bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ibibio
/
ibibio
/
Luke 1
Luke 1
ibibio
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 2 →
1
Uwak mme awo edomo ukeme adiwet mbʌk ñkpọ se ikitịppe ke ufọọd ñnyịn,
2
ukem-ukem naña mbon se ikikịt inyʌñ ikwọrọ mme ñkpọ ado eketañ inọ ñnyịn.
3
Ami ñko mmedat anyan ini ñkeene mbʌk ami usʌk-usʌk tọọñọ ke aditọọñọ. Ndin, Ete Tiofidọs, idahami ñyem adinekke ñwet mbʌk ami unọ fiin,
4
nọ ato do afo anekke adiọọñọ se ido akpanikọ ke mme ukpeebñkpọ a-afo abọọhọ.
5
Ke ini Herọd akedooho adidem ke Yudia, aku keed amaaba a-akekereke Sakaraya, a-akesịneke ke ikpeghe aku Abiya; anwaan amọ a-akekereke Edisabed, akenyʌñ ato ubon Erọn.
6
Ammọ awo iba emaenam se ifọn ke iso Abasi, esaña ke afịd mme ibed ye ewʌghọ Abọọñ Abasi, enana ndo.
7
Ado ammọ ikinieeghe ayịn, sia Edisabed akedo ada, ñko ammọ emaesọñ.
8
Ke ini ikpeghe mme aku ake Sakaraya akenieeghe adinam utom, ndin Sakaraya ke idem amọ akeba ke utom nte aku Abasi,
9
nte ido mme aku akesidooho, emaetop ukañ ndin emek anye ete adʌk tembịd Abọọñ afọp insensi.
10
Idaha ufọb insensi amaakekem, afịd awo emaeda ke anwa ebọñ akam.
11
Ndin enyere Abọọñ amaawọt anye idem, ada ke ubọk nnasia itie unam uwa insensi.
12
Idem amaanyeñ Sakaraya ke ini anye akekịtte enyere ami, ndịk amaañyʌñ anam anye.
13
Ado enyere amaabo anye: “Sakaraya, kuufeghe ndịk, sia Abasi akop akam mfo. Anwaan mfo Edisabed ayaaman ayịn awodeen unọ, ndin afo uduukood anye Yọọn.
14
Afo ayaakop idaara ye inemesịd, uwak awo ñko eyaedaara ke emana amọ,
15
sia anye adido akwa awo ke iso Abọọñ. Anye idiinwọññọ mmịn me ukọd a-anaama awo, ñko anye ayaayọhọ ye Adisana Sịbidịd tọọñọ ke idịb eka amọ.
16
Anye ayaanam umiañ nditọ Isred etịmme ebịne Abọọñ Abasi ammọ.
17
Ndin anye ayaaboiyo Abasi iso ke sịbidịd ye adudu Edaiya, nọ anye anam esịd mme ete ewọññọ ese nditọ ammọ, anyʌñ anam mbon ntịdutọñ ekpeeb ifiọk eto mme anam unen, anyʌñ abeeñe mme awo idem anọ Abọọñ Abasi nte adotto.”
18
Ado Sakaraya amaabịp enyere ate, “Ami ndiidat nso-o ndiọọñọ ke ñkpọ ami ayaado ntodo? Ami ndo akaan adeen, anwaan mmi anyʌñ asọñ ke isua emana.”
19
Enyere amaabo anye ate, “Ami ndo enyere Kebreed andaaha ke iso Abasi; endọọdọñ ebo nditañ ikọ unọ ñnyʌñ mben eti mbʌk ami usọk.
20
Do ndin, afo ayaado imuum, uduutañña ikọ tutu usen ñkpọ ami amaadisu, sia afo ukunịmme ikọ mmi ke akpanikọ, a-adooho ayaasu ini amaakem.”
21
Mme awo e-ekedaaha ke anwa ebet Sakaraya emaeba ke ñkpaidem ke anye adikpeene adiwuọ ndi ke tembịd.
22
Ke ini anye amaake awuọ adi, anye ikikanna itañ ikọ inọ ammọ. Ato ke ado, ammọ emaediọọñọ ete ke anye amaakịt ñkukịd utịbe ñkpọ ke tembịd, sia anye aketañ ikọ anọ ammọ ke ubọk sia anye akedidooho imuum.
23
Ke ini utom ammọ ke tembịd amaakekweeñe, anye amaadinyọñ ufọk amọ.
24
Akekem anwaan amọ Edisabed amaadiyommo, ado ke afịd afiọñ ition anye ikiwuọọhọ añwa.
25
Anye amaanyʌñ abo, “Abọọñ anam ami annọ miin, sia idahami anye añwọt miin mfọn amọ anyʌñ añkwokko abuud a-ñkediaaha ke atu awo.”
26
Ke ayọhọ afiọñ itiokeed tọọñọ Edisabed akeyommo, Abasi amaadọñ enyere Kebreed aka Nasared, ke abio Kadidi,
27
abịne adisịre abọikpa, a-Yosef awo ufọk Defid akeyemme idọ. Adisịre abọikpa ado akekere Mmeri.
28
Enyere ado amaakebo Mmeri ate, “Mmekọọm-o, afo a-ayọhọke ye mfọn; Abọọñ mmọdo ye afo.”
29
Esịd amaatịmede Mmeri eti-eti ke ikọ ami, ndin anye akere se utọ ekọm ami akpewuọọñọ.
30
Ado enyere amaabo anye ate, “Mmeri, kuunie ndịk sia Abasi afọn ido ye afo.
31
Afo ayaayommo idịb anyʌñ aman ayịn awodeen, ndin afo uduukood anye Yisọs.
32
Anye ayaanie uku; ediikood anye Ayịn Abasi Andikoñ Ñkan. Abọọñ Abasi ayaanọ anye ebekpo ete amọ Defid,
33
anye ñko ayaakara ikọd ufọk Yekọb ke nsi-nsi, ndin ubọọñ amọ idiinieeghe utịd.”
34
Ndin Mmeri amaabịp enyere ate, “Ñkpọ ami adisaña die itịppe sia ami ndo adisịre abọikpa (a-mmendiọọñọke awodeen)?”
35
Ado enyere ate anye, “Adisana Sịbidịd ayaadudoro fiin ke idem, ndin adudu Abasi Andikoñ Ñkan ayaufʌk fiin. Ke ntodo, ayịn afo u-uduuman adido adisana, ediikood anye Ayịn Abasi.
36
Kap se Edisabed, ayakka mfo e-ekekoodo ada, anyʌñ ayommo ayịn awodeen ke ini usọñ amọ. Idahami anye asaña ye idịp afiọñ itiokeed.
37
Sia ikọ baaba keed a-atooho Abasi ikemekke adibiaaña.”
38
Mmeri amaabọọrọ anye ate, “Ami ndo ayịnufọk Abọọñ Abasi, yak atịppe annọ miin kpa naña afo atañ.” Ndin enyere amaadakka akpọñ anye.
39
Ami amaakedikweeñe, Mmeri amaadibeeñe idem asọp aka idʌñ keed ke mbood-mbood abio Yudia,
40
aka ufọk Sakaraya anyʌñ akọọm Edisabed.
41
Edisabed akekop uyo ekọọm Mmeri, ayịn amaatuak ke idịb amọ; anye amaanyʌñ ayọhọ ye Adisana Sịbidịd.
42
Ndin Edisabed amaakwaha ñkpo idaara ate, “Afo ke Abasi adiọñ akan ke atu ibaan, anyʌñ adiọñ mfịd idịb mfo.
43
Ami nsaña die ndot utọ ukpono ami nọ afo nte eka Abọọñ mmi adinse miin?
44
Kpa idaha-idaha ado ami ñkoppo uyo ekọọm mfo, ayịn amaantuak ke idịb anọ idaara.
45
Adidiọñ anie anye ami anịmme ate ke mme enwọñọ ami Abọọñ Abasi akenamma anọ anye ayaadisu.”
46
Ndin Mmeri ate: “Ukpọñ mmi atooro Abọọñ
47
ñko sịbidịd mmi adaara ke Abasi Andinyaaña miin,
48
sia anye akoppo mbọm abaña usuuho itie afʌnanwaan amọ. Tọọñọ ke ami afịd emana eyaentommo miin nte anye ami Abasi adiọññọ,
49
sia anye a-anieeghe adudu anam ñkpoon-ñkpoon ñkpọ annọ miin, ndin anyịñ amọ ado adisana.
50
Mbọm amọ aba ye mbon e-ebaaha anye, tọọñọ ke emana keed tutu asịm emana mfen.
51
Anye awọt adudu ubọk amọ; asuan mbon ñkịdidem ke mme akikere esịd ammọ.
52
Anye adooro mme adaubọọñ ke ebekpo ammọ, anyʌñ adịppe mbon usuuho itie.
53
Anye ayʌkkọ mbon abiọñ ye nti ñkpọ, anyʌñ abịn mbon imọ enyọñọ ubọk ukpọk.
54
Anye anwam Isred ikọd amọ, ke aditoiyo ntua mbọm
55
naña anye akenwọñọ anọ Ebraham ye ikọd amọ ke nsi-nsi, naña akenyʌñanwọñọ anọ mme eteete ñnyịn.”
56
Mmeri amaakaiso aba ye Edisabed ke ñkpọ nte afiọñ ita mbemiso atịmme anyọñ ufọk amọ.
57
Ini amaakedikem Edisabed adiman ayịn, anye amaaman ayịn awodeen.
58
Mme mbọhọidʌñ ye imaan amọ ekekop ete ke Abọọñ atua anye mbọm, ammọ emaedaara ye anye.
59
Ke ayọhọ usen itiaita, emaedi adikpịkke ayịn mfed ñnyʌñ nsio anye anyịñ, ekeyem adikood anye Sakaraya, ñkeene anyịñ ete amọ,
60
ado eka amọ amaafaaña ate, “Iyoo! Idooho ntodo, anaekood anye Yọọn.”
61
Ado mme awo emaebo anye ete, “Ibaaha awo ke ekpək ndufo a-akereke utọ anyịñ ami.”
62
Do ndin enam idiọọñọ enọ ete amọ adibịp anye se anyịn anye akpeyem esio ayịn amo.
63
Sakaraya amaabịp anyʌñ abọ itiad ñwed awet: “Anyịñ amọ ado Yọọn.” Ndin idem amaakpa afịd ammọ.
64
Kpa idahado, inua amọ amaakʌppọ, edeme amọ anyʌñ atara, ndin anye amaatọọñọ itañ ikọ ntooro Abasi.
65
Akedo ata utịbe ñkpọ anọ mme mbọhọidʌñ, ndin afịd mme andidʌñ ke mbood-mbood abio Yudia eketañ ebaña mme ñkpọ ami.
66
Afịd mbon se ikikop mme ñkpọ ami emaekere ke esịd ammọ ete, “Me nso-o ke ayịn ami adido?” Sia ubọk Abọọñ Abasi mmọdo akeba ye anye.
67
Sakaraya amaayọhọ ye Adisana Sịbidịd, ndin anye atañ brọfesi ate:
68
“Itooro anie Abọọñ Abasi Isred, sia anye adise anyʌñ afak ikọd amọ.
69
Anye awuuk adaha adinyaaña inọ ñnyịn ke ufọk Defid ayịnufọk amọ,
70
(kpa naña anye aketañ ke inua mme ndisana brọfed amọ tọọñọ ke ini esed),
71
ate ke iyainyaaña ñnyịn isio ke ubọk mbon usua ñnyịn, ye mbon a-ammiimaaha ñnyịn,
72
ke adiwọt mbọm anye akenwọñọke anọ mme eteete ñnyịn ye aditoiyo adisana adioomo amọ,
73
enwọñọ ami anye akenwọñọke anọ ete ñnyịn Ebraham:
74
ate imọ iyaisio ñnyịn ke ubọk mme asua ñnyịn nọ ato do inam ñkpọ inọ anye ke unana ndịk,
75
ye ke adisana ye unenido ke iso amọ afịd ayo uwem ñnyịn.
76
“Ndin afo ayịn mmi eduukood brọfed ake Andikoñ Ñkan; sia afo ayaabem Abọọñ iso akediọñ usʌñ anọ anye,
77
nọ ato ke adifeen mme idiọọkñkpọ ammọ, ikọd amọ ediọọñọ ebaña adinyaaña Abasi,
78
ato ke esịd mbọm Abasi ñnyịn, utịn asakka ato anyọñ inọ ñnyịn,
79
nọ anam unwaña asịm mbon e-ebaaha ke akịm ye ñkịmayo ñkpa, anyʌñ akpeme ikpad ñnyịn asịn ke usʌñ emem.”
80
Ayịn ado amaakọt anyʌñ akop adudu ke sịbidịd: anye ñko akedʌñ ke akpautatan tutu akem ini a-anye akeyaarake idem amọ anwa-anwa anọ Isred.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24