Colossians 1

Ika 2018 Bible

Jump to: Chapter 2 →

1Mmẹ wụ Pọlụ de ẹkụkwọ-ozini. M wụ onyẹ-ozi pụ-ichẹn Kraịstị wụ Jizọsị, makẹni uche Osolobuẹ rọ. Mmẹ lẹ Timoti nwẹnẹ ẹnyi gba de ẹ.

2Ndị nke Osolobuẹ rị Kolosi, umunẹ furu wẹ gi e dọn ẹnya imẹ Kraịstị, kẹ ẹnyi dejẹnn'ẹ. Osolobuẹ wụ Nẹdi ẹnyi ya mẹni ụnụ ẹfọma, ye ụnụ udọn.

3Ogẹn ile kẹ ẹnyi gi a kpanmịn Osolobuẹ, Nẹdi Onyẹ-nwọnni-ẹnyi wụ Jizọs Kraịstị, ẹnyi gha e mẹni ụnụ ekpere.

4Makẹni, ẹnyi a nụgụọ kẹ ụnụ dọn rị e gi Kraịstị wụ Jizọsị e dọn ẹnya lẹ kẹ ụnụ dọn ri e nwọn ihiẹn-ọsụsụọ ndị nke Osolobuẹ ile,

5ufiri nị ụnụ rị e lee ẹnya ihiẹn hụ Osolobuẹ dọnmẹni ụnụ elu-igwee, hụn ụnụ nụ ogẹn wẹ gi zi ụnụ ozi hụ wụ ezioku, hụn wụ oziọma.

6Oziọma e rugụọ ụnụ ẹka. K'o dọn a mị mkpụrụ, e sue, a ghagbarị ụwa ile, ẹrịra k'o gizi nwan rị a mị mkpụrụ imẹ ụnụ kete ụhụọhịn ahụn ụnụ nụ a, ghọta ẹfọma Osolobuẹ mẹ nke-esi.

7Ọnụ Ẹpafrasị, ezi igbọn Kraịstị ibe ẹnyi kẹ ụnụ nọ nụ oziọmanị. Onyẹ-ọrụn Kraịstị hụn furu wẹ gi e dọn ẹnya hụn rị a rụnnị ụnụ ọrụn k'ọ wụ.

8Ọ gwagụọ ẹnyi kẹ ụnụ nwọnhan ihiẹn-ọsụsụọ hụn gha ẹka Mmọn-nsọ bịa.

9Ya haịn o gi mẹ ni, kete ẹnyi a nụl'a, ẹnyi eke mẹbehikwọnị nwan ụnụ ekpere, a rịọ Chuku n'o mẹ ụnụ marịn uche ẹ ọhụnma-ọhụnma, nwọn amamihiẹn lẹ nghọta imẹ-mmọn, nwọn wẹ mmagi-mmagi,

10kẹni ụnụ e bi obibi furu Di-nwọnni-ẹnyi, obibi hụn a sụọn'a ụzọ ile, a mịpụha mkpụrụ ọrụn ọma ile rị ichẹn-ichẹn, a marịn Osolobuẹ, a marịnwaye.

11Ya gi ikẹn ẹ hụ hi-ogbe hụn e ye ẹ ọghọ mẹ ụnụ kẹnrẹn ụzọ ile, kẹni ụnụ saẹka e kwọnkẹnmẹ okukwe ụnụ, e gi ịghọghọ e dingbu ihiẹn ile,

12a kpanmịn Nẹdi ẹnyi hụn mẹ nwan ụnụ ru ogo ụnụ gi rị ndị nwọn ihiẹn o butọnị ndị-nsọ a makẹni wẹ rị imẹ ukpẹ.

13Ọ zụọpụhagụọ ẹnyi okpuru ishi, bu ẹnyi che Alị-eze ezi Nwa a,

14onyẹ hụn o gi ẹdeke ẹ gbapụha ẹnyi, gbagharị ẹnyi njọ.

15Ẹnya hụn Nwa a nị wụ Kraịstị a hụngụọ Osolobuẹ wẹ ghalẹni e legha; Kraịstị wụzịkwọ Nwa-ibuzọ, Onyẹ-isi hụn ihiẹn ile wẹ ke rị okpuru ẹ.

16Makẹni, ẹka a kẹ Osolobuẹ gha ke ihiẹn ile rị elu-igwee lẹ ụwa: kẹ ndị w'e legha kẹ ndị wẹ ghalẹni e legha; kẹ ukpo ile kẹ ọkịkị ile; kẹ ndị-isi eje-mmọn kẹ ndị-ọkịkị wẹ. Osolobuẹ ke ihiẹn ile ghahan'a; ịya k'o keni wẹ ile.

17Ọ rị arị nị ihiẹn ọwụlẹ d'e bidọn; ịya gi ihiẹn ile.

18Ịya wụ isi ụka hụn wụ ẹhụ a. Ịya wụzị isi mbidọn; ịya wụ onyẹ ibuzọ gha ọnwụn lihi. Wẹ ile k'o gi wụrụ onyẹ ibuzọ lẹ onyẹ-isi ihiẹn ile.

19Makẹni, ọ sụọ Osolobuẹ n'o gi ihiẹn ile o gi wụrụ Osolobuẹ biri imẹ Kraịstị.

20Ọ sụọzịkwọ Osolobuẹ n'ọ gha ẹka a wekinhẹnni enwẹn ẹ ihiẹn ile o ke: kẹ wẹ rị elu-ụwa kẹ wẹ rị elu-igwee, ghahanị ẹdeke ẹ hụn wụ ndụn a ọ nọ elu-obe ye, hụn o gi wẹhẹ udọn.

21Mgbe mbụ, ẹgbata ụnụ lẹ Osolobuẹ arị mma: ụnụ wụ ndị iṅẹnrẹn ẹ yeni iroro ụnụ, ụnụ e bizikwọ eje-obibi.

22Kanị Kraịstị e gigụọ nwan ẹhụ o gi bi elu-ụwanị dọnzi ẹgbata ụnụ lẹ Osolobuẹ, ghahanị ọnwụn a, kẹni o wepụha ụnụ ihun ẹ kẹ ndị rị nsọ, nwọnlẹni nkarụ mọbụ nkọrịanị,

23omẹkwọ nị ụnụ e wuzoghọ ọhụnma, turukẹnmẹ imẹ okukwe; omẹni ụnụ alatọnị olilẹnya hụ rị oziọma ụnụ nụ hụn wẹ zigbarịgụ ndị ile rị okpuru elu-igwee. Ọrụn Oziọmanị kẹ wẹ tumẹ mmẹ wụ Pọlụ d'a rụn.

24M rị nwan a ghọghọ nị m rị a tanị ụnụ afụnfụn, e gi ẹhụ m a tapụnị Kraịstị afụnfụn họdụnị wẹ k'a tanị ẹhụ a wụ ụka.

25Ịya kẹ Osolobuẹ tumẹni m onyẹ-ọrụn ụka; ịya zi m d'a rụnnị ụnụ ọrụn kẹni m gwachanrịn ịhịan ile oku Osolobuẹ,

26mẹ wẹ marịn ihiẹn-omimi hụ Osolobuẹ zuemẹ ketekete, hụn agbọ ile ghafegụnị marịnlẹni, kanị o kpupụ a nwan ghọsị ndị nke ẹ.

27Ọ chọ nị ndị alị ọzọ marịn okẹn ihiẹn-omimini rịgbu enwẹn ẹ mma. Ihiẹn omimi hụ wụ nị ụnụ e nwọngụọ Kraịstị, lemẹ ni nwan ẹnya ọghọ hụ Osolobuẹ k'e ye.

28Kraịstịnị kẹ ẹnyi rị nwan a ghahunmẹ e ku oku ẹ, e gi amamihiẹn ile Osolobuẹ ye ẹnyi a dọ onyẹ ọwụlẹ ẹka-ntịn, a kuzi onyẹ ọwụlẹ, kẹni ẹnyi saẹka wepụha wẹ ile ihun Osolobuẹ nọkẹ ndị ka-ẹhụ imẹ Kristi.

29Ịya kẹ m gi rị a rụnshi iken, e gi ikẹn ahụn ile hi-ogbe Kraịstị gi rị ọrụn imẹ m e shi ọnwụn.

Jump to: Chapter 2 →