2 John 1

Ika 2018 Bible

Jump to:

1Mmẹ wụ onyẹ-isi de ẹkụkwọ-ozini. M rị e deni okpoho hụ Osolobuẹ họrị lẹ ụmụ a. Ndị ihiẹn wẹ a sụọ m ebe Ezioku rị kẹ wẹ wụ, ẹlẹdẹ mmẹ sụọ nwọn ihiẹn-ọsụsụọ wẹ kanị ndị ile marịn Ezioku,

2makẹ Ezioku ahụn rị imẹ ndụn ẹnyi hụn k'a rịsọnmẹ ẹ jẹnrin ejẹn.

3Ẹfọma lẹ omikẹn lẹ udọn, hụn gha ẹka Chuku-Nẹdi lẹ Nwa a wụ Jizọs Kraịstị a bịa, ya rịsọnmẹni ẹnyi, kẹ ẹnyi dọn rị e gi ezioku lẹ ihiẹn-ọsụsụọ e bi.

4Ẹfọ sụọ m ụsụọ ọda-ọda kẹ m chọpụha nị o nwọn ụmụ ị ndị rị e bi imẹ Ezioku nọkẹ kẹ Nẹdi ẹnyi dọn gwa ẹnyi.

5M rị nwan a rịọ ị, ezi okpoho, arị m e den'i iwu ọhụn kanị iwu ohu ahụn o ye ẹnyi gha alị lala: nị ẹnyi e nwọn ihiẹn-ọsụsụọ ibe ẹnyi.

6Ihiẹn-ọsụsụọ wụ nị ẹnyi hụ e mẹ ihiẹn o ku; ịya wụ iwu hụ — nọkẹ kẹ ụnụ dọn nụ a gha alị lala nị ụnụ k'e girịrị a e bi.

7Ndị-ndufie bu ọda a bangụọ imẹ ụwa. Ndịnị ara kweri nị Jesu Kristi gi ẹhụ ịhịan bịa. Onyẹ nọ ẹnịna wụ onyẹ-ndufie hụ lẹ Eṅẹnrẹn-Kraịstị hụ wụ anti-Kraịstị!

8Kpachanpụ nị nwan ẹnya, amamgbe ụnụ e tuhu ihiẹn ẹnyi rụngụ; turusọnmẹ ni kẹni ụnụ nwọnhẹn ụgwọ ọrụn zu oke.

9Onyẹ fe mgbọn, hụn nke o gi nọdị ebe nkuzi Kraịstị dọnmẹ ẹ, hụnyẹ enwọn Osolobuẹ. Kanị onyẹ hụn sọnsọnmẹ nkuzi Kraịstị k'o dọn rị e nwọnghọ kẹ Chuku-Nẹdi kẹ Nwa Chuku.

10Onyẹ bịa d'e kunrun i bụ ẹlẹ ihiẹn Kraịstị kuzi k'o gi bịa, anabanhanl'a iwe i mọbụ kele ẹ.

11Makẹni, onyẹ kelen'ẹ rị e sọn ẹ a rụn eje-ọrụn ọ rị a rụn.

12M nwọn ihiẹn bu ọda nkẹ m'e deni ụnụ, kanị ẹlẹ hụn m k'e de. Kama, m rị a tụ ẹnya nị m k'a bịa d'a hụndẹ ụnụ, ẹnyi e ku elee-m, elee-i, kẹni ịghọghọ ẹnyi ile hụn ụzọ zu oke.

13Ụmụ nwẹnẹ i okpoho e zi ekele ụnụ, nwẹnẹ i okpoho Osolobuẹ họrị.

Jump to: