bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ibibio
/
ibibio
/
Mark 4
Mark 4
ibibio
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 5 →
1
Ini mfen Yisọs amaana atọọñọ ukpeebñkpọ ke mben ibiok. Atu awo e-ekekannake anye ekʌk amaakpon tutu adido se anye akedʌk ubom ke ibiok ami ateetie, ke ini afịd mme awo ekedudakka ke mben mmọọñ ami.
2
Anye akekpeeb ammọ uwak ñkpọ ke ñke, kukpeeb ñkpọ amọ anye abo ntom:
3
“Ikpañ utọñ! Atọ inwañ keed akeka itọ ñkpasi ke inwañ amọ.
4
Naña anye akeasuanna ñkpasi ado, usʌk eduọññọ ke akpọusʌñ, ndin mme inuen edikoono ammọ etaha.
5
Usʌk eduọññọ ke isọñ itiad, isọñ a-mmiifọnnọ ñkpọ. Ammọ etịppe usọp-usọp, sia isọñ ikitʌñọke.
6
Ke ini utịn amaakesakka, adimia ammọ, ammọ ema eyeeme sia ammọ ikiinieeghe adʌñ.
7
Usʌk ñkpasi ekeduọññọ ke ikọd ñkukịm, e-ekekọttọ efʌk ammọ, anam ammọ ikinieeghe mfịd.
8
Usʌk ñkpasi mfen emaeduọññọ ke eti isọñ. Ammọ etịppe, ekọọd, enyʌñ enwịm abek mfịd a-akewakka, usʌk edịp ye duop, usʌk ata, usʌk enyʌñ enwịm ñkañ ikie.”
9
Ndin Yisọs abo ate, “Ake anie utọñ adikop, yak anye akop.”
10
Akem ke ini Yisọs abaaha ikpọọñ ke idem amọ, mme mbed duop ye iba ye mme mbio e-ekebaaha ekpere anye emaebịp anye ñkpọ ebaña mme ñke ado.
11
Anye amaabọọrọ ammọ ate, “Eyaak mme ndịbe ñkpọ abio ubọọñ Abasi ịnọ ndufo. Ado amaado mbon mfen, etañ afịd ñkpọ ke ñke enọ ammọ
12
nọ ato do, “ ‘ammọ ekeme isese ñkpọ ado ikịtte, enyʌñ ekookop ado inwañake ammọ, mbaak ammọ edikappa esịd nọ ato do efeen enọ ammọ.’ ”
13
Ndin Yisọs abo ammọ ate, “Ñke ami iñwañake ndufo? Ñke afen aboinam die iñwaña ndufo?
14
Atọ inwañ ke ñke ami atọ ikọ Abasi.
15
Usʌk awo eba nte ñkpasi e-eduọññọke ke akpọusʌñ ke emaetọ ikọ Abasi. Ammọ emaesʌkikokop ikọ Abasi, Setan adi adiben ikọ e-eketọọhọ ke esịd ammọ afep.
16
Mbio mfen eba nte ñkpasi e-etọọhọ ke isọñ itiad, ammọ ekop ikọ Abasi enyʌñ enemesịd ke ata idaha ekoppo do.
17
Ado sia ammọ mmiinieeghe adʌñ, ikọ Abasi ikpeeneke ke esịd ammọ. Mfịna ye ndutʌkkọ emaedi ke ntak ikọ Abasi, ammọ eduọññọ usọp-usọp ekpọñ usʌñ Abasi.
18
Nko mbio mfen etie nte ñkpasi e-eduọññọke ke ikọd ñkukịm, ammọ ekop ikọ Abasi;
19
ado mfịna ederimbod, mme abiaaña a-atooho inie ye udọñ mme nsio-nsio ñkpọ mfen edʌk edi, edikọt efʌk ikọ Abasi, ekọp mfịd ikọ, iyakka anye anwịm.
20
Ndin mbio mfen etie nte ñkpasi e-etọọhọ ke eti isọñ; ammọ ekọp ikọ Abasi, ebọ anye, enyʌñ eñwuum abek mfịd e-ewakka ñke edịp ye duop, ñke ata, mme ñke ikie ekan se eketọ.”
21
Akem Yisọs amaabịp ammọ ate, “Ndufo esidomo ikañ eben usan efʌk me esinịm ke idak ikʌk? Ndufo isidooho emaedomo ikañ eben edot ke ñkpọ udot utuenikañ?
22
Sia ñkpọ keed ake adodo edịppedịp, eyaeyaara, se adodo efʌkkọfʌk eyaefʌkkọ.
23
Awo ake adodo a-anieeghe utọñ adikop, yak akop.”
24
Ndin Yisọs amaaka iso atañ ate: “Itʌm inekke ikere se ndufo ekop ami, se adodo ndufo edomoke enọ awo, kpa ado ke ediidomo inọ ndufo, mmiidooho akan se ndufo ekedomo enọ awo.
25
Awo ake a-anieeghe ñkpọ, eyaemaana edian enọ anye, ado awo ake mmiinieeghe, eyaebọ idem se anye anie.”
26
Ñko anye amaana abo ate, “Abio ubọọñ Abasi aba nte awo asuana ñkpasi ke isọñ.
27
Me akoneyo-o, me uweeme-o, me anye adadaiya, me adedemme-o, ñkpasi ado asʌk atịppe anyʌñ akọt akpesʌk ado anye mmiidiọọñọke naña asaña.
28
Isọñ ke idem amọ ikpọọñ anam akpakpa anwịm idem, emịne atịppe ama iwuod, ke akpatre afịd idem ye mfịd ewuọñọ eda eto isọñ ke idem ammọ.
29
Mfịd amaakedat, atọ inwañ a-aban ikwa adakka adikpịkke sia ini idọk akem.”
30
Anye amaana abo ate, “Ñnyịn idiibo ke abio ubọọñ Abasi aba die, idiidat nso-o utọ ñke itaañ iwọt se abio ubọọñ ado?
31
Aba nte ñkpasi mọstad, a-dooho andisịp ñkan ke atu afịd ñkpasi ke ederibod.
32
Ado emaetọ ima anye atịppe, akọt adikpon akan afịd eto ke inwañ esa anyʌñ anieeñe ata ikpọ ñkọk tutu adido se mme inuen anyọñ edi edusọọd ke mfuud amọ.”
33
Yisọs amaadat uwak ñke ntom akwọrọ ikọ Abasi anọ ammọ akeene naña akenwaaña ammọ.
34
Anye ikitañña ikọ ndomokeed ye ammọ mmiidooho ke ñke. Ado anye amaaba ye mme mbed amọ ikpọọñ, anye amaanam afịd ñkpọ anwaña ammọ.
35
Ke ndubi usen ado, anye amaabo mbed amọ ate, “Yak ñnyịn ibiyo mmọọñ ibiok ami ika edem uko.”
36
Ke ammọ emaekekpọñ mme atu awo, mme mbed amọ edʌk ubom ami Yisọs amaakedọdʌk ndin ammọ eben anye edakka. Mme ubom mfen emaeba do ñko ye anye.
37
Ata akpọsọñ ayobio amaatọọñọ tutu udakka akpa mmọọñ abʌññọ adʌk ubom abiikiyọhọ esịd ubom.
38
Afịd ini ami, Yisọs akeba ke itak ubom asʌk adaiya idap ke udod iwuod. Ndin mme mbed amọ emaeditọi anye ke idap ebo anye ate, “Andikpeeb, awuọ ufịnake fiin adieke ñnyịn ideññe?”
39
Anye amaademme, asua anọ ayobio anyʌñ abo udakka akpa mmọọñ ate, “Dop! Naa sʌñ!” Do ndin ayobio atre, anyọñ anyʌñ adobo biai afịd-afịd ukeed.
40
Ndin anye amaabo mbed amọ ate, “Ntak idem inyeññe ndufo ntodo-o? Awuọ ndufo isʌkkọ inie mbuọdidem?”
41
Ndịk amanam afịd ammọ ndin ammọ enyʌñ edubịppe idem ete, “Anie awo idodo ami? Tutu afịm ye mme udakka akpa mmọọñ ekop uyo enọ anye!”
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 5 →
All chapters:
1
2
3
4
5
6
7
8
9
10
11
12
13
14
15
16