտ։

4Որովհետեւ կարգ մը անձեր սպրդեցան եւ հաւատացեալներու շարքերուն մէջ մտան։ Անհաւատ այդ մարդիկը մեր Աստուծոյ շնորհքը պատմող Աւետարանը չարափոխելով՝ իրենց անբարոյ ընթացքին պատշաճեցուցին, մերժելով իբրեւ միակ եւ ամենիշխան Տէր ճանչնալ Յիսուս Քրիստոսը։ Այդպիսիներուն ստանալիք դատապարտութիւնը կանուխէն գրուած է Սուրբ գիրքերուն մէջ։

5Արդ, կ՚ուզեմ ձեզի յիշեցնել, թէպէտ դուք այդ բոլորը գիտէք, թէ ի՛նչպէս Տէրը, անցեալին, իր ժողովուրդը Եգիպտոսէն ազատելէ ետք՝ կորուստի մատնեց անհաւատները։

6Յիշեցէ՛ք նոյնպէս, թէ ի՛նչպէս վարուեցաւ այն հրեշտակներուն հետ, որոնք իրենց տրուած իշխանութեամբ չգոհանալով՝ իրենց սահմաններէն դուրս եկան, եւ Աստուած զանոնք մշտնջենական շղթաներով կապուած կը պահէ խաւարին մէջ, մինչեւ որ դատաստանի մեծ օրը գայ։

7Յիշեցէ՛ք նաեւ Սոդոմն եւ Գոմորը եւ շրջակայ քաղաքները, որոնց բնակիչները նոյնպէս Աստուծոյ անհնազանդ գտնուեցան եւ անբնական կիրքերու եւ պոռնկութեան անձնատուր եղան, եւ հիմա յաւիտենական կրակի դատապարտութիւնը կը կրեն՝ իբրեւ օրինակ բոլորին։

8Ճիշդ նոյն ձեւով, այս երազատես մարդիկը եւս իրենց մարմինները կը պղծեն, Աստուծոյ տէրութիւնը արհամարհելով եւ հոգեղէն փառաւոր էակները անարգելով։

9Նոյնիսկ Միքայէլ հրեշտակապետը, երբ բանսարկու Սատանային հետ կը վիճէր՝ թէ ո՛վ պիտի առնէր Մովսէսի մարմինը, չյանդգնեցաւ անարգական բառերով դատապարտել զայն, այլ պարզապէս ըսաւ. «Տէ՛րը թող քեզ պատժէ»։

10Մինչդեռ այս մարդիկը իրենց չգիտցած բաները կ՚անարգեն։ Իրենց ամբողջ գիտցածը՝ իրենց բնազդական ցանկութիւններն են, որոնց կը հետեւին անբան անասուններու պէս, եւ որոնք իրենց կործանումին պատճառ պիտի ըլլան։

11Վա՜յ անոնց, որոնք Կայէնի գացած ճամբով գացին։ Դրամի սիրոյն՝ մոլորութեան մէջ ինկան, Բաղաամին պէս, եւ իրենց ապստամբութեան համար ալ պիտի կորսուին, Կորխին պէս։

12Անոնց ներկայութիւնը կ՚արատաւորէ ձեր սիրոյ հաւաքոյթի սեղանները, ուր անոնք անպատկառօրէն կու գան ձեզի խրախճանակից ըլլալու, միայն իրենց փորը լեցնելու համար։ Անոնք հովերէն քշուող ամպերու պէս են, որոնք անձրեւ չեն թափեր, կամ ծառերու պէս՝ որոնք նոյնիսկ աշնան՝ պտուղ չեն տար. անոնք արմատախիլ եղած ըլլալով՝ կրկնապէս մեռած են։

13Այո՛, ծովու կատաղի ալիքներուն կը նմանին, որոնց ամօթալի գործերը միշտ երեսը կ՚ելլեն, փրփուրին պէս։ Աստղերու թռչող բեկորներ են, որոնց տեղը՝ իրենց վերապահուած յաւիտենական թանձր խաւարն է։

14Ճիշդ անոնց համար էր որ մարգարէացաւ Ենովք, Ադամէն ետք եկող եօթներորդ նահապետը, ըսելով. «Ահաւասիկ Տէրը իր բիւրաւոր սուրբ հրեշտակներով կու գայ,

15դատաստանի ենթարկելու համար զանոնք բոլորը, դատապարտելու համար զանոնք իրենց գործած բոլոր ամբարիշտ գործերուն եւ լիրբ արտայայտութիւններուն համար, որ անոնք՝ այդ անհաւատ մեղաւորները արտաբերեցին իրեն դէմ»։

16Միշտ տրտնջացող եւ քննադատող այդ մարդիկը իրենց սեփական ցանկութիւններուն ետեւէն կը վազեն, պոռոտախօսութիւն կ՚ընեն եւ ասոր–անոր գովասանք կը շռայլեն՝ իրենց սեփական շահուն համար։

17Բայց դուք, սիրելինե՛ր, յիշեցէք այն՝ ինչ որ մեր Տիրոջ Յիսուս Քրիստոսի բոլոր առաքեալները կանուխէն յայտնեցին ձեզի,

18ըսելով՝ թէ «Վերջին ժամանակներուն ամէն ինչ արհամարհող մարդիկ պիտի գան, որոնք իրենց ամբարիշտ ցանկութիւններով պիտի առաջնորդուին»։

19Ահա ճիշդ ասոնք են, որ ձեր մէջ բաժանումներ յառաջ պիտի բերեն, մարդիկ՝ որոնք մարմնաւոր ցանկութիւններով կ՚առաջնորդուին եւ Սուրբ Հոգին չունին իրենց մէջ։

20Սակայն դուք, սիրելինե՛ր, իրարու հոգեւոր աճումին օգնեցէք ձեր սուրբ հաւատքովը։ Սուրբ Հոգիին օգնականութեամբը աղօթեցէք,

21եւ դուք ձեզ Աստուծոյ սիրոյն մէջ պահեցէք, սպասելով որ մեր Տէրը Յիսուս Քրիստոս իր ողորմութեամբ յաւիտենական կեանքը տայ ձեզի։

22Հաւատքին մէջ կասկածներ ունեցողները ամրապնդեցէ՛ք։

23Ուրիշները դատապարտութեան կրակէն խլելով փրկեցէք։ Ողորմութիւն ցուցաբերեցէք նաեւ անոնց, որոնք մեղքերու մէջ են։ Բայց զգո՜յշ, ատեցէ՛ք անոնց մեղսալից կեանքը։

24Արդ, անոր՝ որ կրնայ ձեզ անկումներէ փրկել, պահել անարատ եւ անբիծ, եւ անխառն ուրախութեամբ լեցուն՝ իր փառաւոր ներկայութեան կանգնեցնել,

25միակ Աստուծոյն՝ որ մեր փրկիչն է՝ փա՜ռք տուէք, մեր Տիրոջ Յիսուս Քրիստոսի միջոցաւ։ Անո՛ր են փառքը, մեծութիւնը, զօրութիւնն ու իշխանութիւնը, թէ՛ բոլոր ժամանակներէն առաջ, թէ՛ այժմ եւ թէ՛ գալիք բոլոր ժամանակներուն։ Ամէն։

Jump to: