1 Peter 5

ibibio

← Chapter 4 Jump to:

1Ke abaña mme ñyobioawo e-ebaaha ke atu ndufo, ami nnam ebeeñe ami nte keed ke atu mme ñyobioawo, ntiense ndutʌkkọ Krais ye awo keed a-adiikeene iwuana ke ubọọñ e-ediiyaara.

2Edoñño mme akpemedọñ enọ atu edọñ Abasi abaaha ke idak ndufo, ise ammọ nte mme ete-utom, idooho nte inyeenyịk, ado ke unyịmme esịd ndufo naña Abasi ayem ndufo eba; idooho ke idiọọk itọñ akʌk, ado sia emenie udọñ adinam utom;

3ekiinyʌñ ifịk mbon e-eyakka isịn ndufo ke ubọk, ado inịm idem nte uwọdñkpọ inọ atu edọñ.

4Ndin ke ini Ekamba Akpemedọñ adiyaara idem, ndufo eyaebọ anyanya ubọọñ a-mmiidibiarake.

5Kpasʌk ke ukem ado, ñkparawa, isuuk idem enọ mme mbiowo. Afịd ndufo inyʌñ esesịne nsuukidem ke idem inọ keed aken, sia, “Abasi abiọọñọ mme mbon ntañidem, ado anọ mbon e-esuuho idem mfọn.”

6Isuuk idem ndin ke idak akpọsọñ ubọk Abasi ma anye ibenne ndufo anịm ke enyọñ ke ekem ini.

7Etop afịd mfịna a-atịmekede ndufo esịd idot ke anye, sia anye asʌk akere ñkpọ ibaña ndufo.

8Inie mfadidem, inyʌñ ikpeme. Asua ndufo, setan ayoyo nte ekpe akuun ayem awo se anye ata.

9Esọọñọ eda ke mbuọdidem inwana ye anye, sia emediọọñọ ke ubon mme andinịm ke akpanikọ ke afịd ekondo esʌk ebọ ukem ndutʌkkọ ami.

10Ndin Abasi afịd mfọn a-akikoodo ndufo ate edidʌk ke nsi-nsi ubọọñ amọ ke Krais, ke ini ndufo emaekekịt ukuud ke etək ini, ayaamaana idʌt ndufo adat anyʌñ anam enie adudu, nsọọñọnda ye ñkaiso.

11Yak adudu anie anye ke nsi-nsi nsi-nsi, Amen.

12Ñke unwam Saidas, a-ndatta nte anam akpanikọ ayịneka, mmewed imʌk-imʌk ñwed ami nnọ isọk ndufo, adisọọñọ ndufo ukod, ñnyʌñ inọ ndufo ntiense mmi nte ke ami ado ata mfọn Abasi. Esọọñọ eda ke ado.

13Andiba ke Babidọn, e-ekemekke ye ndufo anọ ekọọm, ye Maak ayịn mmi anyʌñ anọ ekọm.

14Ekọọm emọ-emọ ke utʌm inua ake ima. Emem anie afịd ndufo e-ebaaha ke Krais.

← Chapter 4 Jump to: