Revelation 13

Hakcipta © 2011, The Bible Society of Malaysia

← Chapter 12 Jump to: Chapter 14 →

1Aku lalu tepedaka siku jelu pansut ari tasik. Iya bisi sepuluh iti tanduk enggau tujuh igi pala, enggau sepuluh iti makota ba tanduk iya, enggau nama ti mechat Allah Taala ba pala iya.

2Jelu ti dipeda aku nya baka engkuli. Kaki iya baka kaki beruang, lalu nyawa iya baka nyawa singa. Naga nya meri pengering, enggau kerusi diraja, enggau kuasa iya ti besai, ngagai jelu nya.

3Sigi ari pala jelu nya baka ke udah balat bakal, tang bakal nya udah gerai, lalu semua orang di dunya tu bela nitihka jelu nya sereta alit ati.

4Semua orang bela nyembah naga nya, laban iya udah meri kuasa iya ngagai jelu nya, lalu sida nyembah jelu nya, ku sida, “Sapa orang ke sebaka enggau jelu tu, lalu sapa ulih ngelaban iya?”

5Jelu nya lalu diberi kuasa bejaku sumbung sereta bejaku busung ngelaban Allah Taala, lalu iya dikemendarka ngena kuasa nya dalam pengelama empat puluh dua bulan.

6Iya muka nyawa iya lalu bejaku busung ngelaban Allah Taala, ngeleseka nama Allah Taala, enggau endur alai Allah Taala diau, iya nya semua orang ke diau di serega.

7Iya mega dikemendarka nyerang bala nembiak Tuhan, lalu ngalahka sida, lalu iya diberi kuasa atas semua raban bansa, menua, jaku enggau bansa,

8lalu semua orang ke diau di dunya deka nyembah iya, iya nya semua orang, kenyau ari sebedau penumbuh dunya, ti nadai nama ditulis dalam bup pengidup Anak Domba ti udah dibunuh.

9Enti orang bisi pending, awakka iya ninga:

10Enti orang deka ditangkap, iya tetap deka ditangkap. Enti orang deka dibunuh ngena pedang, iya tetap dibunuh ngena pedang. Tu begunaka ati ti tan enggau pengarap ari bala nembiak Tuhan.

11Udah nya aku tepedaka siku agi jelu pansut ari dalam tanah. Iya bisi dua iti tanduk baka anak domba, lalu iya bejaku munyi naga.

12Iya bejalaika semua kuasa jelu ti keterubah, ngarika jelu nya empu, lalu iya mejalka dunya enggau semua orang ke diau dalam dunya, nyembah jelu ti keterubah, ti bisi bakal ti udah gerai.

13Iya ngereja kereja ajih, nyengkaum ngasuh api nurun ari langit ngagai dunya, dipeda semua orang mayuh.

14Lalu iya nipu mensia ti diau di dunya ngena kereja ajih ti diasuh kereja iya ngarika jelu nya, ngasuh sida ngaga siku anak patung neladan gamal jelu ti udah bakal laban pedang, tang agi idup;

15lalu iya dikemendarka ngesuhka seput ke dalam anak patung jelu nya, ngambika anak patung nya nemu bejaku enggau munuh semua orang ke enggai nyembah anak patung jelu nya.

16Iya mega mejalka semua orang ke mit, ke besai, ke kaya enggau ke seranta, ti ulun enggau ti ukai ulun, dikelai ngena siti tanda ba jari kanan tauka ba kening sida,

17ngambika nadai orang ulih bebeli tauka bejualka utai enti sida nadai kelai nya, iya nya, nama jelu nya, tauka lumur nama nya.

18Tu begunaka penemu-dalam. Awakka orang ke pintar, ngira lumur jelu nya, laban nya lumur mensia. Lumur nya 666.

← Chapter 12 Jump to: Chapter 14 →