Jonah 1

Ika 2018 Bible

Jump to: Chapter 2 →

1Ụhụọhịn ohu, Osolobuẹ nọ gwa Jona nwa Amitaị oku,

2sị a, “Jẹn obodo uku ahụn wụ Ninivẹ ozigbo n'i d'a hị, dọ wẹ ẹka-ntịn, makẹni njọ wẹ rị e mẹ e rugụọ ebe m rị.”

3Kanị Jona nọ buli n'ọ gbashi alị Tashishi, gbapụnị Osolobuẹ. O shi Jọpa, nọ ebẹhụ chọrị ụgbọ mirin jẹnkọ alị Tashishi. Ọ kụ ụgwọ, banye, n'o sọn wẹ shi alị Tashishi, pụnị Osolobuẹ.

4Kanị, ebe wẹ jẹnkọ, Osolobuẹ nọ mẹ okẹn ufere kpọma ohimin hụ. Ẹbi hụ a karị ẹka, ụgbọ hụ nọ chọma n'o tikpọpụ.

5Egun nọ tụma ndị a rụn ọrụn imẹ ụgbọ, onyẹ-onyẹ nọ hịma mmọn hụn o fe. Ya wẹ nọ tụma ibu ye imẹ mirin kẹni ụgbọ nyịnbelụa; kanị Jona lẹ enwẹn ẹ e shigụọdẹ ibe alị imẹ-imẹ ụgbọ uku hụ d'e dinẹ, ranhịn.

6Ya kẹ onyẹ-isi ụgbọ nọ jẹnburu ẹ ebẹhụ, sị a, “Elee hụn kẹ ị rị a ranhịnnị? Lihi ọtọ, n'ị kpọku mmọn yụ nwẹn e fe! Ikẹnkwọ o mẹ ọhụnma zụọpụha ẹnyi.”

7Ndị hụ a rụn ọrụn imẹ ụgbọ nọ sị ibe wẹ, “Nị ẹnyi tụ nị mkpọ marịn onyẹ sehẹ eje-ihiẹnni.” Wẹ nọ tụ mkpọ, ọ nọ nwụn Jona.

8Wẹ nọ sị a, “Gwa nwan ẹnyi onyẹ sehẹni ẹnyi eje-ihiẹnni. Kị y'a rụn? Elebe kẹ ị gha bịa? Onyẹ elee alị k'ị wụ?”

9Jona nọ za, sị, “M wụ onyẹ Hibru; Osolobuẹ kẹ m'e fe, Chuku hụn rị elu-igwee, onyẹ hụn ke ohimin lẹ akpakalị.”

10Ya kẹ egun nọ tụma ikẹnnyẹ ndị ahụn ọda-ọda hụnnị wẹ marịn n'ọ gbakọnị Osolobuẹ — makẹni ịya k'ọ gwa wẹ. Wẹ nọ sị, “Kị wụ ihiẹnni i mẹ ẹnyi?!”

11Makẹni okẹn ufere hụ hụkwọ a kpọ, a kpọkẹnmẹ, ndị-ọrụn ụgbọ ahụn nọ sị a, “Kị ẹnyi k'e mẹ i nị okẹn-ufereni kpọbehi ẹnyi?”

12Jona nọ za wẹ, sị, “Bu ni m tụye imẹ ohimin, kẹni o mẹni ụnụ jụụ — makẹni a marịnghọ m nị oku m buhẹni ụnụ ẹbini rị a kpọnị.”

13Ya kẹ ndị ụgbọ nọ nyanma ikẹn-ikẹn nị wẹ kin shi mkpẹnrẹn mirin, kanị ọ nịnị wẹ, makẹni ẹbi ahụn hụ a kpọ mirin ohimin hụ a kpọkẹnmẹ.

14Ya wẹ nọ gwẹrụ (gwarị) kpọku Osolobuẹ, sị, “Euu Osolobuẹ, dodo kẹ ẹnyi rị a rịọ ị, egbulẹ ẹnyi makẹni ẹnyi gbu okẹnnyẹni; amalẹ ẹnyi ikpe ndị gbu onyẹ nwọnlẹni ihiẹn o mẹ — makẹni ịyụ wụ Osolobuẹ gi nwan ẹka ị mẹ ihiẹn ndịnị ile k'ị dọn chọ.”

15Ya wẹ nọ buru Jona, tụ a ye imẹ ohimin, ẹbiri-mirin ahụn nọ kpọbehi, mẹ rajụụ ozigbo.

16Egun Osolobuẹ nọ tụ ikẹnnyẹ ndị hụ ọda-ọda; ya wẹ nọ chụnyeni Osolobuẹ ẹjan, kwesọnmẹ ẹ nkwa.

17Osolobuẹ nọ zihẹ azụn hi-ogbe, azụn ahụn nọ bu Jona lue. Jona nọ nọ ẹfọ azụn akpọhịn ẹtọ.

Jump to: Chapter 2 →