Joel 3

Ika 2018 Bible

← Chapter 2 Jump to:

1“Osolobuẹ sị: Ogẹn ahụn, m mẹgụ n'ọ rịzị nị Juda lẹ Jerusalẹm mma,

2m k'e wegbama alị ile, e wẹhẹ m wẹ Ọdanmgbugbu Jehoshẹfatị, nọ ebahụn hangbu wẹ eṅẹn yeni ihiẹn ile wẹ mẹ ndị nke m, hụn wụ ukuu m: e kpọnyịyagụọ wẹ Izrẹlụ ye alị ndị-ọzọ, keri alị m;

3a tụgụọ wẹ mkpọ keri ndị nke m, gi ụmụẹka ikẹnnyẹ wẹ kụ ụgwọ ịgbaraja, gi ịgbagba wẹ ṅọnrin manya ra.

4“Elee hụn biri mmẹ lẹ ụnụ, alị Taya-lẹ-Sidọnụ lẹ alị ile rị ẹgbẹrẹ alị Filistia? Mmẹgwarị kẹ ụnụ rịdẹ a chọ nị ụnụ mẹgwarị m ra? Omẹni mmẹgwarị rọ, m k'e hu ihiẹn ụnụ rị e mẹ kpu ụnụ isi; m k'e mẹ ẹ, mẹ ẹ ozigbo-ozigbo!

5“Ụnụ e werigụọ siliva m lẹ goru m, kwarịsọnmẹ ihiẹn bu ọda rị mkpa m butọ, bushi ụlọ-mmọn lẹ ọgwa ụnụ rị ichẹn-ichẹn.

6Ụnụ e regụọ ndị alị Juda lẹ ndị bi Jerusalẹm ye ndị Griki — kẹni ụnụ wepụ wẹ alị wẹ, we wẹ shi ebe teni.

7Kanị, m jẹnkọ nwan d'a kpọli wẹ, mẹ wẹ gha ebe ile ụnụ rejẹn wẹ pụ; m k'e mẹ ụnụ nwẹn gi isi buru ihiẹn ụnụ mẹ.

8M k'e re ụmụ ụnụ ikẹnnyẹ lẹ ikpoho ye ndị Juda, ndị Juda e re wẹ ye ndị alị Sabia tegbu enwẹn ẹ. Mmẹ wụ Osolobuẹ e kuọl'a.

9Manị nị alị ndị ọzọ ile ọkwanị: Kwademẹ ni agha! Kpọli ni ndị agha ụnụ! Ndị agha ile wẹ gbakikomẹ, pụha d'a lụ agha!

10Gi ni ọpịa-ọka ụnụ kpụrụ ọpịa-agha; gi ni ẹbeke ụnụ gi e befọn vaịnị kpụrụ obo. Onyẹ zelẹni ya sị enwẹn ẹ, ‘E zeghọ m!’

11Ndị alị ile rị ebe ile, pụha nị ozigbo! Gbakikomẹ ni imẹ Ọdanmgbugbu Hụ!! “Osolobuẹ, kịpụha nwan ndị-agha ị d'a lụsọn wẹ agha!

12Alị ile wẹ kọnrin; wẹ shi Ọdanmgbugbu Jehoshẹfatị makẹni, ebẹhụ kẹ m k'a nọ kin alị ile rị ebe ile ikpe.

13Fe ọpịa ye betu wẹ nọkẹ ọka kagụnị, n'o rugụọ! D'a sụ wẹ kẹ ẹkụ jun odo, d'e ru nị ofigbọn e huru — makẹni njọ wẹ a karị ẹka!”

14Lee igunrun-igunrun jun Ọdanmgbugbu okinkin-ikpe e che, makẹni o rumẹgụọ ụhụọhịn Osolobuẹ k'e mẹ ịhịan ihiẹn imẹ Ọdanmgbugbu okinkin-ikpe —

15ifọn lẹ ẹnyanwụn k'a gba ishi; kokisẹ e tikọzị.

16Olu Osolobuẹ k'a gha Ugu Zayọnụ hanpụha kẹ olu ẹwọrọ rị e dẹnni; olu ẹ k'a gha Jerusalẹm hanpụha kẹ akpara (akpabọ). Elu-igwee lẹ ụwa k'e mẹhunmẹ. Kanị Osolobuẹ lẹ enwẹn ẹ k'e che ndị nke ẹ nche, ebe ndị Izrẹlụ a gbaban.

17Ogẹn hụ, ụnụ a marịn nị mmẹ, Osolobuẹ hụn wụ Chuku ụnụ, bi Ugu Zayọnụ, ugu nsọ m. Jerusalẹm k'a wụ obodo rị nsọ, abịamabịa emẹrikọzị a.

18O ru ogẹn ahụn, ugu ndịnị k'e ye manya vaịnị ọda-ọda; elu-òke ndịnị e ye mirin-ẹran efin ọda-ọda mirin k'e jun iyi ile rị alị Juda; Isi-mirin k'a rị Ụlọ Osolobuẹ hụn mirin ẹ k'a gha e hupụha, a gba Ọdanmgbugbu Shitim mirin.

19“Ijiptu k'a gba okpokoro, Ẹdọm a gba okpokoro nọkẹ atụ makẹni wẹ maye ndị alị Juda ọgụn, nọ alị Juda gbu ndị nwọnlẹni ihiẹn wẹ mẹ wẹ.

20Kanị ịhịan k'e biferi imẹ Juda; ịhịan k'e bi imẹ Jerusalẹm jẹnrin ejẹn.

21M k'a gbagharị wẹ ogbugbu wẹ gbu hụn m kelẹni gbagharị wẹ; makẹni imẹ Zayọnụ kẹ mmẹ wụ Osolobuẹ bi!”

← Chapter 2 Jump to: