Joel 1

Hakcipta © 2011, The Bible Society of Malaysia

Jump to: Chapter 2 →

1Tu pesan TUHAN ngagai Joel anak Petuel.

2Pendingka tu, kita ke tuai umur. Dinga, semua orang ke di menua Judah! Kati utai ti baka tu bisi udah kala nyadi ba rambau kita, tauka ba rambau aki ini kita menya?

3Padahka pasal utai tu ngagai bala anak kita, ngambika sida madahka iya ngagai bala anak sida, lalu anak sida deka madahka iya ngagai serak ti nangkanka sida.

4Bala buntak inggap ba utai ti ditanam. Utai ti enda diempa bala buntak nya, deka diempa bala buntak ti datai dudi.

5Dani lalu nyabak meh kita ke pemabuk. Nyabak meh kita ke ngirup wain. Buah anggur ti deka dikena ngaga wain, udah rusak.

6Bala buntak udah nyerang menua kitai. Sida kering, lalu enda ulih diitung. Ngeli sida tajam baka ngeli singa.

7Sida udah ngerusak batang anggur kitai lalu ngunyah kayu ara kitai. Sida udah ngelitika kulit kayu ara datai ke dan nyau burak magang.

8Nyabak meh kita, baka indu dara ke ngulitka pemati lelaki ti deka jadi enggau iya.

9Nadai agi gandum tauka wain diberi dalam Rumah Sembiang. Bala imam ngulit laban sida nadai agi piring diberi ngagai TUHAN.

10Umai nyau nadai agi utai tumbuh lalu tanah ngulit laban gandum udah rusak, buah anggur nyau rangkai, lalu kayu kana nyau layu.

11Tusah ati meh kita orang bumai. Nyabak meh kita ke ngintu kebun anggur, laban gandum, barli, enggau semua utai ti ditanam, udah rusak magang.

12Batang anggur enggau batang kayu ara udah layu. Semua kayu buah udah layu lalu mati, lalu orang nadai agi gaga ati.

13Rasukka kain guni, lalu nyabak meh kita imam ke bekereja ba alta! Mansang meh kita ngagai Rumah Sembiang lalu ngulit semalam-malam! Laban gandum tauka wain nyau nadai agi diberi ngagai Allah Taala.

14Asuh orang mayuh bepasa. Gempuruka semua orang mayuh! Gempuruka semua tuai enggau semua orang Judah ngagai Rumah Sembiang lalu nyabak ngagai Allah Taala!

15Naka meh pemalat hari nya! Laban Hari TUHAN nyau semak, hari alai Allah Taala ti Pemadu Bekuasa mai pengerusak.

16Kitai genung-genung nadai daya agi, meda utai ti ditanam kitai rusak. Kitai nyau nadai agi pengaga dalam Rumah Sembiang Allah Taala kitai.

17Benih mati ba tanah ti rangkai. Nadai agi gandum ditaruh, nya alai tibang ti puang rusak magang.

18Jelu sapi bemunyi laban sida merinsa laban sida nadai agi rumput di padang. Raban bedus mega merinsa.

19Aku nyabak ngagai Nuan, TUHAN, laban api udah makai rumput di menua puang, lalu nganguska semua kayu.

20Indah jelu babas deh nyabak ngagai Nuan laban sungai udah rangkai.

Jump to: Chapter 2 →