Philemon 1

Ika 2018 Bible

Jump to:

1Mmẹ wụ Pọlụ de ẹkụkwọ-ozini. M rị ngan makẹ ufiri Jizọs Kraịstị. Mmẹ lẹ Timoti nwẹnẹ ẹnyi gba de ẹkụkwọ-ozini. Ịyụ wụ Filemọnụ ezigbo onyẹ-ọrụn ibe ẹnyi kẹ ẹnyi rị e dejẹnn'ẹ, ịyụ

2lẹ ụka hụn e zu iwe i, lẹ Ap'fịa nwẹnẹ ẹnyi okpoho lẹ Akịpọsụ onyẹ-agha ibe ẹnyi.

3Ẹfọma lẹ udọn, hụn gha ẹka Chuku Nẹdi ẹnyi lẹ Di-nwọnni-ẹnyi wụ Jesu Kristi bịa ya rịnị ụnụ.

4Filemọnụ, m'a kpanmịn Osolobuẹ m ogẹn ile m gi a nyanhan ị ekpere m.

5Makẹni, m hụ a nụ k'i dọn rị e nwọn ihiẹn-ọsụsụọ ndị nsọ ile lẹ k'i dọn kwerikẹnmẹni Di-nwọnni-ẹnyi Jizọsị.

6Ekpere m wụ nị okweri ẹnyi lẹ ịyụ kwerini Jesu jẹnkọ d'e yeni i ẹka a ghọtawaye ihiẹn ile wụ nke ẹnyi imẹ Kraịstị.

7Ezigbo nwẹnẹ m, ihiẹn-ọsụsụọ i nwọn e mẹ m a ghọghọ ọda-ọda, a gbazị m umẹ, makẹni Osolobuẹ e gigụọ ị gba ndị nsọ umẹ.

8Ufiri ẹ, ọsụọn'a nwan nị, imẹ Kraịstị, nị m nwọn ikẹn ye i iwu n'ị mẹ ihiẹn furu n'i mẹ,

9kanị makẹ ufiri ihiẹn-ọsụsụọ, ọ ka m mma nị m rịọ ị. Mmẹ Pọlụ, hụn wụ okẹnnyẹ-ọba, hụn rị a nọkin ẹnya Jizọs Kraịstị, hụn rị imẹ ngan makẹ ufiri Jizọs Kraịstị; mmẹ rị a rịọ ị.

10M rị a rịọ ị makẹ nwa m wụ Onesimọsụ, hụn m mụnrụn imẹ ngannị m rị.

11Onwọnni erere ọ bann'ị mbụ. Kanị ọ bangụọnị nwan kẹ ịyụ kẹ mmẹ erere.

12M zikinlan'ị ya: ya wụ, m zikinlan'ị nwan mkpụrụ obi m.

13M te k'a sị a nọdị ebeni m rị, kẹni ọ nọkin ẹnya ụnụ, e jẹnni m ozi hụnnị m rị ngan makẹ ufiri oziọma.

14Kanị, achọnị m nị m mẹ ihiẹn ọwụlẹ bụ a gwanị m'ị; kẹni ọhụnma ị wụrụ ihiẹn gha akpakalị obi i pụha, ẹlẹ ni wẹ wa a ye i olu.

15Ikẹnkwọ wẹ napụ ị ya ẹkẹrẹ, kẹni i nwọnhẹnzi ẹ jẹnrin ejẹn —

16ẹlẹzi nọkẹ igbọn, kanị nọkẹ ezigbo nwẹnẹ, hụn ka igbọn. Nwẹnẹ k'ọ wụ, tụmadụ ebe m rị, kanị ịyụ k'ọ ka a wụ nwẹnẹ ẹ — kẹ elu-ụwa kẹ imẹ Di-nwọnni-ẹnyi.

17O mẹ nwan ni y'e werighọ m kẹ onyẹ yụ lẹ ịya gba a rụn, nabanhan a kẹ y'a dọn nabanhan m.

18Omẹni o nwọn ihiẹn o mẹ i mọbụ ihiẹn o gi i, gụn a yeni m, m k'a kụ a.

19Mmẹ wụ Pọlụ gi ẹka m de ọnwan: Ẹghẹẹ, gụn a yeni m; m k'a kụ a. Ẹlẹ mmẹ nwọn gwazị ị nị i gi m ụgwọ — n'i gi m ụgwọ enwẹn i.

20Ẹghẹẹ nwẹnẹ m, nị m gidẹ ẹfan Di-nwọnni-ẹnyi ri ọghọnị ẹka ị. Gi ufiri Kraịstị gba m umẹ.

21M rị e deni i ihiẹnni makẹni a marịnghọ m n'i k'e humẹ isi; a marịnghọ m n'i k'e mẹkarịdẹ ihiẹn m gwa ị.

22Ọzọzị, kwademẹni m mmughẹ m k'a nọdị m bịa, makẹni m rị a tụ ẹnya nị Osolobuẹ jẹnkọ d'a za ekpere ụnụ, a ha wẹ m yeni ụnụ.

23Ẹpafrasị hụn mmẹ lẹ ịya rị nwan ngannị makẹ ufiri Kraịstị Jizọsị e zi ekele i.

24Ndị ọrụn ibe m wụ Makị lẹ Arịstakusu lẹ Dẹmasị lẹ Luku e kelezi i.

25Ẹfọma Di-nwọnni-ẹnyi wụ Jesu Kristi ya rịnị mmọn ụnụ.

Jump to: