3 John 1

Ika 2018 Bible

Jump to:

1Mmẹ wụ onyẹ-isi de ẹkụkwọ-ozini. M rị e dejẹnni Gayọsụ, ezi nwẹnẹ ẹnyi ihiẹn ẹ a sụọ m imẹ Ezioku.

2Nwẹnẹ-onyẹ, ekpere m wụ nị ihiẹn ile a ghan'ị lẹni ẹhụ a rị ị ikẹn kẹ ị dọn nwan rị a gha ihun imẹ mmọn.

3Ịghọghọ jun m obi ogẹn ụfọdụ umunẹ ẹnyi bịa ebeni gi rị e ku kẹ i dọn wụ onyẹ wẹ gi e dọn ẹnya ebe Ezioku rị, nọkẹ kẹ i dọn rị e bi kẹ Ezioku dọn chọ.

4Onwọnni ihiẹn e mẹ m a ghọghọ nọkẹ ebe m nọ nụ nị ụmụ m rị e bi kẹ Ezioku dọn chọ.

5Nwẹnẹ-onyẹ, y'e mẹkẹ onyẹ wẹ gi e dọn ẹnya imẹ ihiẹnni ị rị e mẹni ụmụ Osolobuẹ ndịnị, ọsụọn'a nị y'a marịn ndị wẹ wụ.

6A nọgụọ wẹ ihun ụka rị ebeni ku oku ihiẹn-ọsụsụọ i nwọn. Dodo, yeni wẹ nwan ẹka hụn a sụọ Osolobuẹ wẹ jẹnkọnị;

7makẹni, imẹ ijẹnni wẹ rị makẹ Ẹfan Kraịstị, arị w'a na ndị kwerilẹnini Jesu ihiẹn.

8O furu nwan nị ẹnyi kwadọn ndị nọ ẹrịra, gi ẹ sọn wẹ rụnnị Ezioku ọrụn.

9E dejẹngụọnị m ụka ẹhụhụọ; kanị Diọtrẹfẹsị hụn a chọ n'ọ kị egọnni ẹnyi ntịn.

10M bịa nwan, m k'e wepụha ihiẹn ile ọ rị e mẹ lẹ ọnụ ọ rị e buokinsọnmẹ ẹnyi! Ọhụn ehidẹn'ẹ, ọ jụ n'ọ nabanhankọ ụmụ Osolobuẹ ndị hụ; ọ nịdẹni ndị ọzọ nabanhan wẹ, ọ chụpụ ndị rị imẹ ụka chọ nị wẹ nabanhan wẹ.

11Nwẹnẹ-onyẹ, elerikwọlẹ eje-ihiẹn, ka leri ihiẹn rị mma. Onyẹ e mẹ ihiẹn rị mma wụ nke Osolobuẹ, kanị onyẹ e mẹ eje-ihiẹn eke marịndẹ Osolobuẹ.

12Kanị ịhịan ile e ku oku Dẹmẹtrịọsụ ọhụnma; Ezioku lẹ enwẹn ẹ e kuzi oku ẹ ọhụnma. Ẹnyi nwẹn rị a shịazịkwọn'a ẹri — bụ y'a marịnghọ nị ẹri ẹnyi wụ ezioku.

13Ihiẹn m chọ nị m gwa ị e bukẹ, kanị, ẹlẹ hụn m'e gi pẹni de;

14m rị a tụ ẹnya nị m jẹnkọ d'a hụn ị ẹgwa, kẹni ẹnyi ku elee-m, elee-i.

15Udọn y'a rị n'ị. Ndị ọwụ ẹnyi ile e zi ekele i. Kpọ ndị ọwụ ẹnyi rị ebẹhụ ẹfan ohu-ohu, kele wẹ.

Jump to: