Genesis 41 — Ika 2018 Bible

1Ogẹn o gi zuchanrịn ahụa ẹbụọ, eze wụ Fẹro nọ rọ nrọ, hụn enwẹn ẹ ebe o wuzo mkpẹnrẹn Iyi Naịlị;

2ya kẹ efin ẹsa ma mma, nwọn ẹhụ nọ gha Iyi ahụn pụha. Wẹ nọ rimẹ ẹfịfịa ndị rị mkpẹnrẹn Iyi ebahụn.

3A pụhagụ wẹ, ọ nọ hụn efin ẹsa ọzọ kẹ wẹ ghazị Iyi ahụn pụha. Efin ndịnị pụhanị jọ njọ-ẹhụ, mẹ kpogan-kpogan; wẹ nọ wuzoyeni efin ndị ibuzọ ahụn mkpẹnrẹn Iyi ebahụn.

4Efin ndị nwẹn jọ njọ-ẹhụ, mẹ kpogan-kpogan, nọ ripụ efin ẹsa ahụn ma mma, nwọn ẹhụ. Ya kẹ Fẹro nọ tẹnhin.

5Ụran e buruzi ẹ, ọ nọ rọzị nrọ: ọ hụn ọhịọ ọka-witi ẹsa dọ-isi, rị mma rị ukun ọka ohu.

6Ọhịọ ẹsa mẹ wiri-wiri, ufere ọwụwa ẹnyanwụn sekpọgụ, nọzị mịpụha cheni wẹ.

7Ọhịọ ẹsa ahụn mẹ wiri-wiri nọ luepụ ọhịọ ẹsa ahụn dọ-isi, rị mma. Ogẹn Fẹro gi tẹnhin, ọ nọ hụn a nị nrọ rọ.

8Eki e fọn, obi eruni Fẹro alị; ọ nọ zi wẹ d'a kpọhan'a ndị ile a gbanị wẹ ẹfa imẹ alị Ijiptu, kẹ ndị dibiẹ kẹ ndị marịn ihiẹn. Ya Fẹro nọ ziẹnni wẹ nrọ ndị ahụn ọ rọ, kanị onwọnni onyẹ sa ẹka kọwan'a nrọ ndị ahụn.

9Ya kẹ onyẹ-isi ndị e buye Fẹro manya nọ sị Fẹro, “Agụ, ihiẹnni mẹ tannị a nyanhangụọnị m mmẹfie m!

10Ogẹnnẹi i gi buni ẹnyi ndị idibo i olulu, ị nọ kpọkin mmẹ lẹ hụn te kị ndị e shin'i brẹdi ye iwe onyẹ-isi ndị-nche.

11Uhinhin ohu, ẹnyi ẹbụọ nọ rọ nrọ; onyẹ-onyẹ lẹ nrọ a lẹ ihiẹn ọ wụ.

12O nwọn okorọbịa onyẹ Hibru ẹnyi lẹ ya rị ebahụn, odibo onyẹ-isi ndị-nche rọ. Ogẹn ẹnyi gi ziẹnn'ẹ nrọ ẹnyi rọ, ọ nọ kọwanị ẹnyi wẹ, kọwasọnmẹni ẹnyi ihiẹn nke onyẹ-onyẹ wụ.

13K'ọ kọwanị ẹnyi nrọ ndị ahụn k'o dọn mẹchanrịn: E wekinhẹn wẹ m ọkwa m, e hogbu wẹ hụn wẹ kpọkin mmẹ lẹ ịya ye.”

14Ya kẹ Fẹro nọ zi wẹ d'e wẹhẹ Josẹfụ. Wẹ nọ gha imẹ-imẹ ụlọ-ngan wepụha Josẹfụ ozigbo-ozigbo. Ọ kọchanpụ ẹtu ẹ, yiri ẹkwa ọzọ; ọ nọ bịa ihun Fẹro.

15Fẹro nọ sị Josẹfụ, “O nwọn nrọ m rọ, kanị onwọnni onyẹ sa ẹka kọwanị m'a. Kanị, a nụgụọ m kẹ wẹ ku ẹ nị wẹ ziẹnn'i nrọ, y'a sa ẹka a kọwa a.”

16Josẹfụ nọ sị Fẹro, “Mmẹ nwẹn asakọ ẹka mẹ ẹ; kanị, Chuku k'a kọwanị Fẹro ya kẹni obi ru Fẹro alị.”

17Fẹro nọ sị Josẹfụ, “Imẹ nrọ, m wuzo mkpẹnrẹn Iyi Naịlị;

18ya kẹ efin ẹsa ma mma, nwọn ẹhụ, nọ gha imẹ Iyi ebẹhụ pụha. Wẹ nọ rimẹ ẹfịfịa ndị rị mkpẹnrẹn Iyi ebahụn.

19O mẹgụ efin ẹsa ọzọ nọ ghazị imẹ Iyi ahụn pụha. Efin ndị ikpanzụụnnị pụhanị jọ njọ-ẹhụ, mẹ kpogan-kpogan. Ahụntuni m efin jọ njọ-ẹhụ ẹrịra imẹ alị Ijiptu.

20Efin ndị nwẹn jọ njọ-ẹhụ, mẹ kpogan-kpogan, nọ ripụ efin ẹsa ahụn buzọ pụha, ndị ahụn ma mma, nwọn ẹhụ.

21Kanị, kẹ wẹ rigụ wẹ, onwọnni onyẹ k'a marịn nị uwẹ ri ihiẹn han ẹrịra, makẹni kẹ ẹhụ wẹ rị mbụ k'ọ rịzịkwọ. Ebẹhụ kẹ m nọ tẹnhin.

22“Imẹ nrọ, m hụnzị ọhịọ ọka-witi ẹsa dọ-isi, ma mma, hụn rị ọka-witi ohu.

23Ya kẹ ọhịọ ẹsa kpọgụ nkụn, mẹ wiri-wiri, ufere gha ibe ọwụwa ẹnyanwụn sekpọgụ nọ mịpụhazị cheni wẹ.

24Ọhịọ ọka ndị nwẹn mẹ wiri-wiri nọ luepụ ọhịọ ẹsa ahụn rị mma. “E ziẹngụọnị m ndị ile a gba ẹfa ya, onwọnni onyẹ s'ẹka kọwanị m ihiẹn ọ wụ.”

25Ya Josẹfụ nọ sị Fẹro, “Nrọ ndịnị ị rọ wụhụ ohu: Chuku a ghọsịgụọ Fẹro ihiẹn Chuku jẹnkọ d'e mẹ:

26efin ẹsa ahụn ma mma wụ ahụa ẹsa; ọhịọ ọka-witi ẹsa ahụn ma mma wụ ahụa ẹsa. Nrọ ndị ahụn wụ ohu.

27Efin ẹsa ndị ahụn mẹ kpogan-kpogan, jọ njọ-ẹhụ, hụn pụha cheni wẹ, lẹzi ọhịọ ọka-witi ẹsa ahụn mẹ wiri-wiri hụn ufere gha ibe ọwụwa ẹnyanwụn fehẹ sekpọgụ wụ ahụa ẹsa ụnwụn jẹnkọ d'a mụ.

28“Ọ rịhụ kẹ m dọn gwa Fẹro: Chuku a ghọsịgụọ Fẹro ihiẹn Chuku jẹnkọ d'e mẹ.

29Ihiẹn-oriri k'a barahị alị Ijiptu ile ọrọgbọ ahụa ẹsa.

30Kanị, ahụa ẹsa ahụn gharịgụ, ụnwụn k'a mụ ọrọgbọ ahụa ẹsa e sọnn'ẹ — mụ nke wụnị anyanhankọzị wẹ ihiẹn-oriri ahụn barahịnị alị Ijiptu ile; ụnwụn ahụn k'e mẹ alịnị ihiẹn.

31Ọ nịkọzị wẹ nyanhan nị ihiẹn-oriri te barahị alịnị, makẹni ụnwụn ahụn k'e sọnn'ẹ k'e kẹnrẹn ọda-ọda.

32Ihiẹn Fẹro gi rọhụn ihiẹnni mgbe ẹbụọ wụ nị Chuku a kwademẹgụọ n'o jẹnkọ d'e mẹrịrị ihiẹnni, lẹzi ni Chuku k'e mẹ ẹ ẹgwa.

33“Fẹro ya dodo chọrịkwọ nwan onyẹ ohu ẹnya e ru alị, marịn ihiẹn, n'ị we alị Ijiptu che ẹ ẹka;

34Fẹro ya tumẹsọnmẹzikwọ ndị-ọrụn imẹ azụụn ichẹn-ichẹn rị alịnị, bu okuni che wẹ ẹka, nị wẹ a narịnsọnmẹ ịhịan ile ụzọ-ohu imẹ ụzọ-isẹn imẹ ihiẹn-ugbo wẹ rụnpụha imẹ alị Ijiptu, ọrọgbọ ahụa ẹsa ahụn lalanị ihiẹn-oriri e gi barahị, e bu hụn wẹ nahan e dọnmẹ.

35Wẹ nakikomẹ ihiẹn-oriri k'a pụhanị dọnmẹ ọrọgbọ ahụa ẹsa ahụn ihiẹn e gi rị mma lalanị, bu ọka wẹ na che okpuru Fẹro, butọsọnmẹ ẹ imẹ obodo ndị shịa ẹfọ, o ru ogẹn hụ, a hụn wẹ ri.

36Wẹ dọnmẹtọnị alịnị ihiẹn-oriri ndị ahụn, gi cheri ahụa ẹsa ahụn ụnwụn e gi mụ alịnị, amamgbe ụnwụn ahụn e gbu alịnị la iwi.”

37Fẹro lẹ ịhaịmẹ ẹ ile nọ sị ibe wẹ nị iroro Josẹfụ tụ a rịka mma.

38Fẹro nọ sị ịhaịmẹ ẹ, “Nị ẹnyi hụn onyẹ ọzọ nọzị kẹ okẹnnyẹni, hụn mmọn Chuku rị imẹ ẹ?”

39Fẹro nọ sị Josẹfụ, “Ebe o mẹ ni yụ kẹ Chuku ghọsị ihiẹnni ile, onwọnni onyẹ ẹnya ru alị mọbụ onyẹ marịn ihiẹn kẹ yụ.

40Ịyụ jẹnkọ nwan d'e lepụma obi-eze m ẹnya; ihu m ile sikọ d'a rị okpuru i; ukpo-eze sụọ kẹ m'e gihụ karị ị.”

41Ya kẹ Fẹro nọ sịzị Josẹfụ, “Lee ẹ, e bu m alị Ijiptu ile che i ẹka.”

42Fẹro nọ gbụpụha ọla rị a mkpịnsịn-ẹka, ọla o gi e biye ẹka, gbụ a ye Josẹfụ mkpịnsịn-ẹka; o yimẹsọnmẹ Josẹfụ ẹkwa linẹ rị mma, bu ihiẹn olu goru che ẹ olu.

43Fẹro nọ bu ụgbọ-anyịnyan hụn e sọn nke ẹ ye Josẹfụ, yezikwọ a ndị k'a gha e sọn ẹ ebe-lẹ-ebe o jẹnkọ, e yi “Gbu ni n'ẹ osekpu!” Ẹnịna kẹ Fẹro mẹ we alị Ijiptu ile che okpuru Josẹfụ.

44Fẹro nọzị sị Josẹfụ, “Mmẹ wụ eze alịnị, kanị, onwọnni ihiẹn wẹ k'e mẹ alịnị sokpan i biye ẹ ẹka.”

45Fẹro nọ gụn Josẹfụ “Zafẹnatị-Panịa”; we Asenatị nwa Pọtifẹra ye ẹ lụrụ. Pọtifẹranị wụ ohẹn-mmọn alị Ọọnị imẹ Ijiptu. Ya kẹ Josẹfụ nọ kịma alị Ijiptu ile.

46Josẹfụ rị nwa ahụa iri kwasị ọgụn k'ọ bịa ihun Fẹro eze Ijiptu. Josẹfụ nọ gha ebẹhụ pụ, gi ẹfan Fẹro ghagbama alị Ijiptu ile.

47Alị nọ mẹ ihiẹn ọda-ọda ọrọgbọ ahụa ẹsa ahụn wẹ ku ni ihiẹn-ugbo k'e mẹ.

48Josẹfụ nọ kpọntọ ihiẹn-oriri ile alị Ijiptu mẹ ọrọgbọ ahụa ẹsanị ihiẹn-ugbo gi mẹ ọhụnma-ọhụnma. O dọnmẹsọnmẹ ihiẹn-oriri imẹ obodo ichẹn-ichẹn shịa ẹfọ: imẹ obodo ọwụlẹ shịa ẹfọ k'o dọnmẹtọ ihiẹn-oriri wẹ rụnpụha ugbo ndị rị ẹgbẹrẹ obodo hụ.

49Ihiẹn-oriri Josẹfụ dọnmẹ nọ barapụ nọkẹ ẹjan rị mkpẹnrẹn ohimin, hụn wụ nị ọ mabehi ẹ, makẹni ọ karị hụn w'a ma.

50Nị ụnwụn ahụn d'e bidọn, Asenatị, hụn Pọtifẹra nẹdi ẹ wụ ohẹn-mmọn Ọọnị, a mụpụgụọnị Josẹfụ di ẹ ikẹnnyẹ ẹbụọ.

51Josẹfụ gụn nwa ibuzọ a Manasẹ, gi ẹ sị, “Osolobuẹ e mẹgụọ m zọ ụya ile m ri lẹ ikpụlọ nẹdi m ile.”

52Ọ nọ gụn hụn ẹbọ Ifrem, gi ẹ sị, “Makẹni Osolobuẹ e mẹgụọ m ba ụba imẹ alị m nọ hụnjun ẹnya.”

53Ahụa ẹsa ahụn ihiẹn-oriri gi barahị imẹ alị Ijiptu ile e zu,

54ya ahụa ẹsa ụnwụn nọ bidọn, nọkẹ kẹ Josẹfụ dọn ku ẹ. Ụnwụn mụgbarị alị ndị ọzọ ile, kanị ihiẹn-oriri rịchanrịn ebe ọwụlẹ imẹ alị Ijiptu.

55Ogẹn alị Ijiptu ile gi nụma ụfụ ụnwụn ahụn, ndị Ijiptu nọ kwanburu Fẹro n'o d'e ye wẹ ihiẹn-oriri. Fẹro nọ sị ndị Ijiptu ile, “Jẹnburu ni Josẹfụ; ihiẹn ọ sị ụnụ mẹ, ụnụ e mẹ.”

56Ogẹn ụnwụn gi mụgbarị alị hụ ile, Josẹfụ nọ kpọpụ ụlọ ndị ahụn wẹ kpọntọ ọka, reyemẹ ndị Ijiptu ọka, makẹni ụnwụn ahụn kẹnrẹn ekẹnrẹn imẹ alị Ijiptu.

57Ndị alị ndị ọzọ ile hụ a bịa alị Ijiptu d'e ṅọnnarịn Josẹfụ ọka, makẹni ụnwụn ahụn e kẹnrẹnpụgụọ imẹ ụwa ile.