James 5

ibibio

← Chapter 4 Jump to:

1Idahami, ekpañ utọñ, ndufo mme imọ awo, etua ndin, ebọñ ñkpo ke ntak ukuud a-abooho idisịm ndufo.

2Imọ ndufo a-abu, ndin utañkpọ anyʌñ ata mme afọñ ndufo.

3Mme kood ye mme Sịrifa ndufo edoñño ñkanafañ. Mme ñkanafañ ado eyaetie ntiense ibaña ndufo enyʌñ eta abʌkidem ndufo nte ikañ. Ndufo emekoono imọ ndufo ediip ke mme akpatre usen.

4Sese! Mme akʌkutom a-ndufo mmiikpeeghe mme awo e-namma utom utem inwañ ndufo esʌk etua ayịd ibaña ndufo. Abọọñ Andikpon Ñkan a-akop ayịd mme adọkidọk etuaaha.

5Ndufo emedʌñ mi ke isọñ ke akwa udia uwem ye ukop idem inem. Ndufo emetịt idem ema ke usen abaak.

6Ndufo emebiom ikpe e-enyʌñ ewọt ke afai ye anana ndudue e-mmibiọọñọke ndufo.

7Inie ime ndin, nditọete, tutu Abọọñ adi. Se naña atọ inwañ abet isọñ nọ asiooño ata eti nsọñudua mfịd ndin naña anye anie ime abet utịd ndaeyo mme ini editọọñọ edịm.

8Ndufo ñko, enie ime enyʌñ enie nsọñọnda, sia adidi Abọọñ ekpere.

9Ekiidukụụñọ ibaña keed aken, nditọete, mmiidooho ntodo eyaekpe ikpe inọ ndufo. Andikpe ikpe ada ke inuausʌñ.

10Nditọete, nte uwọdñkpọ ume ime ke iso ndutʌkkọ, idat mme brọfed e-eketañña ikọ ke anyịñ Abọọñ.

11Daña ndufo ediọọñọ, ñnyịn imikịt ke ediọñ mbon e-ekịtte ukuud ado esʌk enie ime. Ndufo emekop ebaña unie ime Yoob, ndin emekịt se Abọọñ akenam ke akpatre. Abọọñ ayọhọ ye mbọm anyʌñ atua awo mbọm.

12Ke akanna ado, mme nditọete mmi, ikiinwọñọ unwọñọ, me ke abio Abasi me ke isọñ me ke ñkpọ keed ake adodo. Yak, “Ih” ndufo ado Ih, ndin “Iyo-o” ndufo anyʌñ ado Iyo-o, mmidooho ntodo eyaubiom ikpe.

13Nte aba awo ke atu ndufo a-anieeghe mfịna? Anye ana abọñ akam. Aba awo ke atu ndufo e-esịd anemme? Yak anye akwọ ikwọ itooro.

14Me aba awo ke atu ndufo a-adọñọke? Anye ana akood mme mbioawo ufọkabasi nọ ebọñ akam ke iwuod amọ, ndin eyet anye adan ke anyịñ Abọọñ.

15Ndin akam e-ebọññọ ke mbuọdidem ayaanam idem asọñ adọñọ udọñọ; Abọọñ ayaabenne anye ke enyọñ. Akpedo anye anam idiọọkñkpọ, eyaefeen enọ anye.

16Ke ntodo, eyaara idiọọkñkpọ ndufo enọ keed aken enyʌñ ebọñ akam enọ keed aken nọ atoodo ekọk ndufo udọñọ. Akam adinen awo asọñ adudu anyʌñ anam ñkpọ.

17Edaiya akedo awo nte ñnyịn. Anye amaabọñ akam ke ayọhọ udọñ esịd abo edịm akuudep, ndin edịm ikideppe ke isọñ ke isua ita mme ubaak.

18Ñko anye amaabọñ akam, ndin mme abio ubọọñ Abasi emaenọ edịm, ndin isọñ amaanwịm mme mfịd.

19Mme nditọete mmi, adieke keed ke atu ndufo awuọọhọ akpọñ usʌñ akpanikọ ndin awo keed mfen amaana adat anye atịmme adi,

20itoiyo ami: Awo ake adodo a-awọññọke anam idiọọkñkpọ asio ke usʌñ idiọọkñkpọ amọ ayaanyaaña anye asio ke ñkpa anyʌñ afʌk mme uwak idiọọkñkpọ amọ.

← Chapter 4 Jump to: